كەشە قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا فرانتسۋز رەسپۋبليكاسىنا ساپارمەن كەلدى.
ساپار بارىسىندا قر مەملەكەتتىك حاتشىسى يۋنەسكو-نىڭ شتاب-پاتەرىندە بولىپ, ۇيىمنىڭ باس ديرەكتورى يرينا بوكوۆامەن كەزدەستى. تاراپتار اڭگىمەلەسۋ بارىسىندا يۋنەسكو مەن قازاقستان اراسىنداعى ىنتىماقتاستىقتىڭ جوعارى دەڭگەيىن, سونداي-اق قازاقستاننىڭ يۋنەسكو-نىڭ مارتەبەلى ماقساتتارى مەن قاعيداتتارىنا دەگەن ۇستانىمىنىڭ وزگەرمەيتىنىن اتاپ ءوتتى.
وعان قوسقان ناقتى ۇلەسى رەتىندە يۋنەسكو اياسىندا قازاقستاننىڭ باستاماشىلىعىمەن مادەنيەتتەردى جاقىنداستىرۋدىڭ 2013-2022 جىلدار كەزەڭىندەگى حالىقارالىق ونجىلدىعىن ىلگەرلەتۋ ەكەنى اتاپ ايتىلدى.
مەملەكەتتىك حاتشى يۋنەسكو جەتەكشىسىنە ءبىلىمدى, عىلىم جانە مادەنيەتتى, گەندەرلىك تەڭدىكتى دامىتۋ ءۇشىن قازاقستان ۇكىمەتى قابىلداپ جاتقان شارالارى تۋرالى اڭگىمەلەدى. بۇل رەتتە ي.بوكوۆا قر پرەزيدەنتى ن.نازارباەۆتىڭ «نۇرلى جول» اتتى جولداۋىنىڭ نەگىزگى ەرەجەلەرىمەن, سونداي-اق قازاقستان حالقى اسسامبلەياسىنىڭ قىزمەتىمەن تانىستى.
يۋنەسكو-نىڭ باس ديرەكتورى قازاقستان باسشىلىعىنىڭ ۇيىمنىڭ الەۋەتىن كەڭەيتۋگە, ونىڭ ىشىندە بىرقاتار باعدارلامالاردى قارجىلاندىرۋعا كورسەتىپ جاتقان قولداۋىن, ەلىمىزدىڭ يۋنەسكو-نىڭ قىزمەتىنە بەلسەنە قاتىسۋىن جوعارى باعالادى.
مادەنيەتتەردى جاقىنداستىرۋدىڭ حالىقارالىق ونجىلدىعى يدەياسىن ودان ءارى ىلگەرلەتۋدەگى قازاقستاننىڭ ءرولىن ايرىقشا اتاپ وتە وتىرىپ, ي.بوكوۆا الداعى وتىرىسىنا ءوزى قاتىسۋدى جوسپارلاپ وتىرعان الەمدىك جانە ءداستۇرلى دىندەر كوشباسشىلارى سەزىنىڭ جاھاندىق كۇن تارتىبىندەگى ماڭىزدى ءرولىن اتاپ كورسەتتى.
نازار اۋدارساق, 2014 جىلعى قاراشادا تۇڭعىش رەت ادامزاتتىڭ ماتەريالدىق ەمەس مادەني مۇراسىنىڭ تانىستىرىمدىلىق تىزىمىنە: دومبىرادا كۇيدى ورىنداۋ ونەرى جانە قازاق, قىرعىز كيىز ءۇيىن دايىنداۋ شەبەرلىگى ەنگىزىلدى. سونىمەن قاتار, دۇنيەجۇزىلىك مۇرالار تىزىمىنە قوجا احمەت ياساۋي ماۆزولەيى, تامعالى ارحەولوگيالىق لاندشافتىنىڭ پەتروگليفتەرى, جىبەك جولى جانە سارىارقا, سونداي-اق سولتۇستىك قازاقستاننىڭ جازىق دالالارى مەن كولدەرى, بيوسفەرالىق قورىقتاردىڭ دۇنيەجۇزىلىك جەلىسىنە قورعالجىن, الاكول, اقجايىق, قاتونقاراعاي ەندى.
