حح عاسىردا قازاق باسىنان تالاي ناۋبەت ءوتتى. بۇل تۋرالى وتكەن عاسىردىڭ سوڭىنا قاراي, جىلىمىق كەزەڭ تۋعاندا ايتىلىپ, جازىلا باستادى. بەلگىلى اقىن, مەملەكەتتىك سىيلىقتىڭ يەگەرى نۇرلان ورازالين 30-50 جىلداردىڭ تاريحي شىندىعىن «قاراقازان عاسىر» اتتى درامالىق داستانىنا ارقاۋ ەتتى. وسى تۋىندىنىڭ ىقشامدالعان نۇسقاسى «قىلكوپىر» اتاۋىمەن ەلوردانىڭ «جاستار» تەاترىنىڭ ساحناسىنا جول تارتتى. قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى نۇرقانات جاقىپباي.
ءحىح عاسىردىڭ ورتاسىندا ماحامبەت وتەمىسۇلى بايماعامبەت سۇلتاننىڭ الدىندا قاسقايىپ تۇرىپ, «قارا قازان, سارى بالا قامى ءۇشىن قىلىش سەرمەدىك» دەگەن ءسوز ايتتى. بۇل كەزەڭدە قازاق ءالى بوداندىق بۇعاۋىن تولىعىمەن كيمەگەن ەدى. قازان توڭكەرىسىنەن كەيىن ۇلتىمىز قيتۇرقى ساياساتتىڭ قۇربانىنا اينالدى. ۇجىمداستىرۋدان سوڭ اشارشىلىققا ۇرىندىق. ودان كەيىن ساياسي قۋعىن-سۇرگىن كەزەڭى كەلدى. تىڭ يگەرۋدىڭ زاردابى دا از بولمادى.
نۇرلان ءورازاليننىڭ درامالىق داستانىندا وسىنىڭ ءبارى قامتىلعان. اقىننىڭ شىعارماسى جەلىسىمەن ساحنالانعان سپەكتاكلدىڭ ونە بويىندا دا شاراسىزدىق بايقالادى. ءيا, حح عاسىردا تولقۋلار, بۇلقىنىستار بولعانمەن, قازاق نەگىزىنەن, ساياساتتىڭ دەگەنىنە كوندى. شاڭىراق – قاستەرلى ۇعىم. ۇلتىمىز ونى ءاردايىم بيىكتە ۇستاپ, قاستەرلەگەن. ال شاڭىراقتىڭ ورتادا جايراپ جاتقانى جاقسىلىقتىڭ نىشانى ەمەس. ساحنادان سونى كوردىك.
جالپى قويۋشى رەجيسسەر ءساتتى شەشىمدەردى قولدانعان. ساحنا شىمىلدىعى اشىلعاندا ارقان سۇيرەتكەن ادامدار شىعا كەلەدى. بۇل كورىنىس ايگىلى سۋرەتشى يليا رەپيننىڭ «ەدىلدەگى بۋرلاكتار» كارتيناسىن ەسكە تۇسىرەدى. بىزدىڭشە, رەجيسسەر سول ارقىلى ۇلتتىڭ باسىنا تۇسكەن اۋىرتپالىقتى مەڭزەگەن.
نۇرقانات جاقىپبايدىڭ ايتۋىنشا, قويىلىم ارقىلى جالپىادامزاتتىق قۇندىلىقتار ماسەلەسى دە قوزعالادى. قازىر توبىرلىق مادەنيەت تۋرالى كوپ ايتىلادى. سپەكتاكلدە قولدانعان اندەر دە وسى ويعا جەتەلەيدى. ساكەن سەيفۋلليننىڭ «جاس قازاق مارسەلەزاسى» ولەڭى سول زامان تىنىسىنان حابار بەرەدى. قويىلىمدا باستى ورىنداردىڭ ءبىرى انا مەن بالا قارىم-قاتىناسىنا بەرىلگەن.
رەجيسسەرمەن قاتار حورمەيستەر انەل سىرگەباەۆا مەن كوستيۋم سۋرەتشىسى التىنبەك ەرمۇحاننىڭ ەڭبەگىن, ستسەنوگرافيانى اتاپ ءوتۋ كەرەك. ال اكتەرلەر ءبىرتۇتاس ءانسامبلدى قۇرادى. ەشقايسىسىن بولە-جارا اتاي المايمىز.
