«استانا – ەۋرازيانىڭ التىن قاقپاسى. وسى قاقپادان اتتاعان ءاربىر ينۆەستور ءوزىنىڭ بيزنەس مۇمكىندىگىن عانا كەڭەيتىپ قويماي, قازاقستاننىڭ جاڭا استاناسىن قۇرۋشىلاردىڭ تاريحي شەڭبەرىنە ەنەدى».
نۇرسۇلتان نازارباەۆتىڭ بۇل ءسوزى استانانىڭ تاۋەلسىز قازاقستانداعى اۋقىمدى جوبا رەتىندەگى ەكونوميكالىق جانە ينۆەستيتسيالىق الەۋەتىن عانا ەمەس, ونىڭ تابىستارى مەن جەتىستىكتەرىن دە ايقىن اڭعارتادى.
استانانىڭ جان-جاقتى دامۋىن دۇنيەجۇزىلىك قاۋىمداستىققا تانىستىرۋ مىندەتىن جىل سايىن «Astana Invest» حالىقارالىق ينۆەستيتسيالىق فورۋمى اتقارىپ كەلەدى. العاشىندا بۇل فورۋم وتاندىق بيلىك وكىلدەرى مەن بيزنەس وكىلدەرىنىڭ الەمدەگى ءارتۇرلى ەل ينۆەستورلارىمەن, ساراپشىلارىمەن ءوزارا ارەكەتتەسۋىنە ارنالعان ەرەكشە الاڭى رەتىندە ۇيعارىلعان. ەكى جىلدىق تاريحى بار فورۋمنىڭ اۋقىمدىلىعى ارتا ءتۇسىپ, استانانىڭ ينۆەستيتسيالىق احۋالىن جاقسارتۋعا تىڭ مۇمكىندىكتەر تاۋىپ, قالا ەكونوميكاسىنا وتاندىق جانە شەتەلدىك ينۆەستيتسيالاردىڭ اعىلۋىن ودان ءارى ىنتالاندىرۋدى باستى ماقسات تۇتىپ كەلەدى.
«Astana Invest – 2012» فورۋمى بيىلعى 24 مامىردا V استانا ەكونوميكالىق فورۋمى اۋقىمىندا وتەدى. فورۋمنىڭ ۇيىمداستىرۋشىسى – استانا قالاسىنىڭ اكىمدىگى. قالانىڭ يننوۆاتسيالىق جانە ەكونوميكالىق دامۋىنىڭ وزەكتى ماسەلەلەرى ەڭ جوعارى دەڭگەيدە قاراستىرىلادى. قالىپتاسقان داستۇرگە ساي فورۋمدى پرەمەر-مينيستر كارىم ءماسىموۆ پەن استانا اكىمى يمانعالي تاسماعامبەتوۆ اشادى. فورۋمعا شەتەلدەردىڭ مەملەكەتتىك ورگاندار مەن قارجى ينستيتۋتتارىنىڭ, بيزنەس قۇرىلىمدارىنىڭ, حالىقارالىق ءىرى كورپوراتسيالاردىڭ, شەتەلدىك ينۆەس- تورلار مەن ەكونوميكانىڭ ناقتى سەكتورىنىڭ وكىلدەرى – بارلىعى 500-دەن استام ادام قاتىسپاقشى.
«Astana Invest – 2012» فورۋمىندا جىلدان جىلعا جاسارىپ, جايناي تۇسكەن ەلوردانى رەسپۋبليكانىڭ عانا ەمەس, بۇكىل ەۋرازيانىڭ ساياسي- اكىمشىلىك ورتالىعى جاقىندا قۇرىلعان كەدەن وداعىنىڭ تىرەگى رەتىندە دامىتۋ جايى قاراستىرىلادى.
جيىندى ۇيىمداستىرۋشىلار استانانى وركەندەتۋگە, ىڭعايلى «اقىلدى قالا» رەتىندە بەرەكەلى تۇرمىس كەشىپ, بەلسەندى تىرلىك ىستەۋگە مەيلىنشە يننوۆاتسيالىق قىرىن جەتىلدىرۋگە اسا كوڭىل ءبولىپ وتىر. شاپشاڭ ءارى جوسپارلى تۇردە دامىپ كەلە جاتقان كىندىك قالا وزىنە ارتىلعان ۇمىتتەردى اقتاپ كەلەدى.
استانانىڭ ەكونوميكالىق بازاسى نەگىزگى ەكى بولىكتەن – قۇرىلىستان جانە شاعىن, ورتاشا كاسىپكەرلىكتەن تۇرادى, ەل استاناسىنىڭ ينۆەستيتسيالىق كوركى وسى ەكى سەكتورعا تاۋەلدى. 2011 جىلعى ينۆەستيتسيالار كولەمى 3,9 ملرد دوللاردان استى, بۇل 2010 جىلعى كورسەتكىشتەن 35,7%-عا جوعارى.
