كونگرەسس-حولدا «كومەك» الەۋمەتتىك جاردەم بەرۋ» ورتالىعىن قولداۋ ماقساتىندا قايىرىمدىلىق كونتسەرتى ءوتتى.
مۇمكىندىگى شەكتەۋلى جانداردى قولداۋعا ارنالعان شارانى ۇيىمداستىرۋشىلار – استانا قالاسىنىڭ مادەنيەت باسقارماسى, «جاس نۇر» ساڭىراۋلار اسسوتسياتسياسى جانە «اشىق جۇرەك» باستاماشى توبى. كونتسەرتكە قازاقستاننىڭ ەڭبەك سىڭىرگەن قايراتكەرى ەرلان كوكەەۆ باستاعان ەسترادا جۇلدىزدارى, رەسپۋبليكالىق جانە حالىقارالىق بايقاۋلاردىڭ جۇلدەگەرلەرى – بۇلبۇل كومەي, جەز تاڭداي انشىلەر قاتىستى. ارباعا تاڭىلسا دا ساعى سىنباعان, اسقاق رۋحتى جاندار اۋەلەتىپ ءان سالىپ, ءتۇرلى ونەرلەرىمەن جۇرتتى ءتانتى ەتكەندە اقىن مۇحتار شاحانوۆتىڭ:
«ادام ماڭگى ءتان ساۋلىعىن اڭساعان,
بىرەۋگە اياق, ال بىرەۋگە قول قايعى.
ءوز بورىشىن سەزىنۋدەن قالسا ادام,
ودان اسقان مۇگەدەكتىك بولمايدى» دەگەن ولەڭ جولدارى ەرىكسىز ەسكە ورالدى.
قازىر نە كوپ – جارقىل دا جۇرقىل شوۋ جانە ونى تاماشالايتىن جۇرت كوپ. ءوزىمىز دە تالاي سول كەشتەرگە قىزىق قۋىپ, قىدىرىپ بارىپ جۇردىك. ونداي كەزدە اينالاداعى ادامداردىڭ دا نە ماقساتپەن جۇرگەنىن تولىق بولماسا دا توپشىلايسىڭ. ال بۇل كەشتىڭ ءار ادامى اياۋلى, ءار قوناعى قاستەرلى. سەبەبى, ولار كونتسەرت بيلەتىنەن تۇسكەن ازداعان اقشالارىنىڭ قانداي يگىلىككە جۇمسالاتىنىن بىلەدى. «كوپ تۇكىرسە – كول» دەگەن قاعيدانى ۇستانىپ, قايىرىمدىلىقتان شەت قالماعان جاميعاتقا قانداي ساۋاپ جازىلاتىنىن قاسيەتتى كىتاپتاردان دايەكسوز كەلتىرىپ, ايتىپ جاتۋ ارتىق شىعار.
ىرىسبەك دابەي
