2014 جىلدىڭ 1 قاڭتارىنان باستاپ كولىك سالىعى قىمباتتاماق. بۇل تۋرالى مالىمدەگەن قر ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ: «قىمبات كولىك مىنگەندەردىڭ جاعدايى جامان ەمەسى انىق. ولار سالىقتى كوبىرەك تولەۋى كەرەك. ءسويتىپ, بيۋدجەت قورجىنىنا 1 ميلليارد 700 مىڭ تەڭگە تۇسىرۋگە بولادى» دەگەن پىكىردە.رەسمي مالىمەتكە سۇيەنسەك, ەلىمىزدە 3 ميلليون 600 مىڭ كولىك بار ەكەن. ولاردىڭ ىشىندە قوزعالتقىشىنىڭ كولەمى 3 تەكشە سانتيمەتردەن اساتىن كولىكتەردىڭ سانى – 112 مىڭ. بۇل – جالپى كولىكتەردىڭ 3 پايىزى. «قوزعالتقىش كولەمى ۇلكەن كولىكتەردىڭ باعاسى دا قىمبات. بۇل ماشينالاردىڭ يەسى قاراپايىم ادام ەمەسى انىق. سوندىقتان سالىق كولەمىن ۇلعايتۋدان ولاردىڭ قالتاسىنا سالماق تۇسە قويماس» دەيدى مينيستر.
سونىمەن, قوزعالتقىش كولەمى 3-3,2 ليتر اراسىنداعى كولiكتiڭ يەلەرi جىل سايىن 35 ايلىق ەسەپتiك كورسەتكiش كولەمiندە سالىق تولەمەك. قازىر ءبىر ايلىق ەسەپتىك كورسەتكىش – 1731 تەڭگە. دەمەك, بۇل – 60-61 مىڭ تەڭگەنiڭ ار جاق-بەر جاعى. ال قوزعالتقىش كولەمى 3,2-دەن 3,5 تەكشە سانتيمەترگە دەيiنگiلەر 46 ايلىق ەسەپتiك كورسەتكiش, 3,5-تەن 4-كە دەيiنگiلەر 66 ايلىق ەسەپتiك كورسەتكiش كولەمiندە سالىق تولەيدى.
بۇعان دەيىن قىمبات ماشينا ءمىنىپ, ونىڭ سالىعىنان جالتارىپ كەلگەن قۋلار كولىكتەرىن سوعىس ارداگەرلەرى مەن زەينەتكەرلەردىڭ, مۇگەدەكتەردىڭ اتىنا اۋدارىپ كەلگەن. ەندى بۇل قۋلىق تا جۇزەگە اسپايتىن سىڭايلى. سوعىس ارداگەرلەرىنەن باسقالاردىڭ اتىنا جازىلعان كولىكتەرگە جەڭىلدىكتەر الىنىپ تاستالادى دەيدى مينيستر.
قىمبات توقتامۇرات
