كەشە ەلوردا ىرگەسىندەگى قاراوتكەل كەنتىندەگى 5573-اسكەري بولىمىندە قر ۇلتتىق ۇلان باس قولباسشىسىنىڭ جۇلدەسى ءۇشىن «اسكەري كەرنەي» فەستيۆالىنىڭ مەرەكەلىك ساپتىق كونتسەرتى سالتاناتتى تۇردە اشىلدى. استانا اكىمدىگىنىڭ قولداۋىمەن وتكەن يگىلىكتى شارا – قازاق حاندىعىنىڭ 550 جىلدىعى مەن ۇلى جەڭىستىڭ 70 جانە اتا زاڭىمىزدىڭ 20 جىلدىعىنا ارنالدى.
وسىمەن ءتورتىنشى مارتە ءوتىپ وتىرعان مەرەيلى بايقاۋعا ەلىمىزدەگى ۇلتتىق ۇلان وڭىرلىك قولباسشىلىقتارى, مەملەكەتتىك كۇزەت قىزمەتى مەن ۇقك شەكارا قىزمەتىنىڭ جانە رەسەي فەدەراتسياسى ءىىم ىشكى اسكەرلەرىنىڭ «سولتۇستىك-باتىس» وڭىرلىك قولباسشىلىعى شتابىنىڭ (سانكت-پەتەربۋرگ) وركەسترلەرى قاتىستى. فەستيۆال اياسىندا ون اسكەري ۇجىم كوپشىلىك الدىندا ءوز ونەرلەرى مەن كاسىبي شەبەرلىكتەرىن سىنعا سالىپ, ءار شىعارمانى ۇيلەسىمدى ورىنداۋ مانەرىمەن سايىسقا ءتۇستى. تاڭەرتەڭ قاراوتكەلدەن باستالعان مادەني شارا كەشكە دەيىن جالعاسىپ, قالاداعى ەسىل وزەنىنىڭ جاعاسىنداعى وقۋشىلار مەن «جاستار» سارايلارى جانە «قازاقستان» سپورت كەشەنىنىڭ الدىنداعى الاڭداردا كونتسەرتتىك باعدارلامالارىن جۇرتشىلىق نازارىنا ۇسىندى.
بايقاۋعا قاتىسقان اسكەري ۇجىمدار بارلىعى بۇگىن كەشكى 18.00-دە ەلوردا اكىمشىلىگىنىڭ الدىندا مەرەكەلىك ساپتىق كونتسەرت وتكىزبەك.
ازامات ەسەنجول
