ەلورداداعى №2 مامانداندىرىلعان ءورت ءسوندىرۋ بولىمىندە ابىلايحان كەنجەعۇلوۆ ەسىمدى جاس قۇتقارۋشى قىزمەت ىستەيدى. ەڭبەك جولىن باستاعالى نەبارى ءۇش-اق جىلدىڭ ءجۇزى وتسە دە, ول ءوز جۇمىسىنىڭ قىر-سىرىن تۇگەلدەي مەڭگەرىپ العان. «ءبىزدىڭ ماماندىعىمىز مۇلتىكسىز تياناقتىلىقتى تالاپ ەتەدى. ونىڭ ۇستىنە, ەگەمەندىكتىڭ ءتول قۇرداسى بولۋ ەكى ەسە جاۋاپكەرشىلىكتى جۇكتەيدى ەكەن» دەيدى كەيىپكەرىمىز.
ابىلايحان 1991 جىلدىڭ 23 جەلتوقسانى كۇنى دۇنيەگە كەلگەن. 2009 جىلى كوكشەتاۋ تەحنيكالىق ينستيتۋتىنا كۋرسانت رەتىندە قابىلدانىپ, اتالمىش وقۋ ورنىن 2013 جىلى ءبىتىرىپ شىعادى. سودان بەرى استاناداعى №2 مامانداندىرىلعان ءورت ءسوندىرۋ ءبولىمىنىڭ اعا ينجەنەرى.
– بۇگىندە مەنىڭ قاراماعىمدا 20-عا جۋىق مامان بار. ولاردىڭ بارىنە باس-كوز بولىپ, مىندەتتەرىن قالتقىسىز قاداعالاۋ وڭاي شارۋا ەمەس. اسىرەسە, توتەنشە جاعداي كەزىندە ءبىر-ءبىرىمىزدى ىممەن ءتۇسىنىسىپ, بارىنشا ساۋاتتى قيمىلداۋعا تىرىسامىز. توككەن تەردىڭ اقتالعانىن قاراپايىم تۇرعىندار تاراپىنان ايتىلاتىن جۇرەكجاردى العىستى ەستىگەندە ۇعىنامىز. جالپى, قۇتقارۋشىلاردىڭ ميسسياسى – پارىز بەن ادامگەرشىلىك ۇعىمدارىن ارقاشان قاتار الىپ ءجۇرۋ عوي, – دەپ اعىنان اقتارىلادى ابىلايحان.
قاھارمانىمىزدىڭ ەسىندە قالعان ەڭ ەلەۋلى وقيعا 2014 جىلى بولىپتى. استاناداعى شاكارىم قۇدايبەردىۇلى كوشەسىندە ورنالاسقان 16 قاباتتىق تۇرعىن ءۇي ورتەنىپ جاتىر دەگەن سۋىت حاباردى ەستي سالىسىمەن, قۇتقارۋشىلار لەزدە جەتىپ بارادى. قاراسا, جوعارى قاباتتاردا تۇراتىن كىسىلەر تومەن تۇسە الماي جانتالاسۋدا. دەرەۋ ماماندار اۆتوساتىلارىن ازىرلەپ, الگى ادامدارعا قول ۇشىن سوزۋعا ۇمتىلادى. ابىلايحان 14-قاباتقا ورمەلەپ شىعىپ, پاتەردىڭ تەرەزەسىن سىندىرسا, ىشتە كوزدەرى جاۋتەڭدەپ بىرنەشە ءبۇلدىرشىن وتىر ەكەن. ءبىرىن كوتەرىپ, ءبىرىن ارقالاپ, ارنايى باسپالداق ارقىلى جەرگە تۇسىرەدى.
– ءبىر ادامنىڭ ومىرىنە اراشاشى بولعانىڭدى سەزىنۋدىڭ ءوزى ۇلكەن باقىت! – دەيدى كەيىپكەرىمىز سول ءساتتى ويىنا الىپ. – قىزمەتىڭ قوعامعا شىنىمەن پايدا اكەلسە, بۇقارانىڭ قاۋىپسىزدىگىنە تيتىمدەي ۇلەس قوسسا, دەمەك, دۇرىس جولدا ءجۇرسىڭ دەگەن ءسوز. بۇل ورايدا مەنىڭ راسىمەن جولىم بولدى.
قۇتقارۋشىلار تەك ءورت ورتاسىنان تابىلادى دەپ ويلاساڭىزدار, قاتەلەسەسىزدەر. مىسالى, ابىلايحان باستاعان ءبىر توپ مامان وسى ۋاقىتقا دەيىن نەبىر توسىن شاقىرۋلارعا اتتانىپتى. بالالارى باستارىنا قۇمىرا كيىپ, قايتا شىعارا الماي قالعان نەمەسە كىلتىن ۇيگە ۇمىتىپ كەتىپ, ەسىگىن اشا الماي اۋرەگە تۇسكەن تۇرعىندار دەرەۋ وسى قىزمەتكە جۇگىنەدى. ول ول ما, ساۋساعىنا ساقينا كەپتەلىپ قالعان ايەلدەر دە قۇتقارۋشىلارعا تەلەفون سوعاتىن كورىنەدى. سونداي-اق, بۇل قاھارماندار سىناپ توگىلگەن جەردى دە تۇگەلدەي زالالسىزداندىرادى, اعاشقا ورمەلەپ تومەن تۇسە الماي قالعان مىسىعىڭىزدى دا قولىڭىزعا تابىستايدى, قۇدىققا قۇلاپ كەتكەن ءيتىڭىزدى دە وزىڭىزگە قايتارادى. قىسقاسى, نەندەي قاۋىپكە دە تويتارىس بەرىپ, حالىقتىڭ جايلى تۇرمىسىن كۇزەتەدى.
اڭگىمە بارىسىندا ابىلايحاننىڭ بويىنان كوشباسشىلىق, ۇستامدىلىق جانە ناعىز باتىرعا ءتان قاجىر-قايراتتى بايقادىق. جاس ينجەنەردىڭ ءبولىم كومانديرى دەڭگەيىنە كوتەرىلۋى, «ءىىى دارەجەلى قۇتقارۋشى» توسبەلگىسىمەن ماراپاتتالۋى, «گاز-تۇتىننەن قورعاۋ قىزمەتىندەگى ۇزدىك ءبولىم» سايىسىندا جىل سايىنعى جەڭىسى وسى قاسيەتتەرىنىڭ ارقاسى ەكەنى داۋسىز. الداعى شاقتا دا تاۋ-تاۋ جەتىستىكتەرىمەن ارىپتەستەرىن, جاقىندارىن, وتباسىن تالاي قۋانتاتىنىنا سەنىمىمىز مول.
بوتاگوز ماراتقىزى
