قازاقتىڭ ءبىرتۋار ۇلى, اقىن, جازۋشى ساكەن سەيفۋلليننىڭ 130 جىلدىعىنا وراي ەلوردالىق ستۋدەنتتەر مەن وقۋشىلار اراسىندا «ۇلى تۇلعالار كەلبەتى» اتتى سۋرەت سالۋ بايقاۋى ءوتتى. وعان 80-نەن استام ونەرلى جاس قاتىستى. بايقاۋدىڭ قازىلار القاسى ەلگە تانىمال سۋرەتشىلەر, ونەر قايراتكەرلەرى بولدى.
سايىس قورىتىندىسى بويىنشا 1-ورىندى س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ستۋدەنتى كاميلا ماۋكەن يەلەنىپ, ديپلوممەن جانە 30000 تەڭگە سىياقىمەن ماراپاتتالدى. 2-ورىنعا ەكى قاتىسۋشى – «شابىت» كوللەدجىنەن ارۋجان قوجابەرگەنوۆا جانە س.سەيفۋللين اتىنداعى قازاق اگروتەحنيكالىق ۋنيۆەرسيتەتىنەن جانسايا تۇرار يە بولدى. ولارعا ديپلوم جانە 20000 تەڭگە سىياقى تابىستالدى. 3-ورىندى بولىسكەندەر – «تۇران استانا» ۋنيۆەرسيتەتىنىڭ ستۋدەنتى رامازان نابيەۆ, س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ستۋدەنتتەرى كاميلا اكەنتاەۆا مەن راحات باتالوۆ. ولار ارنايى ديپلوم مەن 15000 تەڭگەنى جەڭىپ الدى.
سونداي-اق بايقاۋعا قاتىسقان وقۋشىلار اراسىنان جۇزدەن جۇيرىك شىققان تالابى تاۋداي وقۋشىلار بار. 1-ورىندى يەلەنگەن قوياندى اۋىلى №2 ورتا مەكتەپ وقۋشىسى اياۋلىم وماربەكقىزىنا ديپلوم جانە 5000 تەڭگە سىياقى تابىستالسا, 2-ورىنعا لايىقتى دەپ تانىلعان №60 مەكتەپ-ليتسەيىنىڭ وقۋشىسى ايكۇن ەرجانقىزىنا ديپلوم مەن 4000 تەڭگە تابىس ەتىلدى. 3-ورىندى جەڭىپ العان №87 مەكتەپ-گيمنازيا وقۋشىسى سايد تنەەۆ ديپلوممەن جانە 3000 تەڭگە سىياقىمەن ماراپاتتالدى. 20000 تەڭگە سىياقىمەن قوسا اسقار سارسەنبەكوۆ اتىنداعى ارنايى جۇلدەگە قوياندى اۋىلى №2 ورتا مەكتەبىنىڭ وقۋشىسى ايداميرا تۇرار لايىقتى دەپ تانىلدى. سۋرەت ونەرىندە باعىن سىناعان بىرنەشە ەلوردا ستۋدەنتى العىس حاتپەن ماراپاتتالدى, سونداي-اق, وسى بايقاۋعا قاتىسقان بارلىق قاتىسۋشىعا ارنايى سەرتيفيكات تابىس ەتىلدى.
گۇلدەن ەربولقىزى
