نۇربەك اچيلوۆ, «عالىمداردىڭ ەۋرازيالىق ەكونوميكالىق كلۋبى» قاۋىمداستىعى توراعاسىنىڭ ورىنباسارى: بيىلعى فورۋمنىڭ الەۋەتى الدىڭعىلارىنان ارتىق بولادى
وسى ايدىڭ اياعىن الا V استانا ەكونوميكالىق فورۋمى وتەتىنى بەلگىلى. اتالعان شاراعا بيىل دا الەمدىك قاۋىمداستىق تاراپىنان قىزىعۋشىلىق مول ەكەنى بايقالادى. ۇيىمداستىرۋشىلاردىڭ رەسمي مالىمدەمەلەرىنە سۇيەنسەك, قازىردىڭ وزىندە فورۋمعا قاتىسۋعا 90-عا جۋىق مەملەكەتتەن 7500-نان استام قاتىسۋشى تىركەلگەن ەكەن. ال, تىرەۋ جۇمىستارى ءالى دە جالعاسىپ جاتقانىن ەسكەرەر بولساق, قاتىسۋشىلار سانىنىڭ بۇدان دا كوپ بولۋى مۇمكىن.
وسى ورايدا, وسىنشا ءدۇيىم جۇرت, اناۋ-مىناۋ ەمەس, دۇنيە ىسكەرلىگى مەن عىلىمىنىڭ كورنەكتى وكىلدەرى نەندەي ماقساتتا جينالماق, نەنى تالقىلاماق. وسى ماقساتتا, استانالىق ەكونوميكالىق فورۋمدى وتۋىنە مۇرىندىق بولىپ جۇرگەن, قاتارىندا روبەرت ماندەلل, روبەرت اۋمانن, فينن كيدلاند, دجون نەش, ەريك ماسكين, سەر دجەيمس ميررليس, رودجەر كورنبەرگ, ەدمۋند فلەپس سىندى ەكونوميكا سالاسى بويىنشا نوبەل سىيلىعىنىڭ لاۋرەاتتارى بار «عالىمداردىڭ ەۋرازيالىق ەكونوميكالىق كلۋبى» قاۋىمداستىعى توراعاسىنىڭ ورىنباسارى نۇربەك اچيلوۆقا كەزەكتى جەدەل ساۋالدارىمىزدى جولدادىق.
– الداعى فورۋمنىڭ كۇن تارتىبىنە قويىلىپ وتىرعان نەگىزگى ماسەلە قانداي؟
– ول ماسەلە ادەتتەگىدەي, الەمنىڭ جيىرما جەتەكشى ەكونوميكاسى سانالاتىن مەملەكەت باسشىلارىنا فورۋم قورىتىسىندى بويىنشا «G-20 ۇسىنىستار» قۇجاتىمىزدى جولداۋ. ال, ونىڭ اياسىندا قانداي ماسەلەلەر قامتىلادى دەسەڭىز, ايتالىق. وندا, ەلباسى باستاماسى بويىنشا قۇرىلعان استانا ەكونوميكالىق فورۋمى اياسىندا «G-global» كوممۋنيكاتسيالىق الاڭدارى شەڭبەرىندە تالقىلاناتىن جەرگىلىكتى ەكونوميكالىق تۇيتكىلدەردەن باستاپ, الەمدىك بالامالى ۆاليۋتا قابىلداۋعا دەيىنگى ۇسىنىستار بەرىلەدى. قازىردىڭ وزىندە اتالعان قۇجات اياسىندا تالقىلاۋعا 70 ۇسىنىس ءتۇسىپ وتىر. ولار كەمبريدج, وكسفورد, يەل ۋنيۆەرسيەتتەرىنەن, ماد-ريد كلۋبى سەكىلدى بەدەلدى حالىقارالىق ۇيىمداردان.
– اتالعان الاڭدا كۇللىالەمدىك تۇيتكىلدەردى تالقىلاۋدان باسقا, جەرگىلىكتى ماسشتابتاعى ماسەلەرگە قاتىستى قانداي شارالار وتپەك؟
– جالپى, جاڭا سەسسيالار قازىردىڭ وزىندە قوسىلىپ جاتىر. ال, ودان بولەك ايتار بولساق, عىلىمي تۇرعىدا, مىسالى, فورۋمعا شاقىرىلعان نوبەل لاۋرەاتتارىنىڭ دارىستەرىن وقىتۋدى ۇيىمداستىرۋدى جوسپارلاپ وتىرمىز. وسى جەردە ايتا كەتەتىن ءبىر ماسەلە, بيىل اتالعان دارىستەر سانىن 30 ۋنيۆەرسيتەتكە دەيىن ارتتىردىق.
ال, ىسكەرلىك تۇرعىدان ايتار بولساق, قازىردىڭ وزىندە, سەسسيالاردا جاسالاتىن مەموراندۋمداردان بولەك, ارنايى الاڭدا 38 مەموراندۋمعا قول قويىلادى دەپ جوسپارلاپ وتىرمىز. سولاردىڭ ىشىندە, ماسەلەن, ەۋروپالىق قايتا قۇرۋ جانە دامۋ بانكى مەن ماڭعىستاۋ وبلىسى اكىمشىلىگى اراسىندا كوممۋنالدى شارۋاشىلىقتى جاڭعىرتۋ جونىندەگى مەموراندۋم جاسالماق.
-ال, وسىعان دەيىنگى فورۋمداردا سونىلىعى تۇرعىسىنان ورىن الماعان باستاما بولا ما؟
– يا, ونداي باستامانى دا كوتەرگىمىز كەلىپ وتىر. ول – استانا ەكونوميكالىق فورۋمىنىڭ گلوبالدى ۆەنچۋرلى قورىن قۇرۋ. اتالعان قوردى قۇرۋداعى ماقسات, عىلىمي باستامالاردىڭ قارجىلاي قولداۋعا باعىتتالاتىن بولادى. قازىردىڭ وزىندە, ساراپشىلارىمىزدىڭ بولجاۋى بويىنشا, وسى جولدىڭ وزىندە شەتەلدىك جانە وتاندىق ينۆەستورلاردىڭ ارقاسىندا قورعا 5 ملن دوللارداي قارجى جينالادى دەپ بولجانۋدا. البەتتە, ودان دا كوپ بولۋى مۇمكىن. جالپى, بيىلعى فورۋمنىڭ الەۋەتى الدىڭعىلارىنان ارتىق بولادى دەپ كۇتۋدەمىز.
-اڭگىمەڭىزگە راحمەت!
نۇربەرگەن ماقىم
