ەل مۇسىلماندارىنىڭ قارا شاڭىراعى – قازاقستان مۇسىلماندارى ءدىني باسقارماسى قايىرىمدىلىق شارالارىنا ۇلكەن ماڭىز بەرىپ كەلەدى.
يگى داستۇرگە اينالعان بۇل اكتسيا باس قالادا تۇراتىن الەۋمەتتىك تۇرمىس-احۋالى تومەن وتباسى بالالارىنا ۇلكەن قۋانىش سىيلادى. شاراعا قمدب نايب ءمۇفتيى, «نۇر استانا» ورتالىق مەشىتىنىڭ باس يمامى ناۋرىزباي قاجى تاعانۇلى, اقساقالدار كەڭەسىنىڭ مۇشەسى ومىرزاق وزعانباەۆ, استانا قالاسى اكىمدىگى ءبىلىم باسقارماسىنىڭ باس مامانى توقتاش ابساعاتۇلى قاتىسىپ, وقۋشىلارعا وقۋدا وزات بولىپ, ءبىلىم جولىندا جەتىستىكتەرگە جەتە بەرۋگە تىلەكتەستىك ءبىلدىردى.
«ءبىلىم – سىزدەردىڭ جانە ەلىمىزدىڭ جارقىن بولاشاعىنىڭ التىن كىلتى. وسى جولدا تالماي-تىنباي ءبىلىم الۋ – سىزدەردىڭ باستى مىندەتتەرىڭىز. قاسيەتتى قۇراندا بىلىمدىلەردىڭ دارەجەسى جوعارى, مارتەبەسى بيىك بولاتىنى اشىق باياندالعان. حالقىمىز دا ءبىلىمدى «ءومىر شىراعى» دەپ تانىعان. اتا-انالارىڭىزدىڭ ۇكىلەگەن ءۇمىتىن, سۇيىكتى وتانىمىزدىڭ سەنىمىن اقتاپ, ءبىلىمدى بولۋعا ۇمتىلىڭىزدار. جاڭا وقۋ جىلى قۇتتى, بەرەكەلى بولسىن!» دەدى قمدب نايب ءمۇفتيى ناۋرىزباي قاجى تاعانۇلى.
يگى شارا اياسىندا 200 وقۋشى وقۋ قۇرال-جابدىقتارىنا, سونداي-اق مەكتەپ فورماسىنا قاجەتتى قاراجاتقا يە بولدى. جىل سايىنعى وقۋ ماۋسىمىنا دايىندىق جاساۋعا مۇمكىندىكتەرى شەكتەۋلى جاندارعا, كوپبالالى وتباسىلارعا, اتا-اناسىنىڭ قامقورلىعىنسىز قالعان بالالارعا دەمەۋ بولۋ ماقساتىندا ۇيىمداستىرىلعان اكتسيا رەسپۋبليكا كولەمىندە, وبلىس, اۋدان, ايماقتاردا دا وتكىزىلمەك.
