استانا كۇنى قارساڭىندا «استانا-وپەرا» مەملەكەتتىك وپەرا جانە بالەت تەاترىنىڭ ساحناسىندا پ.چايكوۆسكيدىڭ «ۇيقىداعى ارۋ» بالەتىنىڭ تۇساۋكەسەرى وتەدى.
بالەت پرەمەراسى زامانىمىزدىڭ كورنەكتى بالەتمەيستەرى يۋري گريگوروۆيچتىڭ جاڭا حورەوگرافيالىق وڭدەۋىمەن ۇسىنىلادى. رەسەي حورەوگرافياسىنىڭ حاس شەبەرى «ۇيقىداعى ارۋدى» بۇرىنعى بالەتمەيستەرلەردە ءجيى كەزدەسەتىن تەك بالالار ەرتەگىسى نەمەسە ويىن-ساۋىق فەەرياسى رەتىندە قويمايدى, چايكوۆسكيدىڭ مۋزىكاسىنا سايكەس ءوز كەزەگىندە جاندى رۋحتاندىراتىن پوەما سياقتى ۇسىنادى.
پرەمەراعا دەيىن ساناۋلى كۇندەر قالدى. قازىر تەاتر ساحناسى بەزەندىرىلىپ, اتاقتى بالەتتى قويۋعا قىزۋ دايىندىق جۇمىستارىنا كىرىسكەن. ءحVىى عاسىردا فرانتسيا كورولىنىڭ بيلىگى كەزىندەگى كورىنىستەر كورەرمەندى بەيجاي قالدىرمايتىنداي اسقان تولعانىستى ساتتەرگە تولى. اسەرلى كورىنىستەر مول. مۇنى ءدال وسى كەزدە «استانا-وپەراعا» باس سۇققان ءاربىر ادام تاپ باسىپ تانىر ەدى.
تەاتردا سوڭعى دايىندىقتار جۇرۋدە. يتاليادان استاناعا اكەلىنگەن سالماعى ءتورت توننالىق «التىن جالاتقان» دەكوراتسيالار ورناتۋ اياقتالدى. ال, تەك كورولدىك قورعانداردان تۇراتىن سالماعى بەس ءجۇز كەلى قاقپالاردىڭ ءوزى نەگە تۇرادى؟!
«كوپتەن كۇتكەن قويىلىم بىرنەشە كۇننەن كەيىن باستالادى. اركىمنىڭ كەۋدەسىندە تولعانىس بار ەكەندىگى كورىنەدى. ويتكەنى, تەاتر جاڭا, مۇنداعى مادەني ءومىر دە جاڭادان باستالىپ جاتىر. سوندىقتان, اسقان جاۋاپكەرشىلىك پەن تاجىريبەنىڭ سىنعا تۇسەتىن كەزى» دەپ پىكىرىن ءبىلدىردى قويىلىم سۋرەتشىسى ەتسيو فريدجەريو.
سپەكتاكل ءۇشىن دەكوراتسيانىڭ 25-30 پايىزى قازاقستاندا جاسالدى. قالعانى يتاليادا ازىرلەندى. تاعى ءبىر ايتا كەتەرلىگى, وعان ارلەۋ مەن اجارلاۋشى جانە بوياۋ جونىندەگى ءارتۇرلى تسەحتاردان كوپتەگەن ادامدار قاتىستى. پلاستيك, ارماتۋرا, سۇيىق اينەك سياقتى بىرنەشە ماتەريالدار پايدالانىلدى.
سۋرەتشى-ستسەنوگراف ەتسيو فرەدجيريونىڭ 350 سپەكتاكل قويۋعا بىرگە اتسالىسقان ءوز كومانداسى بار. قازاقستاندا وعان مۇنداعى ماماندارمەن قويان-قولتىق جۇمىس ىستەۋگە تۋرا كەلدى. ءىستىڭ كۇردەلى باستالعانىنا قاراماستان, ناتيجەسى جاقسى شىقتى. بۇل سپەكتاكل بەسىنشى رەت قويىلعالى وتىر. سوندىقتان, ونىڭ ميلانداعى «لا سكالامەن», فرانتسياداعى «پاريج وپەراسىمەن», رەسەيدەگى ۇلكەن تەاترمەن جۇمىس تاجىريبەلەرى ءبىر بيىككە كوتەرەرى ءسوزسىز.
اسحات رايقۇل
