ق.قۋانىشباەۆ اتىنداعى قازاق تەاترىندا №2 بالالار مۋزىكا مەكتەبىنىڭ «شالقىسىن اسقاق اۋەنىم» اتتى جىلدىق ەسەپ بەرۋ كونتسەرتى ءوتتى.
قازاق كومپوزيتورلارىنىڭ شىعارمالارىن, كلاسسيكالىق مۋزىكا جاۋھارلارىن قۇلاق قۇرىشىڭدى قاندىرىپ, ناقىشىنا كەلتىرىپ, ءمىنسىز ورىندايتىن ءبۇلدىرشىن بۋىننىڭ ءوسىپ كەلە جاتقانىن پاش ەتكەن بۇل كەش كەنجەبەك كۇمىسبەكوۆتىڭ «ءبيشى قايىڭىمەن» باستالدى.
بۇل شارا مادەني مۇرالارىمىزدى ساندىق جاعىنان دا, ساپالىق جاعىنان دا ۇلىقتادى دەسەك ارتىق ايتقاندىق ەمەس.
مۋزىكانىڭ ءمولدىر الەمىنە تارتىپ اكەتكەن كونتسەرتتە مەكتەپتىڭ وقۋشىلارى راسۋل رامازان مەن ايعانىم نۇرلان احمەت جۇبانوۆتىڭ «قارلىعاشىن» توگىلتە ورىندادى. كىپ-كىشكەنتاي قوس بالدىرعاننىڭ ورىنداۋىنداعى قوبىز ءۇنى جينالعان كوپشىلىكتىڭ كوڭىلىن جادىراتتى. ال سوفيا سماعۇلوۆا پ.چايكوۆسكيدىڭ «جاڭا قۋىرشاعىن» تيتىمدەي نازىك ساۋساقتارىمەن سۇلۋ نوتالار ارقىلى سىڭعىر-سىڭعىر توكتى.
ءدال وسىنداي لەپپەن مەكتەپ وقۋشىسى باتىرحان سابيروۆ ماحامبەتتىڭ «جۇمىر-قىلىشىن» ورىندادى. تالاپكەر ورەندەردىڭ كورسەتكەن ونەرلەرىن كاسىپقوي مۋزىكا ماماندارىنىڭ ءوزى ۇيىپ تىڭداپ, تىڭداۋشىسىن رۋحتاندىرا شالىقتاعان شىعارماعا رياسىز قوشەمەت ءبىلدىرىپ وتىردى.
مەكتەپ ديرەكتورى فاريزا جۇماباەۆانىڭ ايتۋىنشا, مۇندا تالانتتى بالالار ونەرىن ۇشتايدى. شەتىنەن رەسپۋبليكالىق, حالىقارالىق بايقاۋلاردىڭ بايگەسىن قانجىعاسىنا بايلاعاندار. ولارعا ساباق بەرەتىن ۇستازدار قاۋىمىنىڭ ەڭبەگى ەرەن. وسى رەتتە ءبىلىم باسقارماسىنىڭ ادىسكەرى قۇرالاي بالعابايقىزى مەكتەپتىڭ بىرقاتار مۇعالىمدەرىن ارنايى ديپلوممەن, ەستەلىك سىيلىقتارمەن ماراپاتتادى.
گۇلجان راحمان
