كاسىپكەرگە كومەك كوپ

جالدامالى جۇمىس الدە جەكە كاسىپ؟ بىرەۋگە قىزمەت ەتكىڭىز كەلمەسە, شەشىم وڭاي – ءوز ءىسىڭدى اشۋ. ال, بيزنەس باستاۋشىلارعا ەلىمىزدە قولداۋ كوپ. مەملەكەت جەكە كاسىپكەرلەردىڭ جولىن اشىپ, بيزنەس الاڭدا ەركىن جۇرۋىنە بار جاعدايدى جاساپ كەلەدى: اقپاراتتىق كومەك, قۇجاتتاردى كەدەرگىسىز راسىمدەۋ, جەڭىلدەتىلگەن نەسيە… «بۇل جاردەمگە كىمدەر لايىق؟ بيزنەستى قالاي باستاۋ كەرەك؟» دەگەن سۇراقتارعا جاۋاپ ىزدەپ كوردىك.

الدىمەن بيزنەس-يدەيا كەرەك

كەز كەلگەن كاسىپتى اشۋعا, ەڭ الدىمەن, بيزنەس-يدەيا كەرەك. جوباڭىزدىڭ قولجەتىمدىلىگىن باعالاۋ ءۇشىن سالاعا قاتىستى جان-جاقتى اقپارات جيناڭىز, تىلدەسۋ ارقىلى كاسىپكەرلەردىڭ تاجىريبەسىنە كوز جۇگىرتىڭىز. نارىقتىڭ قاجەتتىلىكتەرىن سارالاڭىز. ازىرگە بۇل بيزنەس اشسام دەگەن نيەت قانا. ونى جۇزەگە اسىرۋ قولىڭىزداعى مۇمكىندىكتەرگە بايلانىستى. ياعني, قاراجات سوماسى. شاعىن بيزنەس ۇلكەن اقشانى قاجەت ەتپەيدى. العاشقى سالىمعا جاعدايىڭىز جەتىڭكىرەمەسە شە؟ بۇل جاعدايدا كاسىپكەرلەر بانكتەردىڭ كومەگىنە جۇگىنەتىنى بەلگىلى. بيزنەس-جوسپار ارقىلى بانككە جوباڭىزدىڭ تيىمدىلىگىن دالەلدەۋ كەرەك. الايدا نەسيەنىڭ پايىزدىق كورسەتكىشى وتە جوعارى, ونى تولەۋگە ەندى عانا ءىسىن اشقالى وتىرعان كاسىپكەردىڭ قالتاسى كوتەرە بەرمەيدى. كەپىلدىك بەرۋ ماسەلەسى تاعى بار. وسى رەتتە «بيزنەستىڭ جول كارتاسى – 2020» باعدارلاماسى كاسىپكەرلەردىڭ ەڭسەسىن تىكتەپ, قادامىن نىقتاي تۇسەدى. بيزنەستى قولداۋ مەن دامىتۋدىڭ بۇل بىرىڭعاي باعدارلاماسى ەلباسى نۇرسۇلتان نازارباەۆتىڭ «جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى» اتتى جولداۋى مەن قازاقستاننىڭ 2020 جىلعا دەيىنگى جالپىۇلتتىق دامۋ جوسپارىن ىسكە اسىرۋ ءۇشىن ازىرلەنگەن بولاتىن.

كاسىپكەرلەر پالاتاسى  باعدار بەرەدى

اتالمىش باعدارلاما اياسىندا ەلوردادا اقپاراتتاندىرۋ, قارجىلاندىرۋ سياقتى قولداۋدىڭ ءتۇر-ءتۇرى قاراستىرىلعان اۋقىمدى جۇمىستار اتقارىلادى. سونىڭ بىرقاتارىن ۇيىمداستىراتىن استانا قالاسى كاسىپكەرلەر پالاتاسىنا جول تارتتىق.
«بيزنەس باستاعىسى كەلەتىن ازاماتتار ءۇشىن كاسىپكەرلەرگە قىزمەت كورسەتۋ ورتالىعى تەگىن جۇمىس ىستەيدى. بىلتىر 2 مىڭعا جۋىق استانالىققا كومەك كورسەتىلسە, جىل باسىنان بەرى 1300-دەي ادام كەلىپ ۇلگەردى. ۇسىناتىن قىزمەتتەر ءار الۋان: بيزنەس-جوسپار قۇرۋ, بۋحگالتەرلىك كومەك, ۆەب-سايت اشۋ, قۇقىقتىق قىزمەت كورسەتۋ» دەيدى استانا قالاسى كاسىپكەرلەر پالاتاسىنىڭ ەكونوميكالىق سۇراقتار بويىنشا ديرەكتور ورىنباسارى المات ءجۇنىسوۆ. ونىڭ ايتۋىنشا, بۇگىندە ەلىمىزدىڭ كەز كەلگەن وڭىرىندەگى كاسىپكەرلىكتىڭ دامۋ دەڭگەيى مەن ينۆەستيتسيا تارتۋعا بولاتىن ماڭىزدى سالانى انىقتاۋعا مۇمكىندىك بەرەتىن كاسىپكەرلىكتى دامىتۋدىڭ وڭىرلىك كارتاسى بەلسەندى جۇمىس ىستەپ تۇر. ول جەردەن قازاقستاننىڭ 14 وبلىسى مەن رەسپۋبليكالىق ماڭىزى بار ەكى قالا – استانا مەن الماتىنىڭ ەكونوميكالىق الەۋەتى, تابيعي مينەرالدىق رەسۋرستارى, لوگيستيكالىق مۇمكىندىگى, ءونىمدى وتكىزۋ نارىعى تۋرالى تولىققاندى اقپارات الۋعا بولادى.

