نۇر-سۇلتان قالاسىندا كوكتەمگى سۋ تاسقىنىنا بايلانىستى كەشەندى جۇمىستار ءجۇرىپ جاتىر. ەلوردانىڭ ءار اۋدانىندا توتەنشە جاعداي دەپارتامەنتىمەن بىرلەسكەن شتاب قۇرىلىپ, قاۋىپتى دەگەن ۋچاسكەلەردى تەكسەرۋ جۇرگىزىلۋدە.
بايقوڭىر اۋدانى اكىمىنىڭ اپپاراتى مەن وسى اۋداننىڭ تج باسقارماسىمەن بىرلەسىپ سۋ باسۋ قاۋپى بار ۋچاسكەلەرىنە تەكسەرۋ جۇمىستارىن جۇرگىزدى. تەكسەرۋ بارىسىندا وسى ساناتقا جاتاتىن بىرنەشە ۋچاسكە بار ەكەنى بەلگىلى بولدى. قازىرگى شاقتا بارلىق ۋچاسكەلەردە سۋ تاسقىنىنا قارسى شارالار قابىلدانۋدا. اقپان ايىنان باستاپ كوكتەمگى كەزەڭدە ەرىگەن قار سۋىن جۇرگىزۋ ءۇشىن ارىق-ناۋا جەلىلەرىن قار مەن مۇزدان تازارتۋ جۇمىستارى جۇرۋدە.
بۇگىننىڭ وزىندە ارىق-ناۋا جەلىسىنىڭ 17000 مەترى تازارتىلعان. سول سەكىلدى 500 تەكشە مەتر ۇساق قيىرشىق تاس پەن 1000 قاپ قۇم دايىندالعان. اۋدان اۋماعىنداعى 30 اسسەنيزاتورلىق كولىكتەر سۋ تاسقىنىنىڭ الدىن الۋعا جۇمىلدىرىلعان.
سول سياقتى سارىارقا اۋدانىندا اۋدان اكىمى ج.جۇماعۇلوۆ باستاعان اكىمدىك وكىلدەرى مەن «Elorda Eco System» مەكەمەسى سۋ تاسقىنى ىقتيمال اۋماقتاردى ارالاپ شىققان.
اكىمدىكتىڭ مالىمەتىنشە, بيىل سۋ باسۋ مۇمكىندىگى بار نەگىزگى 3 ايماق بەلگىلەنگەن. ولار: «اگروگورودوك» ت/ا, ءجۇنىسوۆ جانە پاۆلوۆ كوشەلەرى, قاراۋىل مەن مىڭارال كوشەلەرىندەگى جەكە سەكتورلار. ونىمەن قوسا, اۋداندا كوكتەمنىڭ باسىندا سۋ دەڭگەيى كوتەرىلەتىن 4 ورىن بار. اتالمىش اۋداندا جىل باسىنان بەرى ۇزىندىعى 16730 مەتر (35 كوشە) بولاتىن ارىق-ناۋا جەلىسى تازارتىلىپ, قار شىعارۋ جۇمىسى قارقىندى جۇرۋدە.
مۇنداي شارالار الماتى اۋدانىندا دا وتكەن. اكىمدىكتىڭ ايتۋىنشا, سۋ جايىلۋ قاۋپى بار 7 ۋچاسكە بەلگىلەنىپ وتىر. ۇزىندىعى 8 شاقىرىمعا سوزىلعان ارىق-ناۋا جەلىسى ارتىق زاتتاردان ارىلعان. قار ۇيىندىلەرىن شىعارۋ ءىسى بەكىتىلگەن كەستەگە سايكەس جۇرگىزىلۋدە.
ال ەسىل اۋدانى اكىمدىگىنىڭ مەردىگەرلىك ۇيىمدارى تاۋلىك بويى ەرىگەن سۋدى سورۋمەن اينالىسۋدا. سوڭعى كۇننىڭ وزىندە 4 مىڭ تەكشە مەتر سۋ سورىلعان. سونىمەن بىرگە اكىمدىك قار جاۋعان كەزدە الەۋمەتتىك نىسانداردىڭ كىرەبەرىس جولدارىنا ەرەكشە كوڭىل ءبولىپ, ۇزاتپاي قاردى شىعارىپ وتىرعان.
بايجان ەمبەردى
