قىرعىز قىلقالامشىلارىنىڭ سىرشىراي سىيى
بەيسەنبىدە تاۋەلسىزدىك سارايىندا استانانىڭ 15 جىلدىق مەرەيتويىنا وراي «استانا قىرعىزستان سۋرەتشىلەرىنىڭ ونەرىندە» اتتى كورمە اشىلدى.
الاتوونىڭ ارعى جاعىنداعى باۋىرلارعا استانانىڭ قازىرگى كەلبەتىن كەنەپ بەتىنە ءتۇسىرتۋ يدەياسىنا اۋەلى قازاقستاننىڭ قىرعىزستانداعى ەلشىلىگى باستاماشى بوپ, ءبىر توپ «اتىمتاي جومارت» ازاماتتار قولداۋ بىلدىرىسكەن. بىزگە بەلگىلى عاپار ايتيەۆ, تۇرعانباي سادىقوۆ سىقىلدى سۋرەتشىلەردىڭ ءىزىن وشىرمەي جالعاستىرىپ كەلە جاتقان قىرعىز بەينەلەۋ ونەرىنىڭ بۇگىنگى وكىلدەرى بىلتىر جىل ون ەكى اي ساعىم ويناعان سارىارقا توسىندە ۇشقان قۇستاي كوركەيگەن ەلوردامىزدى ەرىنبەي ارالاپ, سۇلۋلىعىن سۇلبالاعان. بۇگىن, مىنە, وزىمىزگە كوزۇيرەنشىكتى كورىنىستەر قىرعىز اعايىنداردىڭ قىلقالام قۇشتارلىعىنان پايدا بولعان تۋىندىلار ارقىلى قايتا تابىسقاندا, تۋعان قالامىزدىڭ تىرشىلىك ىرعاعىن وزگەشە ورىستە سەزىنگەندەي بولدىق. اسفالتقا تىرس-تىرس تيگەن جاڭبىر, قىستىگۇنگى مۇلگىگەن تىنىشتىقتا ەسىل سۋىنا قارماق سالعان بالىقشى, شانامەن سىرعاناعاندا الدىڭنان ۇدەي سوققان ۇسكىرىك جەل, جاپىراعى جامىراعان باق ىشىندە قىزدىڭ قۇلاعىن قىتىقتاي سىر سىبىرلاعان بوزبالا, اقشامدا ءتۇرلى تۇسكە ەنەتىن ەرتەگىدەي قالا, ەڭسەلى عيماراتتار كەنەپكە اشەيىن كوشىپ العانداي. كورمەنىڭ سالتاناتتى اشىلۋىنا قاتىسقان مادەنيەت جانە اقپارات ءمينيسترى م.قۇل-مۇحاممەد «مەن مۇنى قىرعىز سۋرەتشىلەرىنىڭ يمپرەسسيونيزمى دەر ەدىم. ارينە, تىم اسىرا ايتىلىپ تا تۇرعان شىعار. بىراق «يمپرەسسيونيزم» اسەر دەگەن ماعىنانى بىلدىرمەي مە؟ بۇل قىرعىز سۋرەتشىلەرىنىڭ شىن مانىندە استانادان اسەرلەنۋىنىڭ كورىنىسى» دەپ باعالادى. جوباعا اتسالىسقان قىلقالامشىلاردىڭ ءبىر پاراسى چۋيكوۆ اتىنداعى قىرعىز مەملەكەتتىك ۋچيليششەسىن, سادىقوۆ اتىنداعى ۇلتتىق ونەر اكادەمياسىن بىتىرگەن.
ارالارىنداعى س.وسماناليەۆ, ر.بۋحارمەتوۆ, ب.شيراليەۆ, س. تۇرابەكوۆ, و.يدريسوۆ, ج.بازارباەۆ, ج.جۇنۋشەۆ, د. تسەرەندۋرجيەۆا سياقتى سۋرەتشىلەرى زامانىندا ءماسكەۋ, پەتەربور كوركەمونەر مەكتەپتەرىنەن ءتالىم العان, ايگىلى حالىقارالىق كورمەلەردىڭ لاۋرەتتارى.
بيىل – ەلىمىزدە قىرعىزستان ءمادەنيەتىنىڭ كۇندەرى وتەدى ءارى ەلوردانىڭ 15 جىلدىعى. سونىڭ قارساڭىندا تۋعان قالامىزدىڭ سىرشىراي جىلناماسىن تۇزۋگە قاتىسقان باۋىرلار باياعى ءبىر جىلدارى وتكىزىلىپ تۇراتىن ەلارالىق سۋرەتشىلەر سيمپوزيۋمى, پلەنەرلەردىڭ كەرەك-اق ەكەنىن اڭعارتقانداي. تۋعان ولكەنىڭ بۇگىنگى بەينەلەرىن تاريح جادىندا قالدىرۋ ءۇشىن… كورمە 26 ماۋسىمعا دەيىن جالعاسادى.
ەدىل بوكەەۆ