ەلوردادا «Qazaqstan» ورتالىق كونتسەرت زالىندا قر مادەنيەت جانە سپورت مينيسترلىگىنىڭ ۇيىمداستىرۋىمەن وتكەن «تاۋەلسىزدىك – قاسيەتىم, قاستەرلىم!» اتتى رەسپۋبليكالىق اقىندار ايتىسى مارەسىنە جەتتى. باس جۇلدەگە نۇر-سۇلتان قالاسىنىڭ اكىمدىگى تەمىر تۇلپار تىكتى.
اتالعان ءدۇبىرلى دودانىڭ ادىلقازى القاسىنا كورنەكتى ونەر قايراتكەرى, ۇستاز, قازاقستان جانە كسرو حالىق ءارتىسى, «قازاقستاننىڭ ەڭبەك ەرى» ءاسانالى ءاشىموۆ توراعالىق ەتتى. سونىمەن قاتار ايتىس اقىنى, قازاقستاننىڭ حالىق اقىنى ءاسيا بەركەنوۆا, ءۇش دۇركىن «التىن دومبىرا» يەگەرى مۇحتار نيازوۆ, ايتىسكەر اقىن, قازاقستاننىڭ ەڭبەك سىڭىرگەن قايراتكەرى امانجول التاەۆ جانە وزگە ونەر, قوعام قايراتكەرلەرى قازىلىق ەتىپ, 22 اقىننان فينالعا 12 اقىندى جۇيرىك دەپ تانىدى. اقتىق سىندا بەكارىس شويبەكوۆ, رۇستەم قايىرتايۇلى, جانسايا مۋسينا, ەركەبۇلان قاينازاروۆ, جىگەر بوكەن, راۋان قايداروۆ, قاليجان ءبىلداشوۆ, باۋىرجان شيرمەدينۇلى, تولەگەن جامانوۆ, نۇرزات قارۋ, مەيىربەك سۇلتانحان ونەر كورسەتتى.
سونىمەن, قازىلار القاسىنىڭ شەشىمىمەن مەرەكەلىك ايتىستا اقىنداردىڭ ەشقايسىسى دا جۇلدەسىز قالمادى. ىنتالاندىرۋ سىيلىعىنا ارعىنبەك قالباەۆ, تولەگەن جامانوۆ, باۋىرجان شيرمەدين, نۇرزات قارۋ, راۋان قايداروۆ, قاليجان ءبىرداش يە بولدى. قازىلار القاسىنىڭ توراعاسى ءاسانالى ءاشىموۆتىڭ ۇسىنىسىمەن تاعايىندالعان ارنايى جۇلدە بوكەن جىگەرگە بەرىلدى. ءۇشىنشى ورىنعا ەكى اقىن لايىق دەپ تانىلسا, ونى ءرۇستەم قايىرتاي مەن جانسايا مۋسينا ەنشىلەدى. ەكىنشى ورىنعا مەيىربەك سۇلتانحان يە بولدى. ءبىرىنشى ورىن مەن «ايتىستىڭ اقتاڭگەرى» توسبەلگىسى ەركەبۇلان قاينازاروۆقا بەرىلدى. باس جۇلدە – «التىن دومبىرا» جانە نۇر-سۇلتان قالاسىنىڭ اكىمدىگى تاعايىنداعان تەمىر تۇلپار بەكارىس شويبەكوۆكە بۇيىردى.
