استانا قالاسى تۋعان كۇنىنە ەرەكشە دايىندالىپ جاتىر. تۇرعىندار مەن قوناقتار نەشە ءتۇرلى مەرەكەلىك شارالارعا قاتىسىپ, كوڭىل كوتەرىپ قانا قويمايدى, ادەمى بەزەندىرىلگەن عيماراتتارعا دا كوزدەرى سۇيسىنەتىن بولادى.
ەلوردانىڭ اجارىن ايشىقتاي ءتۇسۋ ءۇشىن عيماراتتاردىڭ قاسبەتتەرى جارق-جۇرق ەتكەن كونسترۋكتسيالار مەن شاعىن ساۋلەتتى پىشىندەرمەن كوركەمدەلمەك.
ايتالىق, الماتى اۋدانىندا 21 جارىق ديناميكالىق پاننو مەن 375 كرونشتەين ورناتىلعان. باستى كوشەلەرگە كونسولدىك تۋلار, ال بەيبىتشىلىك پەن كەلىسىم سارايىنىڭ جانە «جەرۇيىق» پاركىنىڭ الدىنا تۋ پاننولارى قويىلدى. الداعى ۋاقىتتا ساياباقتارداعى شامدار مەن قالا كوپىرلەرى مەرەكەگە وراي گۇل شارلارمەن بەزەندىرىلەدى.
جالپى, «الماتى» اۋدانىنىڭ اۋماعىندا شاعىن ساۋلەتتىك ءپىشىننىڭ 22 جيىنتىعى ورناتىلىپ, عيماراتتاردىڭ قاسبەتتەرى ارلەنەدى.
ال ەسىلدىڭ سول جاعالاۋىنداعى كەرەمەت شارلار مەن تىرنالار كوزدىڭ جاۋىن الاتىنىن جۇرتشىلىق كورىپ ءجۇر. بارشانىڭ كوزايىمىنا اينالعان «I Love Astana» كونسترۋكتسيالارى ەسىل وزەنىنىڭ جاعاسىنا, استانالىق پاركتە, قابانباي باتىر داڭعىلى مەن كەرەي, جانىبەك حاندار كوشەسىنىڭ قيىلىسىندا, «جان جۇرەگىم استانا» – «استانا وپەرا» تەاترىنىڭ جانىندا, «كەرۋەن» ساۋدا, ويىن-ساۋىق ورتالىعىنىڭ جانىندا جانە تۇران داڭعىلى مەن سىعاناق كوشەسىنىڭ قيىلىسىندا «يا ليۋبليۋ استانۋ» كونسترۋكتسياسى ورناتىلدى.
ەلوردانىڭ تۋعان كۇنىنە وراي اعاشتار دا بەزەندىرىلەدى. «قۇرمانعازى» گۇلباعىندا دەكوراتيۆتىك راسىمدەۋ جۇمىستارى جۇرگىزىلۋدە. «اراي», «عاشىقتار» پاركتەرىندە, «استانالىق تسيرك» گۇلباعىندا, «استانا وپەرا» تەاترى اۋدانىنداعى گۇلباقتا جانە ەسىل اۋدانى اكىمدىگىنىڭ جانىندا جارىقتاندىرۋ تىرەكتەرىندە كرونشتەيندەر بەزەندىرىلىپ جاتىر.
«حان شاتىر» ساۋدا, ويىن-ساۋىق ورتالىعىنا قارسى جەراستى وتكەلى, «استانا وپەرا» تەاترىنىڭ الدىنداعى كوپىر, ورىنبور كوشەسىندەگى ەكى جاياۋ جۇرگىنشىلەر كوپىرى مەن «قازمۇنايگاز» كوپىرى, سىعاناق كوشەسىندەگى «ترانسترويموست» كولىك جولايىرىعى ادەمى جارىقتاندىرىلاتىن بولادى. مۇنىمەن قوسا, تۇرعىن ۇيلەردىڭ قاسبەتتەرىن بەزەندىرۋ بويىنشا جۇمىستار جۇرگىزىلۋدە.
سارىارقا اۋدانىنىڭ اكىمدىگى ورتالىق كوشەلەردى, الاڭدار مەن مەرەكەلىك شارالار وتەتىن ورىنداردى بەزەندىرۋدى قولعا الدى. وسىلايشا, ەسىل وزەنىنىڭ جاعاسىندا اركا ورناتىلىپ, جاياۋ جۇرگىنشىلەر كوپىرى بەزەندىرىلدى, قالالىق الاڭدا تۋ كونسترۋكتسيالارى مەن ساۋدا شاتىرلارى بولادى.
اۋدان اۋماعىندا «كوبەلەك», «كوبەلەكتىڭ ۇشۋى», «استانا كۇنى», «كەمپىرقوساق», «ءجۇزىمنىڭ ساباعى», «گەومەتريالىق توننەل», «ستيلدەنگەن جانۋارلار», «كىلت», «گۇل اركالارى», «كوشە جيھازى» جانە تاعى باسقا دا شاعىن ساۋلەتتىك پىشىندەر ورناتىلادى.
ال تەمىرجول ۆوكزالىنىڭ جانىندا, قالالىق الاڭدا, ەسىل وزەنىنىڭ جاعالاۋىندا, قر قارجى مينيسترلىگى عيماراتىنىڭ جانە اباي ەسكەرتكىشىنىڭ جانىندا قالا تۇرعىندارى مەن قوناقتارى «ينستاگرام» جانە «استانالىق فوتو» گرينوبۋستارىمەن (فوتوستەندىمەن) ەستەلىككە سۋرەتكە تۇسە الادى.