گۇلشارا ابدىقالىقوۆا پاريجگە ساپارى اياسىندا سونداي-اق فرانتسيالىق «كامپۋس فرانس» ءبىلىم بەرۋ اگەنتتىگىنىڭ باس ديرەكتورى انتۋان گراسسەنمەن, «پاريج سوربوننا سيتە» ۋنيۆەرسيتەتتەر قاۋىمداستىعىنىڭ پرەزيدەنتى جان-يۆ مەرەندولمەن جانە قوعام قايراتكەرى, «سوربوننا-قازاقستان» ۋنيۆەرسيتەتىن قۇرۋدىڭ باستاماشىسى مارەك حالتەرمەن كەزدەسۋلەر وتكىزدى.
فرانتسيا پرەزيدەنتى فرانسۋا وللاندتىڭ 2014 جىلعى جەلتوقساندا قازاقستانعا جاساعان مەملەكەتتىك ساپارى بارىسىندا قول جەتكىزىلگەن ۋاعدالاستىقتاردى نازارعا الا وتىرىپ, تاراپتار قازاقستان-فرانتسۋز ستراتەگيالىق سەرىكتەستىگىنىڭ باسىمدىقتارىنىڭ ءبىرى بولىپ تابىلاتىن ۋنيۆەرسيتەتارالىق ىنتىماقتاستىقتىڭ اعىمداعى جاي-كۇيى مەن كەلەشەگىن ەگجەي-تەگجەيلى تالقىلادى.
اتاپ ايتساق, كەزدەسۋدە ورتالىق ازيا وڭىرىندەگى فرانتسۋزدىق العاشقى جوعارى وقۋ ورنى – «سوربوننا-قازاقستان» ۋنيۆەرسيتەتىنىڭ قىزمەتىنىڭ ماسەلەلەرى قارالدى. سونداي-اق ۇستىمىزدەگى جىلى ەكى ەلدىڭ جەتەكشى جوعارى وقۋ ورىندارى باسشىلارىنىڭ قاتىسۋىمەن پاريجدە نەمەسە استانادا ۋنيۆەرسيتەتارالىق فورۋمدى ۇيىمداستىرۋ تۋرالى ۋاعدالاستىققا قول جەتكىزىلدى.
سول كۇنى قورقىت اتا كىتابىنىڭ العاشقى شىعارىلىمىنىڭ 200 جىلدىعىنا, سونداي-اق يۋنەسكو-نىڭ 70 جىلدىعىنا وراي حالىقارالىق تۇركى اكادەمياسى قازاقستان, ازەربايجان, تۇركيا جانە تۇركىمەنستاننىڭ يۋنەسكو جانىنداعى تۇراقتى وكىلدىكتەرىمەن بىرلەسىپ سالتاناتتى ءىس-شارا ۇيىمداستىرىپ, وعان ۇيىم حاتشىلىعىنىڭ, فرانتسۋز قوعامىنىڭ, ديپلوماتيالىق كورپۋستىڭ, قازاق دياسپوراسىنىڭ وكىلدەرى, سونداي-اق رەسمي دەلەگاتسيالار, عالىمدار, تۇركىتىلدەس ەلدەردىڭ مادەنيەت جانە ونەر قايراتكەرلەرى قاتىستى. اتالعان ءىس-شارا بارىسىندا قازاق ۇلتتىق ونەر ۋنيۆەرسيتەتىنىڭ سيمفونيالىق وركەسترى قورقىتتىڭ بەلگىلى تۋىندىلارىن ۇسىندى.
ءىس-شارانىڭ اشىلۋىندا سويلەگەن سوزىندە گ.ابدىقالىقوۆا قورقىت بەينەسى ەۋرازيانىڭ بۇكىل كەڭىستىگىندەگى تۇركى حالىقتارىنىڭ مادەني جانە رۋحاني داستۇرلەرى ءۇشىن التىن كوپىرگە بولىپ تابىلاتىنىن اتاپ ءوتتى. ول سونداي-اق, «قورقىت اتا كىتابى» تۇركى حالىقتارىنىڭ مۇراسى عانا ەمەس, بارشا ادامزاتتىڭ يگىلىگى ەكەنىن ايتتى.
قازاقستان رەسپۋبليكاسىنىڭ مەملەكەتتىك حاتشىسى ءىس-شارانىڭ وسىنداي جوعارى دەڭگەيدە وتكىزىلۋىنە جاردەمدەسكەنى ءۇشىن يۋنەسكو-عا العىسىن ءبىلدىرىپ, يۋنەسكو بۇكىل الەمنىڭ مادەنيەتتەرى اراسىنداعى بايلانىستىرۋشى بۋىن بولىپ تابىلاتىنىن اتاپ ءوتتى.
قر ءسىم ءباسپاسوز قىزمەتى
