سۋعا شومىلۋ ماۋسىمىنىڭ باستالۋىنا ساناۋلى كۇندەر قالدى. وسىعان وراي, قالالىق سۋدا قۇتقارۋ قىزمەتى حالىق شومىلاتىن جەرلەردە قاۋىپسىزدىك شارالارىن كۇشەيتۋدە. بۇل جونىندە استانا قالاسى تجد سۋدا قۇتقارۋ قىزمەتىنىڭ باستىعى گەورگي ساۆرۋك اڭگىمەلەپ بەردى.
– شومىلۋ ماۋسىمىندا قاۋىپسىزدىك شارالارى قالاي قامتاماسىز ەتىلگەن؟
– ءبىز ساقتىق شارالارىنىڭ بارىنە دايىنبىز. دەگەنمەن, ماۋسىم ايىنىڭ ورتا شەنىنە جاقىنداساق تا, سۋعا تۇسۋگە ءالى ەرتە. بۇگىندە سۋدىڭ تەمپەراتۋراسى 10-12 گرادۋس قانا. وعان جەل مەن اۋا رايىنىڭ قولايسىزدىعى سەبەپ بولۋدا. ال, سۋعا ءتۇسۋ ءۇشىن كەمىندە 18 گرادۋستان جوعارى بولۋى كەرەك. جاعالاۋدا ءاربىر 100-150 مەتر سايىن قاۋىپسىزدىك ەرەجەلەرى جازىلعان تاقتالار ورناتىلىپ, شومىلۋعا رۇقسات ايماقتار قورشاۋمەن بەلگىلەنگەن. سۋعا تۇسۋگە ءالى ەرتە بولسا دا, وزەن جاعالاۋشىلاردىڭ قاراسى كوپ. الايدا, مەزگىلسىز ۋاقىتتا سۋعا تۇسەمىن دەپ ادامدار ءوز ومىرىنە قاتەر توندىرمەگەن دۇرىس. سۋداعى توتەنشە جاعدايدا ءاربىر سەكۋند ساناۋلى.
جوسپار بويىنشا ءبىزدىڭ مەكەمەدەن بولەك تجم-ءنىڭ جوسپارىنا سايكەس تجد, الماتى, ەسىل, سارىارقا اۋداندارى اكىمدىكتەرى مەن ءىىد, استانا قالاسىنىڭ ءبىلىم, دەنساۋلىق جانە تۋريزم, دەنە تاربيەسى جانە سپورت باسقارمالارىمەن بىرگە جۇمىلا جۇمىس ىستەۋدەمىز.
– استانادا قاي جەرلەردە شومىلۋعا رۇقسات ەتىلگەن؟
– بىزدە شومىلۋعا رۇقسات ەتىلگەن ەكى ورىن بار. ونىڭ ءبىرى استانالىق جاعاجاي بولسا, ەكىنشىسى – قوياندى اۋىلىنداعى دەمالىس ايماعى. الايدا, سۋعا تۇسۋگە تىيىم سالىنعان جەرلەردە دە شومىلۋشىلار سانى كەمىمەي وتىر. جاعالاۋدا شومىلۋ وتە قاۋىپتى. ويتكەنى تىك جاردان قۇلاپ كەتۋ قاۋپى باسىم. بۇگىندە سۋدان قۇتقارۋ قىزمەتىندە 6 موتورلى قايىق, 7 قۇتقارۋ ءشليۋپى, 2 سۇڭگۋىر-قۇتقارۋ كولىگى مەن 34 ادامنان تۇراتىن 2 قۇتقارۋ قىزمەتى بار. قايعىلى جاعدايدى بولدىرماس ءۇشىن قاراپايىم قاۋىپسىزدىك ەرەجەلەرىن ساقتاپ, بالالاردى قاراۋسىز قالدىرماۋ كەرەك.
ەركەجان ساتىمبەك
