بەيسەنبى كۇنى وقۋشىلار سارايىندا قالالىق «مەرەيلى وتباسى» ۇلتتىق كونكۋرسىنىڭ جەڭىمپازدارى ماراپاتتالدى.
بۇل تاماشا بايقاۋ ەلباسىنىڭ باستاماسىمەن وسىدان بەس جىل بۇرىن قولعا الىنعان بولاتىن. سودان بەرى سايىس بارلىق وڭىردە وتەتىن داستۇرگە اينالدى. ايتۋلى شارانىڭ بابادان جالعاسقان وتباسىلىق قۇندىلىقتىڭ قادىرىن ارداقتاۋعا قوسار ۇلەسى مول.
بيىلعى بايقاۋعا ەلوردادان 51 وتباسى باق سىنادى. ولاردىڭ قاتارىندا كوپ بالالى وتباسىلار, دارىگەرلەر, ۇستازدار, ونەرپازدار, سپورتشىلار, اسكەريلەر جانە كاسىپكەرلەر اۋلەتى بولدى. جۇلدەگەرلەردى ارنايى كوميسسيا مۇشەلەرى انىقتادى. كونكۋرستىڭ قورىتىندىسى بويىنشا ءۇشىنشى ورىن ەكى وتباسىعا بەرىلدى. ولار – وتەۋىلەۆتەر جانە ۇدەرباەۆتار. جۇرتشىلىققا وتەۋىلەۆ دەگەن فاميليا جاقسى تانىس. بۇل – باس شاھارداعى ق.قۋانىشباەۆ اتىنداعى قازاق
تەاترىنىڭ بەلدى اكتەرى نۇركەن وتەۋىلەۆتىڭ اۋلەتى. ونىڭ زايىبى اينۇر دا تاماشا اكتريسا. ەكەۋى دە قاللەكي تەاترىندا جۇمىس ىستەيدى. ولاردىڭ بەيبارىس, اقارىس دەگەن ونەرلى ەكى ۇلى بار. كينو سالاسىنا تالپىنىپ جۇرگەن جەتكىنشەكتەر. قازىردىڭ وزىندە اقارىس كينوتەاترلارداعى مۋلتفيلمدەرگە قازاقشا
دۋبلياج جاسايدى. ال ۇدەرباەۆتار شاڭىراعىنىڭ وتاعاسى – اسكەري سالانىڭ مامانى. ءتارتىپتى جاقسى كورەدى. جۇبايى ەكەۋى – ۇل مەن قىز ءوسىرىپ وتىرعان بەرەكەلى اۋلەت.
ەكىنشى ورىندى ۇستازدىق جولدى مۇرات ەتكەن سمايىلوۆتار مەن كوپ بالالى ايتقاليەۆتەر وتباسى يەلەندى. بۇل قوس اۋلەتكە العىس حات پەن اقشالى سەرتيفيكاتتى قالالىق ارداگەرلەر كەڭەسىنىڭ توراعاسى سانسىزباي ەسىلوۆ تاپسىردى.
ال بايقاۋدىڭ باس جۇلدەسىن اسكەري وتباسى باۋبەرىكوۆتەر مەن دارىگەرلەر اۋلەتى ەرەكەشەۆتەر جەڭىپ الدى.
قۇداي بەرگەن ءتورت بالا تاربيەلەپ وتىرعان عاني جانە اسەل باۋبەرىكوۆتەر – اسكەري ماماندار. شاڭىراقتىڭ وتاعاسى عاني رەسەيدە ءۇش جىل وقۋعا بارعاندا وزىمەن بىرگە وتباسىن الىپ كەتكەن ەكەن. بالالارى ماسكەۋدەگى مەكتەپتە ءبىلىم العان. سوندا جۇرگەندە قاتارلاستارىنان وزىق شىعىپ, «رەسەي بىلگىشتەرى» سايىسىندا توپ جارعان. قازىر دە ول جەتكىنشەكتەردىڭ وقۋ وليمپيادالارىنان قانجىعالارى بوس قايتقان ەمەس. باۋبەرىكوۆتەرمەن بىرگە بايقاۋدا اسىعى الشىسىنان تۇسكەن ەرەكەشەۆتەر اۋلەتىنىڭ تىرەگى اسىلبەك – شاھارداعى №1 پەريناتالدىق ورتالىقتىڭ حيرۋرگى. جۇبايى مانيرا دا اق حالاتتى ابزال جان. ەكەۋى الماتىداعى مەديتسينا ۋنيۆەرسيتەتى قابىرعاسىندا تانىسىپ, وتاۋ قۇرعان. ولاردىڭ ۇلكەن ۇلى ايان بۇگىندە اكە-شەشەسىنىڭ جولىن قۋىپ, س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىندە وقيدى. بۇل جەڭىمپاز وتباسىلارعا العىس حات پەن قارجىلاي سەرتيفيكاتتى پارلامەنت ءماجىلىسىنىڭ دەپۋتاتى, اۋعان سوعىسىنىڭ ارداگەرى باقىتبەك سماعۇل
تابىس ەتتى.
ۇزدىك شىققان ەكى وتباسى قىركۇيەك ايىندا وتەتىن رەسپۋبليكالىق كونكۋرسقا جولداما الدى.
