«نۇر وتان» پارتياسى ساياسي كەڭەسىنىڭ كەڭەيتىلگەن وتىرىسىندا پرەزيدەنت نۇرسۇلتان نازارباەۆ «نۇرلى جول» مەملەكەتتىڭ جاڭا ساياسي باعىتىن جاريا ەتتى. مەملەكەت باسشىسى جاڭا ەكونوميكالىق ساياساتتىڭ وزەگى بەس جىلعا ارنالعان ينفراقۇرىلىمدىق دامۋ جوسپارى بولاتىنىن اتاپ ءوتتى.
«مەن ءوزىمنىڭ تاجىريبەمنەن الدىن الا سەزىپ وتىرعانىمداي, تاياۋداعى جىلدار جاھاندىق سىناقتاردىڭ ۋاقىتى بولادى. الەمنىڭ بۇكىل ارحيتەكتۋراسى وزگەرەدى. بارلىق ەلدەر وسى كۇردەلى كەزەڭنەن لايىقتى وتە المايدى. بۇل شەپتەن تەك مىقتى مەملەكەتتەر, جۇدىرىقتاي جۇمىلعان حالىقتار عانا وتەتىن بولادى» دەدى ەلباسى.
مەملەكەت باسشىسىنىڭ ايتۋىنشا, اقپان ايىندا ۇلتتىق قوردان ەكونوميكالىق ءوسىم مەن جۇمىسپەن قامتۋدى قولداۋ ءۇشىن 2014-2015 جىلدارعا 500 ميلليارد تەڭگەدەن ەكى ترانش بويىنشا 1 تريلليون تەڭگە ءبولۋ تۋرالى شەشىم قابىلدانعان. باستالعان جوبالاردى اياقتاۋ جانە اسا وتكىر ماسەلەلەردى شەشۋ ءۇشىن پرەزيدەنت ۇكىمەتكە ۇلتتىق قوردان 500 ميلليارد تەڭگە كولەمىندەگى ەكىنشى ترانش قارجىسىن بەلگىلى ءبىر ماقساتتارعا, اتاپ ايتقاندا, «ەكسپو-2017» كەشەنىن سالۋدى قوسىمشا قارجىلاندىرۋعا باعىتتاۋدى تاپسىردى. بۇعان دەيىن ءبولىنگەن 25 ميللياردقا «ەكسپو-2017» كەشەنى قۇرىلىسىن جالعاستىرۋدى نەسيەلەۋ ءۇشىن 2015 جىلى قوسىمشا 40 ميلليارد تەڭگە بولىنەدى.
