اقشا بۇلتتار مامىرلاعان اشىق اسپان بەينەسى كوڭىل ەلىتىپ, عاجايىپ تۇڭعيىققا جەتەلەي, ايدىن كولدە تارانعان اققۋلاردى كوز الدىمىزعا اكەلدى. «استانا وپەرا» سيمفونيالىق وركەسترى ورىنداعان «جىبەكتىڭ ءتۇسى» اۋەنى جاندى باۋراپ, زالدا وتىرعاننىڭ ءبارىن دە وزگە الەمگە شاقىرىپ تۇرعانداي سەزىلدى. ماحاببات الەمىنە ەنۋدىڭ العاشقى ەسىگى سول بولعانداي. ءبىر مەزەتتە «جارىق ساۋلە» جارق ەتىپ, اينالانى شۋاعىنا بولەپ, «گاككۋ» ءانىن اۋەلەتە شىرقادى. ءيا, قازاق ساحناسىنىڭ قىزجىبەگى – نۇرجامال ۇسەنباەۆا مەرەيلى شىعارماشىلىق كەشىن ءدال وسى انمەن اشتى.
-قۇرمانعازى اتىنداعى قازاق ۇلتتىق كونسەرۆاتورياسىنىڭ سوڭعى كۋرسىندا وقيتىن كەزىمدە اباي اتىنداعى قازاق مەملەكەتتىك وپەرا جانە بالەت تەاترىنىڭ 50 جىلدىعىنا وراي قويىلعان «قىز جىبەك» وپەراسىندا جىبەكتىڭ پارتياسىن ورىنداۋ باقىتى بۇيىرعان ەدى. بۇل وپەرا ۇلكەن ساحناعا باسقان العاشقى قادامىم بولاتىن. سول قادامىم وڭ بولدى. «قىز جىبەك» ونەردەگى باعىمدى اشتى,- دەپ, نۇرجامال وتىز جىلدان كەيىنگى جەكە كونتسەرتىنىڭ شىمىلدىعىن وسى انمەن ءتۇرىلۋ سەبەبىن ايتتى.
جەزتاڭداي ءانشىنىڭ مەرەكەسىنە حالىق كوپ جينالدى. ءتىپتى, ينە شانشىر ورىن قالمادى. نۇرجامال ۇسەنباەۆا ءبىر كەشتىڭ ىشىندە بىردە جىبەك, بىردە بىرجانمەن ايتىسقان ساڭلاق اقىن سارا بولىپ, ەندى بىردە «اباي» وپەراسىنداعى اجاردىڭ مۇڭىن جەتكىزدى.
وپەرا ءانشىسىنىڭ مەرەكەلىك قۋانىشىنا ساحناداعى ارىپتەستەرى, ونەردەگى دوستارى – ۋكراينانىڭ حالىق ءارتىسى, ۋكراينا ۇلتتىق وپەراسىنىڭ جەتەكشى ءسوليسى يگور بوركو, چەحيانىڭ باريتونى فيليپ باندجاك ورتاقتاسىپ, حالىققا ارناپ الەمدىك وپەرا جاۋھارلارىنان ءۇزىندى ۇسىندى. مۇنىمەن قاتار اتالعان كەشتە «استانا وپەرا» تەاترىنىڭ سوليستەرى دە ونەر كورسەتتى. ديريجەرلىق تىزگىندە تاتارستاننىڭ حالىق ءارتىسى رەنات سالاۆاتوۆ بولدى. سونداي-اق, كونتسەرت «استانا وپەرا» سيمفونيالىق وركەسترى, حورى جانە بالەتىنىڭ سۇيەمەلدەۋىمەن ءوتتى.
ەگىز لەبىز
يگور بوركو, ۋكراينا حالىق ءارتىسى, ت.شەۆچەنكو اتىنداعى ۇلتتىق وپەرا جانە بالەت تەاترىنىڭ ءسوليسى:
–نۇرجامالمەن وسىدان 14-15 جىل بۇرىن شالياپين فەستيۆالىندە تانىستىم. ول دج.ءپۋچچينيدىڭ «بوگەما» وپەراسىنداعى ءميميدىڭ پارتياسىن ورىنداعان ەدى. شىعارماشىلىق بايلانىسىمىز ۇزىلگەن ەمەس. گوللانديا, گەرمانيا, رەسەي ساحنالارىندا تالاي رەت بىرگە ونەر كورسەتتىك. ونىڭ ەرەكشە تەمبرىنە ءتانتىمىن. داۋىسىن تىڭداي بەرگىڭ كەلەدى. ەلىمىزدە «ۋكراينسكي سولوۆەي» دەگەن تىركەس بار. نۇرجامالدىڭ ءانى بۇلبۇلدىڭ ۇنىندەي.
فيليپ باندجاك, پاريج ۇلتتىق تەاترىنىڭ ءسوليسى:
–نۇرجامالدىڭ تىڭدارمانداردى وزىنە بىردەن باۋراپ الاتىن ساحناداعى ەنەرگياسىنا تامسانۋشىلاردىڭ قاتارىنانمىن. ماسەلەن, ونىڭ بىلتىر پراگا قالاسىندا وتكەن ءبىر كونتسەرتتە ورىنداعان ارياسى ءالى كۇنگە دەيىن قۇلاعىمىزدان كەتەر ەمەس. ەندى بۇگىن «استانا وپەرا» ساحناسىندا نۇرجامالدىڭ وزىمەن بىرگە ءان شىرقاعانىما وتە قۋانىشتىمىن.
مادينا جاقىپ
