استاناداعى بەيبىتشىلىك جانە كەلىسىم سارايىندا «قاناتتىلار» ينكليۋزيۆتى تەاترى ساحنالاعان «قىزجىلاعان» قويىلىمى كورەرمەنىمەن قايتا قاۋىشتى. مۇمكىندىگى شەكتەۋلى جانداردىڭ حالىقارالىق كۇنىنە وراي قويىلعان سپەكتاكلگە كەلگەندەردىڭ دەنى كوپ.
جازۋشى-دراماتۋرگ روزا مۇقانوۆانىڭ «ماڭگىلىك بالا بەينەسى» شىعارماسىنا نەگىزدەلگەن قويىلىم سەمەي يادرولىق پوليگونىنان جەتىلمەي قالعان قىز تاعدىرىن كورسەتەدى. باس كەيىپكەر – ءلايلانىڭ بەينەسى ارقىلى ەكولوگيالىق اپات سالدارىنان ءبىر عانا قىزدىڭ تاعدىرى ەمەس, تۇتاس ۇلتتىڭ قاسىرەتى سىر شەرتەدى.
قويىلىم اۆتورىنىڭ ايتۋىنشا, تۋىندىنىڭ دۇنيەگە كەلۋىنە 1987 جىلى «نەۆادا-سەمەي» قوزعالىسىنا قاتىستى ۇيىمداستىرىلعان فوتوكورمە سەبەپ بولدى. جازۋشى باس كەيىپكەردىڭ ءپروتوتيپى – ەڭلىكتىڭ سۋرەتىن كورىپ, اۋەلى اڭگىمە جازدى. ودان كەيىن شىعارما م.اۋەزوۆ اتىنداعى دراما تەاترىندا كورسەتىلدى. كينورەجيسسەر ساتىبالدى نارىمبەتوۆتىڭ باستاماسىمەن «قىز جىلاعان» كوركەم ءفيلمى ءتۇسىرىلدى. قۋىرشاق تەاترىندا قۋىرشاققا اينالدى. شىعارمانىڭ جالپى تاريحى جيىرما جىلدان اسادى.
«تەاتردىڭ جەڭىسى – كورەرمەننىڭ جاقسى قابىلداۋى, قاۋمالاپ رەجيسسەردى قۇشاقتاۋى, دراماتۋرگكە العىس ايتۋى. «قاناتتىلار» تەاترى بۇل جەڭىسكە جەتتى. قوعامنىڭ ءبىر بولشەگى – مۇمكىندىگى شەكتەۋلى جانداردىڭ مۇمكىندىكتەرى شەكسىز ەكەنىن كورسەتە ءبىلدى. ەكولوگيا اپاتى – ۇلت قاسىرەتى. بۇل تاۋقىمەتتەن قاراۋىلدا تۇراتىن ءبىر اۋىل ايەلدەرى جاپا شەكتى. «قىزجىلاعان» – الىنبايتىن قامالدىڭ جوعىن, ارمان-ماقساتقا جەتۋدەگى ۇمتىلىستىڭ, كۇرەستىڭ, تازالىقتىڭ سيمۆولى» دەدى قالامگەر ر.مۇقانوۆا.
سپەكتاكلدىڭ قويۋشى رەجيسسەرى ابزالبەك اسحاتۇلى ەرەكشە جانداردىڭ ونەر كورسەتۋىنە ەشقانداي كەدەرگى بولماۋى كەرەگىن ءارى وسى جاندارمەن جۇمىس ىستەپ, ەرەكشە ءلاززات العانىن جەتكىزدى.
– بۇل تەاتردا اۆتور دا, رەجيسسەر دە, ورىنداۋشىلار دا ءبىر-ءبىرىن تاپقانداي. اسىرەسە باستى رولدەگى ماليكا مۇحتاروۆانىڭ سومداعان بەينەسى ءوزىنىڭ تاعدىرىنا, ىشكى ەنەرگەتيكاسىنا, جان تەبىرەنىسىنە جازىلعانداي.
سپەكتاكلدىڭ نەگىزگى ايتپاعى – ءتاننىڭ, جاننىڭ ەمەس, سانانىڭ مۇگەدەكتىگى. جاسىراتىنى جوق, جاستار ساناسىنىڭ ءوزى گادجەتكە بايلانعان. جانىڭداعى جاندارعا نازار اۋدارمايتىن قوعامعا ءاربىرىمىزدىڭ نەگىزگى قۇندىلىعىمىز ادامدارمەن قارىم-قاتىناس ەكەنىن كوپشىلىككە جەتكىزگىمىز كەلدى, – دەدى رەجيسسەر.
«قاناتتىلار» – ورتالىق ازيادا بالاماسى جوق تۇڭعىش ينكليۋزيۆتى تەاتر. قۇرامىندا 30-عا تارتا ەرەكشە جان بار ۇجىمنىڭ ەندىگى ماقساتى – حالىقارالىق جانە رەسپۋبليكالىق دەڭگەيدە «قىزجىلاعاندى» ءدۇيىم جۇرتقا پاش ەتۋ.
