1993 جىلدان باستاپ كوپەن امىربەك «كوپەن كەلە جاتىر!» اتتى پاروديا تەاترى ارقىلى حالىقتىڭ ىستىق ىقىلاسىنا بولەنىپ, ساتيرا جانرىنىڭ دامۋىنا ۇلەس قوستى. ەندى, مىنە, ۇلتتىق اكادەميالىق كىتاپحانادا «كوپەن كەلە جاتىر» اتتى 5 تومدىق كىتاپتىڭ تۇساۋى كەسىلدى. ءىس-شاراعا ەلورداداعى جانە وڭىرلەردەگى زيالى قاۋىم وكىلدەرى قاتىستى.
«اقىن-جازۋشىلاردىڭ تۋعان كۇنى بار دا, ولگەن كۇنى جوق» دەگەندەي, ەندى كوپەننىڭ رۋحاني ءومىرى باستالىپ, تاعى دا «كوپەن كەلە جاتىر!» دەگەن تەڭەۋ الدىمىزدان شىقتى. بەلگىلى سىقاقشى كوپەن امىربەك كوزى تىرىسىندە ءوزى قۇراستىرىپ, باسپاعا بەرگەن 5 تومدىق كىتاپتىڭ تانىستىرىلىمىنا كەلگەن قاۋىمنىڭ قاراسى قالىڭ بولدى.
قازاقستان رەسپۋبليكاسى پرەزيدەنتىنىڭ كەڭەسشىسى باۋىرجان ومارۇلى, سەنات دەپۋتاتى نۇرتورە ءجۇسىپ, مەملەكەت جانە قوعام قايراتكەرلەرى بەردىبەك ساپارباەۆ, ساۋىتبەك ابدراحمانوۆ, يسلام ءابىش كىتاپتىڭ تۇساۋىن كەسىپ, ءسوز سويلەدى.
قازاق ساتيراسىنىڭ قالىپتاسىپ, دامۋىنا زور ۇلەس قوسقان وسپانحان اۋباكىروۆتىڭ ءداستۇرلى مەكتەبىن بيىكتەتكەن كوپەن امىربەك تۋرالى ەستەلىك وتە كوپ. رۋحاني كەشكە كەلگەن ءاربىر ازامات ەستەلىگىمەن بولىسۋگە ءمان بەردى. سولاردىڭ قاتارىندا جازۋشى جارىلقاپ بەيسەنباي مەن قوعام قايراتكەرى دارحان مىڭبايدىڭ ويى ەرەك, ءسوزى جۇيەلى ەستىلدى. ءبىرىنشىسى كوپەننىڭ كوپ تومدىق تۋىندىسىن كەڭىنەن ناسيحاتتاۋدا ەلەكتروندى نۇسقاسى ارقىلى تاراتۋ ماڭىزدى ەكەنىن اتاسا, ەكىنشىسى قالامگەردىڭ ساتيرا تۋىندىلارى ساحناعا جول تارتۋىمەن قۇندى ەكەنىن اتادى.
ءسوز سويلەۋشىلەر قاتارىندا الاشتانۋشى عالىم, «قازاق گازەتتەرى» جشس باس ديرەكتورى ديحان قامزابەكۇلى قالامگەر كوپەن امىربەك ينتەللەكتۋالدى ساتيرادا قالام تارتقانىن اتاسا, جازۋشى جولتاي ءالماشۇلى ساتيرانىڭ پامفلەت, پاروديا, مىسال جانرىندا قالام تارتقانىن, مۇنداي قاسيەت كەز كەلگەن قالامگەردىڭ بويىندا بولمايتىنىنا توقتالدى. ال تاريحشى كامال ءابدىراحمانوۆ كوپەن دانەكەر ازامات بولعانىن, ياعني رەنجىسىپ قالعانداردى تاتۋلاستىرىپ, دوستاستىرىپ جۇرەتىن ادامگەرشىلىگىن ءسوز ەتتى.
«اتى جوق كىتاپ», «الىپ», «ءتىلىم قىشىپ بارادى», «قىسىر اڭگىمە», «مىڭ ءبىر مىسال», «اۋىز باستىرىق», «ءوزىڭدى تانيسىڭ با؟», «ءىز», «كوكەمنىڭ كوزى», «پا, شىركىن, پاروديا!», «كوپەن كەلە جاتىر!» كىتابىنىڭ اۆتورى كوپەن امىربەكتىڭ سىقاق ولەڭدەرى, مىسال-مىسقىلدارى, ماقالالارى ومىرشەڭدىگىمەن ەرەكشەلەنەدى. بۇل تۋراسىندا تارقاتقاندا باۋىرجان ومارۇلىنان ارتىق جازا الماسىمىز انىق.
«…كوپەن ايدىكتەردىڭ بارىمەن ازىلدەستى. ايبارلى اسقار توقپانوۆتى, ايباتتى زامانبەك نۇرقادىلوۆتى, اتتانشىل امانتاي قاجىنى, مىنەزدى اقىن فاريزا وڭعارسىنوۆانى, سالماقتى ساياساتكەر التىنبەك سارسەنباەۆتى پاروديا شىعارمالارىنىڭ كەيىپكەرىنە اينالدىردى. ءبارى دە – پاروديا جانرى ءۇشىن, اسىرەسە قازاق پارودياسى ءۇشىن اسا كۇردەلى كىسىلەر. بىراق سىقاقشى وگىزدى ولتىرمەي, اربانى سىندىرماي, كەيىپكەرلەرىن كۇيىندىرمەي ءھام سۇيىندىرمەي, تارازى باسىن تەڭ ۇستاپ وتىرىپ, ءوز ماقساتىن ورىنداپ شىقتى. ەشقايسىسىمەن ەسەپ ايىرىسپادى, كوكپار تارتىسپادى, جاعا جىرتىسپادى. ول ءسويتىپ, و باستا پارودياعا قىرىن قارايتىن قازاق شەنەۋنىكتەرى مەن ۇلت زيالىلارىن سىن ساداعىنان سەسكەنبەۋگە, كەرىسىنشە, كۇلكىنىڭ قۇدىرەتىن سەزىنۋگە ۇيرەتتى» دەپ جازادى بەلگىلى قالامگەر باۋىرجان ومارۇلى. ايتا كەتۋ كەرەك, 5 تومدىق كىتاپتىڭ شىعۋىنا كاسىپكەر ورازحان جانىسبەكوۆ دەمەۋشىلىك ەتتى.
