شىعىس جۇرتى كوپتەن اسىعا كۇتكەن ەرتىستىڭ سول جاعالاۋىندا سالىنعان جاڭا مەشىت ەل يگىلىگىنە بەرىلدى. كولەمى جونىنەن استاناداعى «نۇر استانا» مەن ازىرەت سۇلتان مەشىتتەرىنەن كەيىنگى ورىندى يەلەنەتىن يماندىلىق ءۇيى وسكەمەندىك مۇسىلمانداردىڭ كوز قۋانىشىنا اينالدى.
«ءبىزدىڭ ولكە ءۇشىن بۇل تاريحي كۇن. ءدىنىمىزدى, ءداستۇرىمىزدى ساقتاۋ ءۇشىن وسىنداي ءزاۋلىم, سالتاناتتى مەشىت بۇرىننان قاجەت ەدى. «ەشتەن كەش جاقسى», وسىنداي قۋانىشتى كۇنگە جەتىپ وتىرمىز» دەدى مەشىتتىڭ اشىلۋ سالتاناتىندا شىعىس قازاقستان وبلىسىنىڭ اكىمى بەردىبەك ساپارباەۆ. عيمارات قۇرىلىسى 2009 جىلى باستالعان-دى. قارجى جەتىسپەۋشىلىگىنە بايلانىستى قۇرىلىسى ءۇش جىلعا سوزىلعان يماندىلىق ءۇيىنىڭ ەڭسە تىكتەۋىنە شىعىس جۇرتى جۇدىرىقتاي جۇمىلدى. وبلىس باسشىسى بەردىبەك ساپارباەۆتىڭ ارقاسىندا سوڭعى ءۇش ايدا عيمارات قۇرىلىسى قارقىن الىپ, 20 مىڭعا جۋىق ادام ساۋاپتى ىسكە ءوز ۇلەستەرىن قوستى.
جاڭا مەشىتتە ءبىر مەزەتتە ءۇش مىڭ ادام قۇلشىلىق جاساي الادى. ايەلدەر قۇلشىلىق ەتەتىن جەكە بولمە دە قاراستىرىلعان. سونىمەن قاتار قاتىمحانا, كىتاپحانا, نەكە زالى مەن سۇندەتتەۋ بولمەسى بار. مەشىتكە كەلۋشىلەردىڭ كولىكتەرىن قوياتىن اۆتوتۇراق تا جوسپاردان تىس قالماعان. مەشىت قۇرىلىسىنا 1,5 ميلليارد تەڭگە كولەمىندە قارجى جۇمسالدى.
«بۇل يماندىلىق ءۇيىن ەلىمىزدەگى ەڭ ۇلكەن مەشىتتەردىڭ ءبىرى دەگەنىمىز دۇرىس. عيماراتتىڭ جالپى بيىكتىگى – 20 مەتر, مۇنارالارىنىڭ بيىكتىگى – 63 مەتر. 63 – مۇحاممەد (س.ع.س.) پايعامبارىمىزدىڭ ومىردەن وزعان جاسىن كورسەتسە, مۇنارانىڭ جانىنداعى بەس كۇمبەز مۇسىلماننىڭ بەس پارىزىن ايگىلەيدى. جالپى اۋدانى 800 گەكتاردى قۇرايدى. عيماراتتىڭ ءبىرىنشى قاباتىندا ءۇش قاتىمحانا ورنالاسقان. ال ەكىنشى قاباتتا قۇران-كارىمدى ۇيرەنەتىن جانە وقيتىن ەكى سىنىپ بولمەسىمەن قاتار, دارەت الۋ ورنى قاراستىرىلعان. سونداي-اق, مىڭ جارىم ادامعا ارنالعان زال جۇمىس ىستەيدى. عيماراتتىڭ ءۇشىنشى قاباتىندا, بالكونىمەن قوسقاندا سىيىمدىلىعى 2500 ورىندى قۇرايتىن نامازحانا ورىن تەپكەن. ەر-ازاماتتار نەگىزگى زالدا ناماز وقىسا, ايەل ادامدار بالكوندا عيباداتتارىن جاسايدى» دەيدى قازاقستان مۇسىلماندارى ءدىني باسقارماسىنىڭ وسكەمەن ايماقتىق وكىل يمامى نۇرلان اسانوۆ.
Cۇبەلى ءسوز*
مۇحتار قۇل-مۇحامەد, مەملەكەتتىك حاتشى: «قۇتحانا قۇتتى بولسىن»
تەك قازاققا عانا ەمەس, بۇكىل تۇركى حالىقتارىنا التىن بەسىك بولعان قاسيەتتى مەكەن – التايدا ەلىمىزدەگى ەڭ ۇلكەن مەشىتتەردىڭ ءبىرى اشىلىپ وتىر. وسى قۇتحانالارىڭىز قۇتتى, قايىرلى بولسىن. ءبىز تاۋەلسىزدىك العانعا دەيىن بۇكىل ەلىمىزدە الپىسقا جۋىق قانا مەشىت بولاتىن. تاۋەلسىزدىك العاننان كەيىن ەلباسىمىز ءاربىر ازاماتقا ءوزىنىڭ عازيز ءدىنىن, مۇباراك ءدىنىن ۇستانۋىنا جاعداي جاسادى. سونىڭ ارقاسىندا, ەلىمىزدە بۇگىنگە دەيىن 2500-گە جۋىق مەشىت اشىلدى. وسىنىڭ بارلىعى ەلىمىزدىڭ بەرەكە-بىرلىگىن ارتتىراتىن جاعداي. سوندىقتان بارلىعىڭىزدى بۇگىنگى بولىپ جاتقان قاسيەتتى شارامەن شىن جۇرەكتەن قۇتتىقتايمىن.
دۋلات يسابەكوۆ, جازۋشى, دراماتۋرگ, مەملەكەتتىك سىيلىقتىڭ يەگەرى: «مەشىت كوبەيسە, بەسىك تە كوبەيەدى»
شىعىستا يەرۋساليمدەگى «ال-اقساعا» ۇقسايتىن, استانامىزداعى ازىرەت سۇلتان مەشىتىنە ۇقسايتىن ساۋلەتتى دە كورىكتى مەشىت بوي كوتەرىپ وتىر. ارينە, ەلىمىزدە باسقا مەشىتتەر دە سالىنىپ جاتىر, الايدا بۇل عيماراتتىڭ ورنى بولەك. مۇنىڭ ءبارى تاۋەلسىزدىگىمىزدىڭ ارقاسى, ايتپەسە, باياعى زامان بولسا, مۇنداي قۇرىلىستى سالامىز دەگەن وي ءۇش ۇيىقتاساق تۇسىمىزگە دە كىرمەس ەدى عوي. بۇل كۇن مەملەكەتىمىزدىڭ تاريحىندا قالاتىن ماڭىزدى كۇن بولماق. ەلىمىزدە مەشىت كوبەيە بەرسىن, مەشىت كوبەيسە, بەسىك تە كوبەيمەك.
