استانا قالاسى ءماسليحاتىنىڭ توراعاسى ەرلان كاناليموۆ باستاعان ءبىر توپ دەپۋتات «ارت سپورت» باعدارلاماسى بويىنشا ەلوردادا مەملەكەتتىك شىعارماشىلىق تاپسىرىستىڭ ورىندالۋ بارىسىمەن تانىسۋ ماقساتىندا بىرقاتار نىساندى ارالادى.
بەلگىلى مۋزىكانت شولپان قورعانبەك 500 بالانى دومبىرا, جەتىگەن سياقتى ۇلتتىق اسپاپتار مەن پيانينو سەكىلدى كلاۆيشتىك اسپاپتاردا ويناۋعا, ءان ايتۋ مەن ءتۇرلى ۇلتتىڭ بيىنە باۋلىپ وتىر. سول ءۇشىن №52, 61, 67, 76 مەكتەپتەردە ءتيىستى ۇيىرمەلەردى اشتى. سونىڭ ىشىندە ءماسليحات دەپۋتاتتارى ءى.ەسەنبەرلين اتىنداعى №67 گيمنازياداعى ۇيىرمەمەن تانىستى. وسى مەكتەپتە جالپى 200-گە جۋىق بالا شولپان قورعانبەكتىڭ ۇيىرمەسىنە قاتىسادى. مۋزىكانت سول ءۇشىن ءۇش بولمەنى جالعا الىپ, قاجەتتى مۋزىكالىق اسپاپتارمەن قامتاماسىز ەتكەن.
«مۇعالىم بولىپ جۇمىس ىستەپ كەلە جاتقانىما 36 جىل بولدى. ۇستازدىقتا ءبىراز تاجىريبە جيناقتادىم دەپ ويلايمىن. شىنىن ايتقاندا, وسى ۇيىرمەلەردى تابىس, پايدا تابۋ ءۇشىن ەمەس, بالالار مۋزىكالىق ءبىلىم السىنشى دەگەن ىزگى نيەتتەن اشتىم. بۇل ءوز ناتيجەسىن بەرىپ كەلە جاتىر, تاربيەلەنۋشىلەرىم قالالىق, رەسپۋبليكالىق بايقاۋلاردا عانا ەمەس, شەتەلدەردە وتەتىن حالىقارالىق بايقاۋلاردا دا توپ جارىپ ءجۇر» دەدى شولپان قورعانبەك.
ونىڭ ايتۋىنشا, ەلەكتروندى جۋرنالعا تىركەۋمەن ماسەلەلەر تۋىنداپ جاتادى. ونىڭ ۇيىرمەلەرىنە باراتىن اتا-انالاردىڭ كوبىنىڭ بۇعان مۇمكىندىگى جوق.
جەكە كاسىپكەر لانا بولاتوۆا بەينەلەۋ ونەرى, زاماناۋي ەسترادا ءبيى, بالەت, اكتەرلىك شەبەرلىك, شاحمات, دومبىرا باعىتتارى بويىنشا جۇمىس ىستەيدى. ءماسليحات دەپۋتاتتارى ۇيىرمەلەردى ارالاپ, مۇنداعى جۇمىستى جاقسى دەپ باعالادى. ءبىر قىزىعى, «ارت سپورت» باعدارلاماسىنىڭ تالاپتارى بويىنشا شاحماتپەن اينالىساتىن بالالار ءۇشىن دۋش بولۋى كەرەك. جەكە كاسىپكەر ونى دا ورناتقان.
ونىڭ ايتۋىنشا, «ارت سپورت» تالابىنىڭ ءبىرى – شاحمات جاتتىقتىرۋشىسى ديپلوم بويىنشا دەنە شىنىقتىرۋ ءپانىنىڭ مۇعالىمى بولۋى كەرەك. بىراق ءدال شاحماتتان ساباق بەرەتىن سونداي مۇعالىم قازىر تابۋ قيىن, جاتتىقتىرۋشىلاردىڭ اراسىندا تەحنيكالىق ءبىلىم العاندار دا بار. سوندىقتان وسى ماسەلەنى قايتا قاراۋ كەرەك.
ءماسليحات دەپۋتاتتارى كەسكىندەمە, بەينەلەۋ ونەرىنە 417 بالانى باۋلىپ وتىرعان «شاياحمەت» جك جانە «لاۋرا ابات» ونەر ورتالىعىنىڭ جۇمىسىمەن دە تانىستى. ونەر ورتالىعىنا قاتىساتىن بالالاردىڭ جالپى سانى – 587. ولار بيمەن, ءان ايتۋمەن جانە دومبىرا ۇيرەنۋمەن اينالىسادى. قازىر تاعى ءبىر باعىت – اكتەرلىك شەبەرلىك قوسىلىپ جاتىر. وسىنداعى ۇيىرمەلەرگە كەزەكتە تاعى 239 بالا تۇر.
«بۇل ماسەلەدە بەكىتىلگەن ءىس-شارالارعا سايكەس تولىق ءتارتىپ بولۋى كەرەك. ءۇي-جايلاردا بەينەباقىلاۋ كامەرالارىنىڭ ورناتىلۋى, ساباققا قاتىسۋدى ەسەپكە الۋ جۋرنالدارىنىڭ جۇرگىزىلۋى, سەكتسيالار مەن ۇيىرمەلەر قاجەتتى قۇرال-جابدىقتارمەن جابدىقتالۋى ءتيىس. دەپۋتاتتىق كورپۋستىڭ باستاماسىمەن جاقىن ارادا ەلوردادا «ارت سپورت» ديرەكتسياسى ءوز جۇمىسىن باستايدى. ونىڭ باستى ماقساتى – بالالارىمىزدىڭ سپورتپەن شۇعىلدانۋىنا بولىنگەن قاراجاتتىڭ ماقساتتى پايدالانۋىن باقىلاۋ» دەدى قالالىق ءماسليحات توراعاسى ەرلان كاناليموۆ.
29 ناۋرىز كۇنى استانا قالاسى ءماسليحاتىنىڭ كەزەكتى سەسسياسى وتەدى. وندا قارالاتىن ماسەلەنىڭ ءبىرى – مەملەكەتتىك سپورتتىق جانە شىعارماشىلىق تاپسىرىستى ىسكە اسىرۋ بارىسى.
