جاقىندا وتكەن قازاقستان تاريحىن زەردەلەۋگە ارنالعان ۆەدومستۆوارالىق جۇمىس توبىنىڭ وتىرىسىندا مەملەكەتتىك حاتشى مارات ءتاجين بۇل ماسەلەگە جاڭاشا كوزقاراس قالىپتاستىرۋ قاجەتتىگىن ايقىندادى. وسىعان بايلانىستى استانا قالاسى اكىمىنىڭ ورىنباسارى ايدا بالاەۆا جينالىس وتكىزىپ, اتقارىلار جۇمىستار اياسىن بەلگىلەدى.
اتاپ ايتساق, حالىق دەمالاتىن جانە ساۋدا ويىن-ساۋىق ورتالىقتارىندا قازاقستان تاريحىن تانىتۋعا ارنالعان ۆيكتورينالار وتكىزىلمەك. سونداي-اق, تاريح مۇعالىمدەرىنىڭ بىلىكتىلىن ارتتىرۋ كۋرستارى, «ۇزدىك تاريح مۇعالىمى» كونكۋرسى ۇيىمداستىرىلىپ, ۇلت تاريحىن وقىتۋ ماسەلەلەرىن ۇيلەستىرەتىن قوعامدىق كەڭەس قۇرىلادى. قازاقستان تاريحى, سونىڭ ىشىندە استانا تاريحىنان حابار بەرەتىن عىلىمي-كوپشىلىك كىتاپتار شىعارىلادى. بولاشاقتا ەلوردادا تاريح مۇراجايىن اشۋ ماسەلەسى دە قارالادى.
بۇل ماسەلەگە ءۇن قوسقان «ەۋرازيا» گۋمانيتارلىق عىلىمي-زەرتتەۋ ورتالىعىنىڭ ديرەكتورى, تاريح عىلىمدارىنىڭ دوكتورى زيابەك قابىلدينوۆ استاناداعى جوعارى وقۋ ورىندارىندا تاريح كافەدرالارىنىڭ جوقتىعىن ايتتى. «1962 جىلى س. سەيفۋللين اتىنداعى قازاق اگروتەحنيكالىق ۋنيۆەرسيتەتىندە 75 تاريحشى بولسا, بۇل كۇندە استانا حالقى ءتورت ەسەگە وسكەنىنە قاراماستان, مۇندا بىردە-ءبىر تاريح كافەدراسى جوق» دەدى ول.
سونىمەن بىرگە عالىم بوزوق قالاشىعىنىڭ ورنىندا قامال تۇرعىزۋدى ۇسىندى. ونىڭ ويىنشا, وسى جەردە شەتەلدەن كەلەتىن تۋريستەرگە كوشپەندىلەردىڭ سالت-داستۇرلەرىن كورسەتىپ, ات جارىستارىن ۇيىمداستىرۋعا بولادى.
تاريحشىنىڭ پىكىرىنشە, ۇلى وتان سوعىسىنا قاتىسقان اقمولالىقتار جونىندە دە اقتانداقتار جەتكىلىكتى. مۇنى ول حاركوۆ تۇبىندە سوعىسقان 103 اتقىشتار ديۆيزياسى تۋرالى ماردىمدى اقپاراتتىڭ جوقتىعىمەن ءتۇسىندىردى. وعان قوسا فولكلور جيناۋ ءىسى بويىنشا ءبىر جوبا ويلاستىرىپ, وعان ستۋدەنتتەردى تارتۋدى ۇسىندى.
ءادىل الاش
