كەشە قازاقستان مۇسىلماندارى ءدىني باسقارماسىنىڭ كورپوراتيۆتىك «زەكەت» قورىنىڭ قالالىق وكىلدىگى مەن «نۇر استانا» ورتالىق مەشىتىنىڭ ۇيىمداستىرۋىمەن «مەيىرىمدىلىك مەكەنى» اتتى قايىرىمدىلىق اكتسياسى ءوتتى.
اتالعان شاراعا كوپبالالى, الەۋمەتتىك جاعىنان از قامتىلعان 100 وتباسى شاقىرىلىپ, ارقايسىسىنا 100 مىڭ تەڭگە كولەمىندە قارجىلاي كومەك بەرىلدى. سونداي-اق, وقىرماننىڭ ءدىني ساۋاتىن اشاتىن كىتاپتار تاراتىلدى.
«كوپ بالالىمىز. بەسىنشى بالاعا اياعىم اۋىر. پاتەر جالداپ تۇرامىز. كەشە عانا جولداسىم مەشىتكە بارعاندا, جاعدايىمىزدى جازىپ, قانداي دا ءبىر جاردەم سۇراعان. جارتى ساعاتتان كەيىن «زەكەت» قورىنىڭ ۇيىمداستىرۋشىلارى حابارلاسىپ, ءبىزدى وسى اكتسياعا شاقىرعاندا قاتتى قۋانىپ قالدىق. جالعىز ءبىز ەمەس, قانشاما كومەككە مۇقتاج وتباسىلار جينالعان ەكەن. بىرەۋىنىڭ بالاسى مۇگەدەك, تاماققا اقشا تاپپاي جۇرگەن دە بار. قارا باسىن عانا ەمەس, قالىڭ كوپتى ويلايتىن جاناشىرلارعا ۇلكەن راقمەت!» دەيدى استانالىق انا گۇلبانۋ ابدىحالىقوۆا.
«قاسيەتتى قۇراندا ناماز وقىپ, زەكەت بەرۋ بۇيىرىلعان. قۇدايعا سەنگەن ءار پەندە اللانىڭ رازىلىعى ءۇشىن ناماز وقيدى, باي-داۋلەتتى ادامدار ءوزىنىڭ مال-دۇنيەسىنەن جاعدايى تومەندەرگە زەكەت بەرەدى. زەكەتتىڭ ءۇش ءتۇرلى ماعىناسى بار: تازالانۋ, كوبەيۋ, ساليقالى بولۋ. ياعني, بەرگەن جاننىڭ تۇلا بويى تازارىپ, ساليقالى قۇرمەتكە يە بولادى, العان قولدىڭ تۇرمىسى تۇزەلە تۇسەدى» دەگەن قمدب-نىڭ نايب ءمۇفتيى, «نۇر استانا» ورتالىق مەشىتىنىڭ باس يمامى ناۋرىزباي قاجى تاعانۇلى بارشانى رامازان ايىمەن قۇتتىقتاپ, ىزگى نيەتتەرىنىڭ قابىل بولۋىن تىلەدى.
ءمادينا جاقىپ
