كەشە اقوردادا مەملەكەت باسشىسى نۇرسۇلتان نازارباەۆ قازاقستاننىڭ قارۋلى كۇشتەرى, قۇقىق قورعاۋ ورگاندارى مەن ارنايى قىزمەت وكىلدەرىنە مەملەكەتتىك ناگرادالار تاپسىردى.
– ۇلت پەن ۇلىستىڭ قاۋىپسىزدىگىن قامتاماسىز ەتىپ, تاۋەلسىزدىگىمىزدى قورعاپ, ونى قاستەرلەۋدەن اسقان مارتەبە جوق. تاتۋ ەلىمىزدەگى تۇراقتىلىق پەن ءتارتىپ تۇعىرىنىڭ بەرىك بولۋى وزدەرىڭىزگە تىكەلەي بايلانىستى. سىزدەر وسى سالادا ابىرويلى قىزمەت ەتىپ, ازاماتتىق پارىزدارىڭىزدى ادالدىقپەن اتقارىپ كەلەسىزدەر. قازاقستاننىڭ تۇراقتىلىعىن, حالقىمىزدىڭ اماندىعىن ەلىمىزدىڭ سەنىمدى ساربازدارى كۇزەتىپ تۇر. ەلگە قورعان بولۋ ءۇشىن قاجىماس قايرات, جىگەرلى رۋح قاجەت ەكەنى بەلگىلى. وسىلاردىڭ بارلىعى سىزدەردىڭ بويلارىڭىزدان تابىلادى دەپ ويلايمىن. وتانعا دەگەن قالتقىسىز قىزمەتىمەن, ەرەن ەڭبەگىمەن ەرەكشەلەنگەن سىزدەر بۇگىنگى جوعارى ماراپاتقا لايىق بولىپ وتىرسىزدار, – دەدى ەلباسى قۇتتىقتاۋ سوزىندە.
سالتاناتتى ءراسىم كەزىندە قر قارۋلى كۇشتەرى «وڭتۇستىك» وڭىرلىك قولباسشىلىعى اسكەرلەرىنىڭ قولباسشىسى ت.قويباقوۆ جانە ۇلتتىق قورعانىس ۋنيۆەرسيتەتىنىڭ باستىعى ا.رىسپاەۆ ءىى دارەجەلى «داڭق» وردەنىمەن ماراپاتتالدى. سونداي-اق, 8 ادامعا – ءىى دارەجەلى, 3-ەۋىنە – ءىىى دارەجەلى «ايبىن» وردەنى تابىس ەتىلدى. ەكى قىزمەتكەر «ەرلىگى ءۇشىن» مەدالىمەن ماراپاتتالسا, 5 ادام «جاۋىنگەرلىك ەرلىگى ءۇشىن» مەدالىن كەۋدەسىنە تاقتى.
جالپى بيىلعى وتان قورعاۋشىلار كۇنى ەلدىڭ ەسىندە ەرەكشە ساقتالاتىن ءتۇرى بار. ونىڭ ءبىر سەبەبى, بۇل اتاۋلى كۇن بيىل تۇڭعىش رەت مەملەكەتتىك مەرەكە رەتىندە اتالىپ, كۇنتىزبەگە قىزىلمەن بەلگىلەندى. ەكىنشىدەن, ءدال وسى مەرەكە قازاقتىڭ تۇڭعىش ايەل گەنەرالىن انىقتاپ بەردى. بۇعان دەيىن ايەل زاتىنان ەشكىم گەنەرال اتاعىن يەلەنبەگەن ەدى. ەندى, مىنە, مارتەبەلى اتاققا يە بولىپ, تاريحتا قالعان باقىتتى جان – قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءتورايىمى ساۋلە ايتپاەۆا بولىپ وتىر. 1960 جىلى تورعاي وبلىسى, جاقسى كەنتىندە دۇنيەگە كەلگەن ساۋلە مۇحانبەديانقىزى ەڭبەك جولىن تورعاي وبلىسى, جاقسى اۋداندىق پروكۋراتۋراسى كەڭسەسىنىڭ مەڭگەرۋشىسىنەن باستاعان. كەيىن تسەلينوگراد وبلىستىق, قالالىق جانە اقمولا وبلىستىق پروكۋراتۋراسىندا قىزمەت اتقارعان ول 1997 جىلدان باستاپ, قازاقستان رەسپۋبليكاسى باس پروكۋراتۋراسى جانىنداعى قۇقىقتىق ستاتيستيكا جانە اقپارات ورتالىعىنىڭ ءبولىم باستىعى بولدى. قازىرگى قىزمەتىنە وتكەن جىلدىڭ ءساۋىر ايىنان باستاپ كىرىسكەن. بۇعان دەيىن «قازاقستان رەسپۋبليكاسى پروكۋراتۋراسىنىڭ قۇرمەتتى قىزمەتكەرى», «ەرەن ەڭبەگى ءۇشىن» سىندى كوپتەگەن مەدالدارمەن ماراپاتتالعان ساۋلە ايتپاەۆا ەندى, مىنە, ەلباسىنىڭ قولىنان گەنەرال شەنىن الدى.
مەملەكەت باسشىسى شەن العان ازاماتتاردىڭ بۇدان ءارى دە ەلگە ادال قىزمەت ەتەتىنىنە سەنىم ءبىلدىردى.
قىمبات نۇرعالي
