كىشكەنتايلار كورمەسى
تۇڭعىش پرەزيدەنت مۇراجايىندا «سۇيەمىن سەنى, استانا» اتتى ءداستۇرلى فەستيۆال ءوتتى. پلاكاتتار كورمە-بايقاۋىن تۇڭعىش پرەزيدەنتى مۇراجايى, يۋنەسكو-نىڭ بالالار كوركەمسۋرەت مەكتەپ-كلۋبى مەن نوۆوسيبيرسك قالاسىنىڭ «سولياريس» بالالار-جاسوسپىرىمدەر قوعامدىق ۇيىمى جانە رەسەي مادەنيەت قورى نوۆوسيبيرسك فيليالىنىڭ قولداۋىمەن ۇيىمداستىرىلىپ وتىر.
كورمەگە قازاقستاندىق جانە رەسەيلىك وقۋشىلاردىڭ ۇزدىك 100 تۋىندىسى قويىلعان. بالاباقشالار, بالالار ءۇيى, مەكتەپتەر, ليتسەيلەر, گيمنازيالار, بالالار شىعارماشىلىق ۇيلەرىنىڭ ءار ءتۇرلى جاستاعى جەتكىنشەكتەرى قىلقالام شەبەرلەرى تۋىندىلارىندا الەمدى, قورشاعان ورتانى وزدەرىنشە ءتۇسىنىپ, ۇلكەندەر كوڭىل بولە بەرمەيتىن ەلەۋسىز وقيعالاردى, قۇبىلىستاردى بوياۋ ارقىلى بەرگەن.
قر تۇڭعىش پرەزيدەنتى مۇراجايى ديرەكتورىنىڭ ورىنباسارى كۇلايشا اقتاەۆانىڭ ايتۋىنشا, اتالعان شارا وتانىنا ادال ەڭبەك ەتىپ, يگى ىستەردى اتقارۋدى كوزدەيتىن ازاماتتى تاربيەلەۋگە باعىتتالادى.
ال, كورمەگە كەلۋشى اتا-انالار, قوناقتار جاس قىلقالام شەبەرلەرىنىڭ تۋىندىلارىنا ءتانتى بولعاندارىن, ولاردىڭ بولاشاعىنان زور ءۇمىت كۇتەتىنىن ايتىپ, ۇيىمداستىرۋشىلارعا العىستارىن ءبىلدىردى.
ەركەجان ساتىمبەك