كەشە استانا قالاسى ءبىلىم باسقارماسىنىڭ باستىعى ءاسيما بيمەندينا قۇرىلىستارى جاقىندا اياقتالىپ, تولىق پايدالانۋعا بەرىلگەن سارىارقا اۋدانىنا قاراستى «جانارىم» جانە اشىلۋعا ازىرلىك ۇستىندەگى الماتى اۋدانىنىڭ «اياۋلىم» بالاباقشالارىن ارالاپ كوردى.
الدىمەن س.سەيفۋللين جانە ن.تىلەنديەۆ كوشەلەرىنىڭ قيىلىسىندا ورنالاسقان «جانارىم» بالاباقشاسىنىڭ جاي-كۇيىمەن تانىسىپ شىعىپ, ونداعى بالالار ءۇشىن جاسالعان بارلىق جاعدايدىڭ تالاپقا ساي ەكەندىگىنە كوز جەتكىزدى. قوس قاباتتى عيمارات ىشىندە سپورت زالى, باسسەين, ويىن جانە جاتىن بولمەسى سىندى قاجەتتىلىكتەر زامان تالابىنا ساي قۇرال-جابدىقتارمەن جان-جاقتى قامتىلعان. ءبىلىم باسقارماسى باسشىسىن ءار تانىستىرىلىم بارىسىندا سارىارقا اۋدانىنىڭ اكىمى ەرمەك وسپانوۆتىڭ ءوزى باستاپ الىپ ءجۇردى.
«ەلباسىنىڭ تاپسىرماسىنا سايكەس وسى جىلدىڭ باسىنان بەرى ەلوردامىز بويىنشا «بالاپان» باعدارلاماسى اياسىندا 5 بالاباقشا اشىلدى. ال, مىنا «جانارىم» بالاباقشاسى قۇرىلىسىنىڭ اياقتالۋىن ءبىز 3 جىلداي ۋاقىت كۇتتىك. شۇكىر, قازىر سونىڭ ناتيجەسىن وزدەرىڭىز كورىپ وتىرسىزدار. ءبارى ويداعىداي ەكەن. بۇگىندە جاسوسپىرىمدەردى بالاباقشالارعا قابىلداۋ ناۋقانى قىزۋ ءجۇرىپ جاتىر. مۇندا بۇرىن جولداما الىپ, عيماراتتىڭ قۇرىلىسى ەرتە اياقتالماۋى سالدارىنان كەلە الماي قالعان بالالار بار. ەندى ولار ۋاقىتشا قابىلداعان ۇلكەن بالاباقشادان وسىندا اۋىستىرىلادى. اتا-انالار «ورىس تىلىندە تاربيە بەرەتىن دە مەكەمە كەرەك» دەپ ءوتىنىش جاساعان سوڭ, ءبىزدىڭ وسىنداي ارالاس بالاباقشا اشۋىمىزعا تۋرا كەلدى. بىراق, باسقا بالاباقشالار تەگىس قازاقشا بولعاندىقتان, ولارعا بالالارىن وزگە ۇلت وكىلدەرى دە بەرىپ جاتىر. قالامىزدىڭ اۋماعى ۇلعايىپ, تۇرعىندار سانى كوبەيىپ كەلەدى. سوندىقتان مۇندا بالالار مەكەمەسىنىڭ سانى جاعىنان ەش ماسەلە تۋىنداتپاۋدىڭ امالدارىن قاراستىرۋدامىز» دەدى جينالعان اتا-انالاردى قۇتتىقتاپ ءسوز سويلەگەن ءاسيما تەمكەقىزى.
ال, «حايۆيل» تۇرعىن ءۇي كەشەنىنە قاراما-قارسى ورنالاسقان «اياۋلىم» بالاباقشاسىندا شاعىن پارتالاردى الماستىرۋ, ورىندىقتاردىڭ سانىن كوبەيتۋ, عيمارات الدىنداعى ارامشوپتەردى جۇلۋ سىندى الداعى ۋاقىتتا ەسكەرىلۋى ءتيىس جايتتار بار ەكەن. الماتى اۋدانىنىڭ اكىمى پاۆەل كۋلاگين ۇساق ولقىلىقتاردىڭ ورنىن تولتىرىپ, مەكەمە باسشىلىعى ورىندى ەسكەرتپەدەن وڭ ناتيجە شىعاراتىندىعىن ۋادە ەتتى.
ەركەعالي بەيسەنوۆ