كىرىس-شىعىس ەسەپتەلەدى

– «بيزنەس اشقىم كەلەدى. بىراق نەمەن اينالىساتىنىمدى بىلمەيمىن. ماعان جوسپار جازىپ بەرىڭىزشى» دەيتىن ادامدار سيرەك كەزدەسەدى. ادەتتە مۇندا ناقتى ءبىر يدەياسى بار, سۇيىكتى ءىسىن تابىسقا اينالدىرۋدى قالايتىن ازاماتتار كەلەدى. ساپالى بيزنەس-جوبانى جازۋعا مۇنداعى ماركەتينگپەن اينالىساتىن ماماندار كومەكتەسەدى. ال, جازۋعا, ەسەپتەۋگە كىرىسپەس بۇرىن كاسىپكەردىڭ قولىندا ءبىراز مالىمەت بولۋ كەرەك. نە اشقالى جاتىر؟ قاي جەردەن؟ قانداي قۇرىلعىلار, ماتەريالدار كەرەك؟ ءوزىنىڭ تابىسىن قالاي ەلەستەتەدى؟ ال, ءبىزدىڭ قىزمەتكەرلەر بۇل ءىستىڭ كىرىس-شىعىسىن ەسەپتەيدى. ماسەلەن, ەگەر بۇل ساۋدا بولسا, تابىسقا جەتۋ ءۇشىن كۇنىنە قانشا تاۋار ساتۋ كەرەكتىگىن, مەملەكەت بۇل بيزنەستەن قانشالىقتى پايدا كورەتىنىن, نەسيەگە بەرىلەتىن اقشانى دۇرىس جۇمساۋ سىزباسىن, تاعى دا باسقا كوپتەگەن ماڭىزدى ماسەلەلەردى انىقتاپ بەرەدىو, – دەيدى المات ءجۇنىسوۆ.
بيزنەس-جوسپاردى دايىنداۋ ۇزاقتىعى ءار كاسىپتىڭ ەرەكشەلىگىنە, جەكە كاسىپكەردىڭ ىزدەنىمپازدىعىنا بايلانىستى. ەڭ كوبى – ءبىر اي ۋاقىتتى الادى ەكەن.

