مادەنيەت جانە سپورت ءمينيسترى ارىستانبەك مۇحامەديۇلى رەسەيدەگى «گولوس. دەتي» فينالىندا ءان شىرقاپ, ەكىنشى ورىن العان جاس ورەن ەرجان ماكسيم جانە ونىڭ اناسى گۇلميرا الىبەكپەن كەزدەستى. مينيستر ەرجاندى ايتۋلى جوبادا تابىستى ونەر كورسەتۋىمەن قۇتتىقتادى.
– قازىر ەلىمىزدە ونەرلى جاستارىمىز كوپ. جۋىردا اقش-تاعى «The World’s Best» بايقاۋىندا دانەليا تولەشوۆا جاقسى ونەر كورسەتىپ, ديماش قۇدايبەرگەن فينالعا شىعىپ, ءوز جولىن دانەلياعا بەردى. ەندى سولاردىڭ ءىزىن قۋىپ شىققان ەرجان رەسەيدەگى ۇلكەن بايقاۋدا جوعارى ورىن يەلەنىپ وتىر. بۇل – ۇلكەن جەتىستىك. سوندىقتان جاس تالانتقا ساتتىلىك تىلەيمىن, – دەدى ول.
ەرجان كىشكەنتاي كۇنىنەن ءان ايتا باستاعان. بەس جاسىندا «بالداۋرەن» بايقاۋىنا قاتىسىپ, جۇلدەلى ورىن العان. وسىدان ونىڭ ساحناداعى جولى باستالدى. جەتى جاسىندا ماسكەۋدە وتكەن «بەگۋششايا پو ۆولنام» كونكۋرسىندا كورەرمەندەردىڭ ىستىق ىقىلاسىنا بولەنگەن. قازىر ول كوپتەگەن رەسپۋبليكالىق, حالىقارالىق بايقاۋلاردىڭ جەڭىمپازى اتانىپ ۇلگەردى. ايتپاقشى, ەرجاننىڭ اتاسىنىڭ اتى ماقسىم ەكەن. تەك قۇجات بويىنشا ماقسىم ماكسيم بولىپ جازىلىپ كەتىپتى. ونىڭ ءوزى: «ديماش اعامداي بولسام» دەپ ارماندايدى. جاس ءانشىنىڭ اناسى گۇلميرا دا بالاسىنا قولداۋ بىلدىرگەن بارشا جۇرتشىلىققا ىزگى لەبىزىن جەتكىزدى. كەزدەسۋ سوڭىندا مادەنيەت جانە سپورت ءمينيسترى ەرجانعا ەلورداداعى قازاق ۇلتتىق ونەر ۋنيۆەرسيتەتىندە تەگىن وقۋ گرانتىن تاپسىردى.