تىكەلەي ينۆەستيتسيالاردى تارتۋ بارىنشا اشىق, ەكى جاققا دا ءتيىمدى ءارى سەرىكتەستەر اراسىنداعى جوعارى سەنىمگە سۇيەنۋى كەرەك. وسى شەشۋشى قىزمەتتى الداعى «Astana Invest – 2012» فورۋمى وزىنە ارتقالى وتىر. جيىن الەۋەتتى ينۆەستورلار ايماقتا بيزنەس جۇرگىزۋدىڭ ەكونوميكالىق, قۇقىقتىق جانە باسقا جاعدايلارىمەن, استانانىڭ كاسىپورىندارى مەن ۇيىمدارىنىڭ ءتۇرلى جوبالارىمەن تانىسىپ, ولاردىڭ ينۆەستيتسيالىق مۇمكىندىكتەرىن باعالاي الادى. قاتىسۋشىلار حالىقارالىق جانە ايماقتىق ينۆەستيتسيالىق ىنتىماقتاستىق ماسەلەلەرى مەن ونىڭ كەلەشەگىن رەسمي جانە ىسكەر وكىلدەر اراسىندا تالقىعا سالادى.
ەكى جىل بويى فورۋم وزىنە جۇكتەلگەن مىندەتتەر اۋقىمىن ءساتتى اتقارىپ كەلەدى. وتكەن جىلى «Astana Invest» فورۋمى بەدەلدى مامىلە الاڭى ەكەنىن دالەلدەدى. جيىن جۇمىسىنا الەمنىڭ 23 ەلىنىڭ 700-دەن استام وكىلى قاتىستى. ولاردىڭ قاتارىندا حالىقارالىق بيزنەس-ەليتا وكىلدەرى, ەۋروپا, اقش, وڭتۇستىك-شىعىس ازيا جانە پارسى شىعاناعىنىڭ قارجى ساراپشىلارى, قازاقستاننىڭ جانە شەتەلدىڭ ۇلتتىق كومپانيالارىنىڭ, مەملەكەتتىك باسقارۋ ورىندارىنىڭ, دامۋ ينستيتۋتتارىنىڭ ماماندارى, ءىرى جانە ورتاشا بيزنەس جەتەكشىلەرى بار.
بيىلعى فورۋمعا دا ۇلكەن ءۇمىت ارتىلىپ وتىر. ءيا, «Astana Invest – 2012» باعدارلاماسى مازمۇندى جانە قىزىقتى بولارى ءسوزسىز. ول ءۇش: «استانا – ەۋرازيا جۇرەگى جانە كەدەن وداعىنىڭ قاقپاسى»; «استانانىڭ ينۆەستيتسيالىق مۇمكىندىكتەرى مەن كەلەشەگى»; «اقىلدى قالاعا» ارنالعان ينۆەستيتسيا» اتتى ءماجىلىستى قامتيدى.
سپيكەرلەر مەن مودەراتورلار رەتىندە ءارتۇرلى ەلدىڭ تانىمال قايراتكەرلەرى: قر ەكونوميكالىق دامۋ جانە ساۋدا ۆيتسە-ءمينيسترى ت.م.جاقسىلىقوۆ, ەۆرازەس باس حاتشىسى ورىنباسارى م.ح.مۇساتاەۆ, «Patentes Talgo SL» كومپانياسىنىڭ جەكە-دارا باسقارۋشى ديرەكتورى حوسە ماريا اريول فابرە, «ەرتەڭگى كۇن قالاسى» حالىقارالىق جوبا جەتەكشىسى توبياس رەگگەلين, فراۋنگوفەر ينستيتۋتى, تمد ەلدەرى مەن رف ايماقتارى بويىنشا IBM ۆيتسە-پرەزيدەنتى التۋحوۆ ل.گ., «بيزنەس وۋلۋ» (فينليانديا) ديرەكتورى دجۋحا الا-مۋرسۋلا, ەۋروپا مەن ورتالىق ازيا بويىنشا IFC ديرەكتورى توماش تەلما جانە ت.ب. تاڭدالدى.
الەۋەتتى ينۆەستورلارعا قالا كاسىپورىندارىنىڭ ينۆەستيتسيالىق جوبالارى بويىنشا تولىق ايماقتىق دەرەكقورى ۇسىنىلادى.
وسىلايشا, سوڭعى جىلدارى قازاقستاننىڭ باس قالاسىنىڭ ەكونوميكالىق جانە يننوۆاتسيالىق دامۋىنا ينۆەستيتسيا سالۋشىلاردى ىنتالاندىرۋ ءىسى جاندانىپ كەلەدى. ساراپشىلار بولجاۋى بويىنشا, بيىلعى «Astana Invest –2012» فورۋمى وسى ۇردىسكە ءوز ۇلەسىن مولىنان قوسادى.
مەدەر ماسەلوۆ,
«استانا – جاڭا قالا» ارنايى ەكونوميكالىق ايماعىن اكىمشىلەندىرۋ باسقارماسىنىڭ باستىعى