نازگۇل كاسىبىن قالاي دوڭگەلەتتى؟

بىزگە كۇنى كەشە استانا قالاسى اكىمدىگىنىڭ جانىنداعى استانا قالاسىنىڭ ۇدەمەلى يندۋستريالىق دامۋى بويىنشا وڭىرلىك ۇيلەستىرۋ كەڭەسىنىڭ وڭ شەشىمىنە يە بولعان جاس كاسىپكەر نازگۇل اجىباەۆامەن تىلدەسۋدىڭ ءساتى ءتۇستى.
نازگۇل كاسىپكەرلەرگە قىزمەت كورسەتۋ ورتالىعىندا ازىرلەنگەن بيزنەس-جوسپارىن ءساتتى قورعاپ, كاسىبىن دوڭگەلەتۋ ءۇشىن «دامۋ» قورى ارقىلى بانكتەن 5 جىلعا 10 ميلليون تەڭگە كولەمىندەگى نەسيەنى الىپ وتىر.
تۇسىنىك ءۇشىن ماڭىزدى دەرەكتى ەسكە تۇسىرەلىك. «بيزنەستىڭ جول كارتاسى – 2020» باعدارلاماسى بويىنشا ءىسىن جاڭا باستاعان جاس كاسىپكەرگە 20 ملن تەڭگەگە دەيىن كرەديت بەرىلەدى. بۇل جەردەگى ۇلكەن قولداۋ – كرەديت سوماسىنىڭ 85 پايىزدىق كەپىلدىك مولشەرىن مەملەكەت ءوزى تولەيدى. جاستاردىڭ كاسىپكەرلىگىن قولداۋ باعىتىندا, جاستاردى بيزنەسكە كوبىرەك تارتۋ ماقساتىندا استانا قالاسى اكىمدىگى مەن «دامۋ» قورى ىسكە قوسقان «Astana – ZhasStart» باعدارلاماسىنا 29 جاسقا دەيىنگى جاس كاسىپكەرلەر قاتىسا الادى. تاعى ءبىر ارتىقشىلىعى – كاسىپكەر بار-جوعى 7 پايىزدىق جىلدىق مولشەرلەمە كولەمىندە نەسيە الا الادى ەكەن. بۇل باعدارلاما فرانشيزا تارتۋعا, ريتەيلدىك جەلىلەردى (سۋپەرماركەتتەر, گيپەرماركەتتەر), قوعامدىق تاماقتانۋ پۋنكتتەرىن دامىتۋعا جانە مودەرنيزاتسيالاۋعا ارنالعان جوبالاردى قارجىلاندىرۋعا باعىتتالعان. بىراق ەشقانداي سالالىق شەكتەۋلەر دە قاراستىرىلماعان.
مۇنداي ۇلكەن جەڭىلدىكتەرگە يە بولعان استانالىق نازگۇل اجىباەۆانىڭ قۋانىشىندا شەك جوق. جاس كاسىپكەر كوميسسيا الدىندا كونديتەرلىك ءدامحانا اشۋ جونىندەگى جوباسىن تانىستىرعان. بۇدان ءۇش اي بۇرىن بۇل باستاماسى – ءپىسىپ جەتىلمەگەن يدەيا ەدى, قازىر بولاشاعى بار جەكە كاسىپكەرلىك.
بيزنەس حوببيدەن باستالعان. ءدامدى داستارقان دايىنداۋدى جانى سۇيەتىن نازگۇل بىلتىر كونديتەرلىك كۋرسىنان ءوتىپ, ءتۇرلى ءتاتتىنى ازىرلەۋدىڭ سىرىن مەڭگەرگەن. بۇل ونەرىن كورشىلەرى جوعارى باعالاپ, تورت, ءتاتتى بالىشتەرگە تاپسىرىس بەرە باستاعان. كەيىننەن كەيىپكەرىمىز «ينستاگرام» الەۋمەتتىك جەلىسىنە تىركەلىپ, وندا ءوز ءونىمىن جارنامالايدى. تاپسىرىستىڭ كوبەيگەنى سونشا, نازگۇل ءبارىن ءبىر ءوزى جاساۋعا ۇلگەرمەيدى. سودان وعان كۋليناريا اشۋ تۋرالى وي كەلەدى. «ءبىر كۇنى تەلەديداردان «بيزنەستىڭ جول كارتاسى – 2020» باعدارلاماسى ۇسىناتىن جەڭىلدەتىلگەن نەسيە تۋرالى روليكتى كورىپ قالدىم. «قاي جەردە سالامىن دەپ عيماراتتى جالعا المايمىز. بوس پاتەرىم بار. سوعان رەمونت جاساپ, كافە ەتەيىك» دەگەن ۇسىنىس ايتتىم وتباسى جينالىسىندا» دەيدى ول. كاسىپكەرلەرگە قىزمەت كورسەتۋ ورتالىعىنا بارىپ, يدەياسىن تۇسىندىرگەن سوڭ, ماماندارمەن بيزنەس-جوسپار جازۋعا كوشەدى.
– بيزنەس-جوبا بويىنشا جەتەكشىم نازگۇل قاراشاش بەس جىلدىق سالىعىمدى ەسەپتەپ بەردى. شىعىنعا باتپاس ءۇشىن كۇنىنە 73 ءبالىش ساتۋ كەرەكتىگىن ايتتى. قۇرىلىسشىلاردى شاقىرتىپ, جوندەۋ جۇمىستارىنىڭ قانشاعا شىعاتىنىن ءبىلدىم. وزىمە كەرەك اس جابدىقتارىن دا تاۋىپ, باعاسى جونىندە كەلىستىك. ناتيجەسىندە كونديتەرلىك كاسىپورىن اشۋىما 10 ميلليون تەڭگە كەرەكتىگى ءمالىم بولدى, – دەيدى نازگۇل.
بۇل بيزنەستى وتباسىلىق دەۋگە دە بولادى. كاسىپكەرلىكتىڭ يەسى 29 جاسقا تولماعان ءىنىسى جالعاس اجىباەۆ ەكەن. ول تۋعان اپكەسىنىڭ باستاماسىنا سەنىپ, قولداۋ كورسەتكەن. بيزنەس-جوسپاردى «دامۋ» قورى ماقۇلداپ, كەپىلدىك بەرۋگە كەلىسكەن سوڭ, بانك كاسىپكەرگە نەسيە بەرۋ شارتتارى تۋرالى حات جولدايدى. سوڭعى ءارى شەشۋشى ءسات – وڭىرلىك ۇيلەستىرۋ كەڭەسىنىڭ كەلىسىمى.
جاس كاسىپكەرلەر قالالىق اكىمدىكتەگى وڭىرلىك ۇيلەستىرۋ كەڭەسىندە كاپكەيككە ديگۋستاتسيا وتكىزدى. جوبانىڭ تيىمدىلىگىن دالەلدەپ, وڭ شەشىمگە قول جەتكىزدى.

ءمادينا جاقىپ