بۇزاقىلىق, قوعامدىق ورىندا تەمەكى شەگۋ جانە الكوگولدى ىشىمدىك ءىشۋ, قوقىس تاستاۋ سەكىلدى ۇساق قۇقىق بۇزۋشىلىقتارعا «نولدىك توزىمدىلىك» قاعيداتىن ورىنداۋ اياسىندا جەرگىلىكتى پوليتسيا قىزمەتى وسى ايدىڭ باسىنان بەرى 2300 ادامدى اكىمشىلىك جاۋاپقا تارتتى.
ماسەلەن, قوعامدىق ورىندا الكوگولدى ىشىمدىك ىشكەنى نەمەسە ماس كۇيدە جۇرگەنى ءۇشىن تامىز ايىندا 467 ازامات قولعا ءتۇستى. سونداي-اق, ۇساق بۇزاقىلىق جاساعان 162 كىسى, قوعامدىق ورىندا تەمەكى شەككەن 245 كىسى, تىنىشتىق بۇزعان 470 كىسى, اباتتاندىرۋ ەرەجەلەرىن ساقتاماعان 900 كىسى تىركەلدى.
سوڭعى قۇقىق بۇزۋشىلىق ءتۇرى بويىنشا ەڭ ءجيى قايتالاناتىن فاكتىلەردىڭ ءبىرى – كولىكتى رۇقسات ەتىلمەگەن جەردە جۋ. مىسالى, بيىلعى جىلدىڭ 9 تامىزىندا كوكتال-1 ەلدى مەكەنىندەگى سۋ قويماسىنىڭ جانىندا 2 استانالىق تۇرعىن «Geely» جانە «Kia Picanto» ماركالى اۆتوكولىكتەرىن جۋعان. اباتتاندىرۋ ەرەجەلەرىن ساقتاماعانى ءۇشىن ولارعا 20 اەك, ياعني 42420 تەڭگە كولەمىندە ايىپپۇل سالىندى.
ەستەرىڭىزگە سالا كەتەيىك, استانا قالاسىن اباتتاندىرۋ ەرەجەلەرىنىڭ 76-پۋنكتىنە سايكەس, تۇرعىن ءۇي ورامدارىنىڭ ىشىندە, كوپشىلىك تۇتىناتىن جەرلەردە, سۋ بولەتىن مۇنارالار ءتۇبىندە, سۋ قويمالارىندا, جۇرتشىلىق دەمالاتىن ورىنداردا, تۇرعىن ءۇي پودەزدەرىنىڭ الدىندا كولىك جۋعا, تازالاۋعا جانە جوندەۋگە بولمايدى.
جالپى, اباتتاندىرۋ ەرەجەلەرىن بۇزعانى ءۇشىن ەلوردادا جىل باسىنان بەرى 15083 اكىمشىلىك پروتوكول تولتىرىلدى.
بوتاگوز ماراتقىزى
