ءتورت تۇلىك مالدىڭ اسىلى – جىلقىنىڭ ەتى مەن ءسۇتىنىڭ ءدارۋ ەكەنى ەرتەدەن بەلگىلى.
بۇگىندە بيە بايلاپ, قىمىز باپتاپ, شارۋا جايىن بىلگەندەر ازايىپ بارادى. بەرەكەلى سۋسىندى ساعىنعاندا بازارعا بارامىز. وكىنىشكە وراي, ناعىز قىمىزدىڭ شيرەگىنە دە كەلمەيتىن سۋسىندى ىشۋگە ءماجبۇرمىز. ءبىر جىلدارى بازاردان ساتىپ العان اششى قىمىزدى ىشە-ىشە اسقازانىمدى اۋىرتقانىم بار. ەمدىك سۋسىننىڭ كەسەلگە اينالۋىنا نە سەبەپ بولدى؟ الدىمەن, الىس اۋىلداردان قىمىزدى قالاعا جەتكىزۋدە كىنارات بار. كۇننىڭ ىستىعىندا اشىعان قىمىزدى اشۋىن باسىپ, تۇشىتاتىن تەحنولوگيانى قولدانۋدى ساتۋشىلار قاپەرىنە ىلمەيدى. ولارعا قىمىزدىڭ تەز ساتىلىپ كەتكەنى كەرەك. پايداسىنا قىزىققاندار قىمىزعا سۋ قۇيىپ تا قۋلىعىن اسىرعىسى كەلەدى. سودان قىمىزدىڭ قادىرى كەتەدى. بابىمەن جاسالعان ءدامدى قىمىز ءىشىپ تۇشىنباعان ادام ەكىنشى قايتىپ قىمىزعا بەتتەمەيدى. الدا-جالدا تويلاردا قىمىز ۇسىنسا, ۇركە قاراپ, سۇيىكتى استى ءسىمىرىپ ىشپەيتىنىمىزدىڭ ءبىر سەبەبى وسىندا جاتىر. اراق-شاراپسىز توي وتكىزۋدىڭ ءبىر امالى قىمىزدى لايىقتاپ ناسيحاتتاي الماي ءجۇرمىز.
ىشىمدىكسىز وتپەيتىن تويلاردا داستارحانعا قىمىزدى دا قوسا قويۋ ءۇردىس الىپ كەلە جاتسا دا, سارى قىمىز اراقتان باسىپ وزعان جوق. قىمىزدىڭ باعاسىنىڭ قولجەتىمدى بولۋىنىڭ دا ماڭىزى بار. ارينە, ادال استىڭ تىم ارزان بولۋى مۇمكىن دە ەمەس بولار. دەگەنمەن, قالا بيۋدجەتى تاراپىنان سۋسىن وندىرۋشىلەرگە قولداۋ كورسەتىپ, شارۋاشىلىقتارىن تۇزەۋدىڭ جاعدايىن جاساسا, ەمدىك قاسيەتى بار بەرەكەلى سۋسىن اۋىزىمىزعا تيەر ەدى. ازىرگە ونى ەسكەرىپ جاتقان ەشكىم جوق. سودان دا ونىڭ قادىرىن ءبىلىپ, ءوسىپ كەلە جاتقاندار از. دەمەك, بۇگىنگى كۇندە قىمىزدى كوپتەپ ءوندىرىپ, بولاشاق ۇرپاقتى شەتەلدىڭ ەمەس, ءتول سۋسىنىمىزعا تەلىمەسەك, قىمىزعا سۇرانىس تا ازايىپ, بۇل كاسىپتىڭ دامۋىنا كەرى اسەرى تيەدى.
باس قالامىزدىڭ تۋريستىك الەۋەتى دە ارتىپ كەلەدى. جاڭا عاسىردىڭ اسەم قالاسىنىڭ كوركىنە ساي بولىپ, ناعىز قازاقى ءدامىن برەندكە اينالدىرۋ ءۇشىن كوپ جۇمىس ىستەۋ كەرەك.
سەيىلبەك ۋسين,
ۇلى وتان سوعىسىنىڭ ارداگەرى
