قازاقستان – ىنتىماق مەكەنى

بۇگىنگى تاڭدا «دوستىق» ۇيىندە ورنالاسقان ارميان حالقىنىڭ «ۆان» ەتنو-مادەني ورتالىعىندا 60-70 ازامات جۇمىس ىستەيدى.

ءبىزدىڭ قاۋىمداستىق اشىلعان كۇننەن باستاپ بەلسەندى جۇمىس اتقارىپ, ءتۇرلى مادەني ءىس-شارالارعا قاتىسىپ كەلەدى. نۇر-سۇلتان قالاسىندا شامامەن 1500-گە جۋىق ارميان حالقى ءومىر سۇرەدى. ال قازاقستان بويىنشا 37 مىڭ ارميان بار. سونىمەن بىرگە اقمولا وبلىسىنداعى «الجير» لاگەرىندە 75 ارميان ايەلدەرى بولعان دەگەن دەرەكتەر بار. ول كەزەڭدە ادامدار اشتىقتان قازا بولعان. قازاقستاندىقتار ءبىزدىڭ حالىقتى سول قيىن كەزەڭنىڭ وزىندە قابىلداعان. دەرەكتى فيلمدەردى قاراپ وتىرساڭىز, اشتىق جانە رەپرەسسيا كەزەڭىنىڭ قيىندىعىن, اشتىق پەن قاسىرەتتى كورۋگە بولادى. ول جىلدار ەل باسىنا كۇن تۋعان قاسىرەتتى وقيعا بۇگىندە تاريح قويناۋىندا ماڭگىلىككە ساقتالىپ قالدى. ءبىز ونى ۇمىتپاۋىمىز كەرەك. بىرلىك جانە ىنتىماق مەرەكەلەرىندە قازاقستانداعى بارلىق ۇلتتار مەن ۇلىستاردىڭ باسىن بىرىكتىرەدى. ءبىز قازاق جەرىندە ءومىر ءسۇرىپ, وسى حالىقتىڭ تاريحىمەن تانىس بولىپ, مادەنيەتى مەن سالت-ءداستۇرىن ءبىلۋىمىز كەرەك. رەپرەسسيا كەزىندە قونىستانعان ارمياندار بۇگىندە وسى جەردە, قازاق ەلىندە ءومىر ءسۇرىپ كەلەدى. سەبەبى قازاقستان – ءبىزدىڭ ءۇيىمىز. قازاقستانعا قونىس اۋدارىپ, ءبىز ەكىنشى وتانىمىزدى, ەكىنشى ءۇيىمىزدى تاپتىق.

<strong>سااك سالۋميان,
قالالىق «ۆان» ارميان قوعامدىق بىرلەستىگىنىڭ
باسشىسى, زاپاستاعى پولكوۆنيك