مەملەكەتتىك تىلگە ءمان بەرەمىز
مەملەكەت باسشىسىنىڭ تاپسىرماسىنا سايكەس, ادىلەت دەپارتامەنتى حالىققا قۇقىقتىق سالا بويىنشا جوعارى دەڭگەيدە زاڭگەرلىك قىزمەت كورسەتىپ كەلەدى. بۇگىندە دەپارتامەنتتە بارلىق قۇجات مەملەكەتتىك تىلدە جۇرگىزىلەدى.
حالىقتىڭ زاڭى ءبىلىم الىپ, جالپى قۇقىقتىق مادەنيەتتى قالىپتاستىرۋىندا ءتىلدىڭ قولدانىس اياسىن كەڭەيتۋ – وزەكتى ماسەلە. ويتكەنى, قوعامنىڭ ودان ءارى وركەندەپ دامۋىنا, اسىرەسە جاستاردىڭ قۇقىقتىق ساۋاتىن اشۋدا, كوزقاراسىن قالىپتاستىرۋدا ونىڭ ماڭىزى زور. «قازاقستان رەسپۋبليكاسىنداعى ءتىل تۋرالى» زاڭ مەن تىلدەردى قولدانۋ مەن دامىتۋدىڭ 2001-2010 جىلدارعا ارنالعان مەملەكەتتىك باعدارلاماسىنا ساي قىزمەتكەرلەردىڭ مەملەكەتتىك ءتىلدى جەتىك مەڭگەرۋىنە ايرىقشا كوڭىل بولىنگەن.
قازاق ءتىلىنىڭ ءورىسىن كەڭەيتۋدە تەك وقۋ كۋرستارىن اشۋ جەتكىلىكسىز. سوندىقتان ادىلەت دەپارتامەنتى ءتىلدىڭ اياسىن كەڭەيتۋگە ارنالعان ءتۇرلى سايىستار وتكىزۋدى داستۇرگە اينالدىردى. سونداي-اق, وقىتۋ ساپاسىن ارتتىرىپ, ادىستەمەلىك قۇرالداردى جەتىلدىرۋگە جەتە ءمان بەرىلەدى جانە ماماندار مەن اۋدارماشىلاردىڭ ءتۇرلى تاقىرىپتىق, سالالىق سەمينارلارى مەن عىلىمي-پراكتيكالىق كونفەرەنتسيالارى ۇيىمداستىرىلادى. مەملەكەتتىك ءتىلدى ءىس قۇجاتتارىنا ەنگىزۋ ماقساتىندا مەملەكەتتىك قىزمەتشىلەردى وقىتۋ ماسەلەسى بۇگىنگى تاڭدا جۇيەلى ارناعا ءتۇستى.
وزگە ۇلت جاستارىنىڭ مەملەكەتتىك تىلگە دەگەن ىنتاسى جىل سايىن ارتا تۇسكەنىن ايتۋىمىز كەرەك. «ءتىل تۋرالى» زاڭنىڭ 4-بابىندا «قازاقستان حالقىن توپتاستىرۋدىڭ اسا ماڭىزدى فاكتورى بولىپ تابىلاتىن مەملەكەتتىك ءتىلدى مەڭگەرۋ – قازاقستان رەسپۋبليكاسىنىڭ ءاربىر ازاماتىنىڭ پارىزى…» دەلىنگەن. قازاق ەلىنىڭ تاۋەلسىزدىگىنىڭ رۋحاني تىرەگى – قازاق ءتىلىنىڭ دە تاۋەلسىز, ەركىن قولدانىسىن قامتاماسىز ەتۋى ءتيىس. بۇل باعىتتا اتقاراتىن شارالار بارشىلىق. سەبەبى, قازاق ءتىلى – ءبىر ۇلتتىڭ نەمەسە ءبىر توپتىڭ ءتىلى ەمەس, بارشا قازاقستاندىقتاردىڭ ءتىلى.
كاميلا حايرۋلينا,
قۇقىقتىق ءتۇسىندىرۋ جانە حالىققا
زاڭگەرلىك كومەك كورسەتۋ ءبولىمىنىڭ
ءىس جۇرگىزۋ ينسپەكتورى