مەنىڭشە, بارشا بالا بىتكەننىڭ ءبىر ارمانى بار. ول – استاناعا كەلىپ, «بايتەرەكتى» كورىپ, «حان شاتىردا» ءجۇرىپ, ەسىلدىڭ بويىن كەمەمەن ءجۇزىپ ارالاۋ. وتكەن دەمالىستا اۋىلدان كەلگەن جيەندەرىمدى قارسى الىپ, قالانى كورسەتتىم. وسى ەكى كۇندە ەلوردانىڭ ىشكى تۋريزمدەگى جەتىستىكتەرىن باعالاۋعا مول مۇمكىندىك بولدى.
العاشقى كۇندەرى ەسىلدىڭ جاعالاۋى مەن ورتالىق باقتا سەيىلدەسە, مۇراجايلاردى دا ارالاپ تانىمىن كوتەردى. كەشكىسىن كينوتەاترعا بارىپ, شەتەلدىڭ مۋلتفيلمىن تاماشالادىق. ءبىر قىزىعى, فيلم باستالماس بۇرىن, ون مينۋتتاي باسقا ەلدىڭ كينو تۋىندىلارىنىڭ جارناماسىن بەردى. ءوزىمىزدىڭ كينو ءوندىرىسىمىزدىڭ ارتتا قالعانى وسىندايدا بىلىنەدى. جات سانانى قايماعى بۇزىلماعان اۋىلدىڭ بالاسىنىڭ ساناسىنا ءسىڭدىرىپ, وزگەشە ويلاۋعا وسىلايشا «اتسالىستىق». وزگە ەلدىڭ ەرتەگىلەرىنىڭ كەيىپكەرلەرىن ناسيحاتتاۋدا الدىمىزعا جان سالمايدى ەكەنبىز. ويىن-ساۋىق ورتالىقتارىندا بالالار قيالىنا تامىزىق بولاتىن ۇلتتىق بەلگىسى بار نىشان جوق. بەينە ءبىر باسقا ەلدىڭ ەرتەگى الەمىنەن كەلگەندەي. ول ازداي, «دۋمان» ويىن-ساۋىق ورتالىعىندا قىزعىلت ءتۇستى سۋاستى قۇبىجىعى ورىسشا سايراپ تۇر. ال قوناقتارىم قايدا كەلگەنىن بىلمەي اڭتارىلدى.
ويىن-ساۋىق ورتالىقتارىنان ءوزگە مادەنيەتتىڭ قىسپاعىن سەزىنگەن جيەندەرىمنىڭ «بايتەرەكتى» كورگەندەگى ءساتتەرىن ايتساڭىزشى! بالاقانداردىڭ بۇل شاتتىعى وتانىنا دەگەن سۇيىسپەنشىلىككە اينالاتىنى ءسوزسىز. ءوز ەلىنىڭ, ءوز جەرىنىڭ ۇلتتىق بوياۋىن بويىنا ءسىڭىرۋ ءۇشىن استاناداعى كەيبىر ويىن-ساۋىق ورتالىقتارى مەنەدجەرلەرى ەشقانداي ءىس جاساپ جاتقان جوق. جەكە يەلىكتەگى بولسا دا, ولاردىڭ ۇسىناتىن قىزمەتى ۇلتتىق بولمىسىمىزعا ساي بولۋى كەرەك.
ناريما مۇحامبەتالينا, استانا قالاسىنىڭ مادەنيەت, مۇراعاتتار جانە قۇجاتتاما باسقارماسى باسشىسىنىڭ ورىنباسارى:
– قالاداعى ءىرى ويىن ورتالىقتارىنىڭ بەزەندىرىلۋىنە جەكە مەنشىك يەلەرى جاۋاپ بەرەدى. دەگەنمەن, بالالارعا تارتىمدى ەتىپ ويىن الاڭدارىنا ۇلتتىق ەرتەگى-اڭىزداردىڭ كەيىپكەرلەرىن قويسا, جاقسى-اق بولار ەدى.
جاس ءسابيدىڭ استاناداعى كۇندەرىنىڭ وشپەيتىن اسەرىن قالدىرۋ ءۇشىن ويىن الاڭدارىن كوركەم بەزەندىرۋدە, مادەني شارالارى ۇلتتىق مادەنيەت نەگىزىندە بولۋىن قاداعالاۋ كەرەك. قازاقى سانامىزعا جات نارسە دەپ ۇلكەندى-كىشىلى مۋلتفيلم كەيىپكەرلەرىن ايتار ەدىك. قالقالايتىن باسقاسى بولماعان سوڭ, شرەك, فيونا سياقتىلاردىڭ تاساسىندا تۇرىپ سۋرەتكە تۇسەدى. اۋىلدىڭ بالاسى استاناعا كەلىپ, وزگە مادەنيەتتىڭ ۇشقىنىن كورگەندە, دىلىندە سىزات پايدا بولادى. دەمەك, بالالاردىڭ دەمالىسىن وتكىزۋگە قاتىسى بار بارلىق مەكەمەلەردىڭ, ورتالىقتاردىڭ «كوسموپوليتتىك» ماسكاسىن الىپ تاستاپ, قازاقى سانامىزعا جاقىنداتۋ قاجەت دەپ ويلايمىن.
ايگۇل ۋايسوۆا