استاناداعى ۇلتتىق مۋزەيدە «كورەي حالقىنىڭ ءداستۇرلى ماسكالارى» اتتى كورمە اشىلدى. كورمەنى اتالمىش مۋزەي مەن قازاقستانداعى كورەيا رەسپۋبليكاسىنىڭ ەلشىلىگى بىرلەسىپ ۇيىمداستىردى.
كورمەگە كورەي حالقىنىڭ «حاحۆە بيولسينگۋت تالنوري», «بونسان تالچۋم», «سۋيون يارۋ» جانە باسقا دا تەاترلاندىرىلعان ءداستۇرلى بي قويىلىمدارىندا قولدانىلاتىن ماسكالار قويىلدى.
«بۇل كورمە – قازاقستان رەسپۋبليكاسى ۇلتتىق مۋزەيى مەن كورەيانىڭ قازاقستانداعى ەلشىلىگىنىڭ تىعىز قارىم-قاتىناسىنىڭ ايقىن كورىنىسى. بۇگىنگى كورمە دە كوپشىلىك كوڭىلىنەن شىعىپ, كەلۋشىلەر تاراپىنان وڭ باعاسىن الارىنا سەنەمىن. كورمە ارقىلى كورەي ەلىنىڭ مادەنيەتىمەن, وزىندىك ەرەكشەلىكتەرىمەن جاقىنىراق تانىسۋعا بولادى. بۇگىنگى كورمەنىڭ تاقىرىبى دا ەرەكشە, كورەي حالقىنىڭ تامىرى تەرەڭ تاريحىنان سىر شەرتەدى. الداعى ۋاقىتتا دا تىڭ باستامالاردى بىرلەسە جۇزەگە اسىرىپ, جاڭا كورمەلەرگە جول اشامىز دەگەن نيەتتەمىز» دەدى ۇلتتىق مۋزەي ديرەكتورىنىڭ ورىنباسارى اباي ساتىبالدين.
ماسكالار الەمنىڭ بارلىق جەرىندە بار. ماسكا مادەنيەتىن بارلىق جەردەن كەزدەستىرۋگە بولادى. الايدا ولاردىڭ ءار ەلدە وزىندىك ەرەكشەلىكتەرى بار. باسقا حالىقتاردىڭ ماسكالارىنا قاراعاندا كورەي ماسكالارى ادام كەلبەتىن, مىنەز-قۇلقىن, كوڭىل كۇيىن, سەزىمدەرىن بەينەلەپ, قويىلىمداردا قاراپايىم حالىقتىڭ ءومىرىن ءازىل تۇرىندە كورسەتەدى.
شارانىڭ اشىلۋ سالتاناتىندا ءسوز العان قازاقستانداعى كورەيا رەسپۋبليكاسىنىڭ توتەنشە جانە وكىلەتتى ەلشىسى كيم دە سيك كورمەنىڭ وزىندىك ەرەكشەلىگىنە توقتالدى. «بارلىق ەلدىڭ ەجەلدەن كەلە جاتقان ەرەكشە داستۇرلەرى بولادى. بۇگىن سىزدەر كورەي حالقىنىڭ ءداستۇرلى ماسكا مادەنيەتى جانە ونى دايىنداۋ ءادىستەرىمەن تانىسا الاسىزدار. بۇل ماسكالار ادامداردىڭ ءبىر-بىرىنە دەگەن جىلى لەبىزدەرىن ءبىلدىرىپ, ءبىر-ءبىرىن كۇلدىرىپ, قۋانتۋ ءۇشىن جاسالادى. ماسكالاردا جانۋارلار, وزگە دە تىرشىلىك يەلەرى ەمەس, تەك ادامنىڭ بەينەسىندەگى كۇلكىلى بەينەلەر سۋرەتتەلگەن. ءتۇرلى ماسكالاردى كيىپ, جەرگىلىكتى حالىق مىندەتتى تۇردە ارنايى مادەني شارالار ۇيىمداستىرادى» دەدى.
كورمەگە كورەيلەردىڭ ءداستۇرلى ماسكالارىنىڭ 61 ءتۇرى ۇسىنىلىپ وتىر. بۇل ماسكالار ارقىلى چوسون ديناستياسى كەزەڭىندەگى كورەيا بەينەلەرىن كورۋگە بولادى. كورمە 2018 جىلعى 23 جەلتوقسانعا دەيىن جالعاسادى.
