ساراپشىلار قيىن جاعدايداعى ەلوردالىق وتباسىلاردى قارجىلىق ساۋاتتىلىققا ۇيرەتەدى

«اMANAT» پارتياسى مەملەكەت باسشىسىنىڭ تاپسىرماسىن ىسكە اسىرۋ ءۇشىن بىلتىردان باستاپ ازاماتتارعا قارجىلىق ءبىلىم بەرۋ ماقساتىندا «قارىزسىز قوعام» جوباسىن ىسكە اسىرا باستادى. اتالعان جوبا اياسىندا استانا قالاسى بويىنشا بيىل 9300 ازاماتتى قارجىلىق ساۋاتتىلىققا وقىتۋ جوسپارلانىپ وتىر, دەپ حابارلايدى astana-akshamy.kz.

ءدال قازىرگى تاڭدا ونىڭ 1500-گە جۋىعى سەمينارلاردا ءدارىس الىپ شىقتى.

جالپى, جوبانىڭ ماقساتى – مەملەكەتتىك ورىندارمەن بىرلەسە وتىرىپ, حالىقتىڭ ءال-اۋقاتىن كوتەرۋگە, ازاماتتاردىڭ ءومىر ءسۇرۋ ساپاسىن ارتتىرۋعا ىقپال ەتۋ.

«قارىزسىز قوعام» جوباسىن جۇزەگە اسىرۋ ءۇشىن التى باعىت جاساقتالعان. «امانات» پارتياسى استانا قالاسى فيليالى اتقارۋشى حاتشىسىنىڭ مىندەتىن اتقارۋشى مۇحاممەد بولىسبەك جوبانىڭ نەگىزگى باعىتتارىنا توقتالدى.

«ءبىرىنشى باعىت بويىنشا «قارىزسىز قوعام» ءبىلىم بەرۋ جوباسىنىڭ اۋقىمىن كەڭەيتۋ ءۇشىن ىنتىماقتاستىق مەموراندۋمى جاسالدى. ەكىنشى باعىت جوبالار كوماندالارىن قۇرۋعا ارنالدى. ءۇشىنشى باعىت حالىقتىڭ قارجىلىق ساۋاتتىلىعىن ارتتىرۋعا باعىتتالعان. ال ءتورتىنشى باعىتتىڭ ماقساتى ازاماتتاردىڭ بانكتىك قارىزدارى مەن شاعىن نەسيەلەرى بويىنشا پروبلەمالىق بەرەشەكتەرىن رەتتەۋ بولىپ سانالادى. سونداي-اق بەسىنشى باعىت جۇمىسپەن قامتۋ جانە بيزنەس جۇرگىزۋ ماسەلەرى بويىنشا كەڭەستەر بەرۋگە جانە التىنشى باعىت زاڭنامانى جەتىلدىرۋگە ارنالعان», – دەدى سپيكەر.

جوبا ۇيىمداستىرۋشىلارىنىڭ مالىمەتىنشە, قارجىلىق ساۋاتتىلىقتى ارتتىرۋعا ارنالعان كۋرستار بەس كۇنگە سوزىلادى ءارى تەگىن وقىتىلادى. مامانداردان قۇرالعان توپ تەك قالالاردا عانا ەمەس, سەگىز ايماققا شىعىپ, سونىڭ ىشىندە اۋىلدىق جەرلەردە وقۋ سەمينارلارىن وتكىزدى. وندا ازاماتتار كىرىستەر مەن شىعىستاردى جوسپارلاۋ, نەسيەلەردى وتەۋ مەن تاۋەكەلدەردى باسقارۋ, سونداي-اق جيناق اقشالارىن قارجى قۇرالدارىنا ساۋاتتى سالۋ بويىنشا ءبىلىم الۋعا مۇمكىندىك الادى. مۇندا تەك كەڭەس الىپ قانا قويماي, بارلىق نيەت بىلدىرۋشىلەر ءوز ءىسىن اشۋ ءۇشىن ءوز بيزنەس-جوسپارىن تۇزۋگە دە ۇيرەنەدى.

«جوبا شەڭبەرىندە قاتىسۋشىلار بىلىكتى زاڭگەرلەردىڭ اقىسىز كومەگىنە دە جۇگىنە الادى. ماسەلەن, مەملەكەت باسشىسىنىڭ تاپسىرماسىنا سايكەس, قيىن جاعدايلارعا تاپ بولعان وتباسىلاردىڭ نەسيەسى كەشىرىلىپ, جەكە تۇلعالاردىڭ بانكروتتىعى تۋرالى زاڭ قابىلدانعانى بەلگىلى. ال قارىزعا بەلشەسىنەن باتقان جان وسى ساناتقا كىرە مە, جوق پا, مامانداردىڭ كومەگىمەن انىقتالىپ, پارتيا, اكىمشىلىك, بانك بىرلەسكەن توپ ازاماتقا تىعىرىقتان شىعۋدىڭ جولىن نۇسقاۋعا كومەك كورسەتەدى. مىسالى, ءبىر ادامنىڭ باسىندا 8 نەسيەسى بولۋى مۇمكىن, مۇندايدا ماماندار وعان, ءبىرىنشى كەزەكتە قوماقتى قاراجاتتى تالاپ ەتەتىن نەسيەسىن الدىمەن وتەۋگە كەڭەس بەرەدى. ءىس-تاجىريبە ناتيجەسىندە وسىنداي قيىندىقتان شىققان ادامدار بار», – دەدى مۇحاممەد بولىسبەك.

ايتا كەتەيىك, استانا قالاسىندا قارجىلىق ساۋاتتىلىققا ۇيرەتەتىن ساراپشىلار قىزمەت ەتەدى. ولار ءار اپتادا جاڭا توپتى وقىتىپ شىعارۋدا.