مەرەكە قارساڭىندا مەديتسينا قىزمەتكەرلەرى, مۇعالىمدەر مەن جۇرگىزۋشىلەر مەملەكەتتىك ناگرادالارمەن ماراپاتتالدى. نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا ەل تاۋەلسىزدىگىنىڭ 30 جىلدىعىنا وراي سالا ماماندارى ماراپاتتالعانىن ءمالىم ەتتى.
«ادامي كاپيتال – باستى قۇندىلىق. قالاعا قاراستى بارلىق ۇيىمداردىڭ ۇيلەسىمدى جۇمىسىنىڭ ناتيجەسىندە قالانىڭ تىنىس-تىرشىلىگى قامتاماسىز ەتىلەدى. ءار قىزمەتكەر قالانىڭ ودان ءارى دامۋىنا ۇلەسىن قوسادى. ەل تاۋەلسىزدىگىنىڭ 30 جىلدىعىنا وراي مەديتسينا قىزمەتكەرلەرى, الەۋمەتتىك قىزمەتكەرلەر, پەداگوگتار, ينجەنەرلەر, ماشينيستەر جانە ت. ب. مەملەكەتتىك ناگرادالارعا يە بولدى.
«پاراسات» وردەنىمەن مۇعالىم ل.اليەۆا, «ەرەن ەڭبەگى ءۇشىن» مەدالىمەن ۋچاسكەلىك دارىگەر-تەراپەۆت گ.قاليبەكوۆا, ەڭبەك ارداگەرى ب.قاسىمبەكوۆ, جازۋشى و.تۇرجان, «شاپاعات» مەدالىمەن جەدەل مەديتسينالىق جاردەم جۇرگىزۋشىسى ت.ۆەرگۋنوۆا جانە بىرقاتار مەديتسينا قىزمەتكەرى ماراپاتتالدى. سونداي-اق مادەنيەت قايراتكەرلەرى «قازاقستاننىڭ ەڭبەك سىڭىرگەن قايراتكەرى» اتاعىن الدى» دەپ جازدى ەلوردا اكىمى.
سونىمەن قاتار ءىىى دارەجەلى «ەڭبەك داڭقى» وردەنىمەن «استانا سۋ ارناسى» مەكەمەسىنىڭ ينجەنەر-جىلۋتەحنيگى م.ابدراحمانوۆ, №1 اۆتوپارك جۇرگىزۋشىسى ك.نابيەۆ, 2-جەو اعا ءماشينيسى ر.تۋحۆاتۋللين, «استانا تازالىق» اق جۇرگىزۋشىسى ن.قۋانىشەۆ, «استانا قالالىق جارىق» اق اۆتوەلەكتريگى يۋ.چەحكو ماراپاتتالدى. سونداي-اق قالا مەن ەلدىڭ قالىپتاسۋى مەن دامۋىنا ۇلەس قوسقاندار ءىىى دارەجەلى «بارىس» وردەنىمەن, قر قۇرمەت گراموتالارىمەن ماراپاتتالدى.
