«استانا» كونتسەرت زالىندا نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسىنا قاراستى حالىقارالىق «شابىت» شىعارماشىل جاستار فەستيۆالىنىڭ باس جۇلدە يەگەرى, گيننەس رەكوردتار كىتابىنا ەنگەن «قورقىت» ەتنوانسامبلىنىڭ (كوركەمدىك جەتەكشىسى – مادەنيەت قايراتكەرى شولپان قورعانبەك) «بابالار اماناتى» اتتى ءVىى كونتسەرتتىك ماۋسىمىنىڭ اشىلۋ كونتسەرتى ءوتتى.
انسامبل ارتىستەرىنىڭ جارتىسى دۋبايداعى حالىقارالىق «ەكسپو» كورمەسىنە ەلىمىزدىڭ ۇلتتىق مۋزىكاسىن ناسيحاتتاۋعا اتتانعاندىقتان, ونەر ۇجىمى تولىق قۇرامدا بولعان جوق. كەشتىڭ ماقساتى – حالقىمىزدىڭ تاريحىنان سىر شەرتەتىن اندەر مەن كۇيلەردى ورىنداي وتىرىپ, بابالار مۇراسىن جاڭعىرتىپ, وتكەنىمىز بەن بۇگىنىمىزدى جالعاستىرۋشى جالىندى جاستارىمىزدىڭ ورىنداۋىندا ۇلتتىق اسپاپتاردىڭ قۇدىرەتىن كورسەتۋ. حالقىمىزدىڭ ءان-كۇي ونەرى – سان عاسىرلار بويى ۇرپاقتان-ۇرپاققا, اتادان بالاعا ميراس بولىپ كەلە جاتقان باعا جەتپەس رۋحاني اسىل قازىنا. التايدان اتىراۋعا دەيىنگى كەڭ-بايتاق دالامىزدىڭ اۋەزدى اندەرى مەن كۇمبىرلەگەن كۇيلەرى كونتسەرتىندە «قورقىت» ەتنوانسامبلىمەن بىرگە فيلارمونيا سوليستەرى ونەر كورسەتتى. اتاپ ايتقاندا, ەدىل قۇسايىنوۆ, قازاقستاننىڭ ەڭبەك سىڭىرگەن قايراتكەرى, قوبىزشى راۋشان ورازباەۆا, حالىقارالىق جانە رەسپۋبليكالىق كونكۋرستاردىڭ لاۋرەاتتارى – پەريزات تۇراروۆا, مۇراتبەك حايرولدا, ايگەرىم نارتۇيە, جاقسىگەلدى ماياساروۆ, الۋا قالىمبەكوۆا, وزگەرىس شەرىكباي, اينۇر قونىسباەۆا, ايدوس وڭعارباي جانە «شالقىما» حالىق بي ءانسامبلى قاتىستى.
