ءبىر اپتا بويى ەلوردا تورىندە دۇرىلدەگەن «تەاترALL» اتتى حالىقارالىق تەاتر فەستيۆالى ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترى ساحناسىندا تۇيىندەلدى. تاۋەلسىزدىكتىڭ 30 جىلدىعى اياسىندا ۇيىمداستىرىلىپ, استانالىق 12 تەاتر مەن رەسەيدەن شاقىرىلعان 2 تەاتردىڭ باسىن قوسقان فەستيۆالدىڭ جابىلۋ سالتاناتىنا مادەنيەت جانە سپورت ءمينيسترى اقتوتى رايىمقۇلوۆا, نۇر-سۇلتان قالاسى اكىمىنىڭ ورىنباسارى اسحات ورالوۆ قاتىستى.
– بيىل ەلىمىز تاۋەلسىزدىكتىڭ 30 جىلدىعىن كەڭىنەن اتاپ وتۋدە. قازاقستاننىڭ تۇڭعىش پرەزيدەنتى-ەلباسى نۇرسۇلتان نازارباەۆتىڭ باستاماسىمەن قولعا الىنعان «مادەني مۇرا» جانە «رۋحاني جاڭعىرۋ» باعدارلامالارى مادەنيەتىمىزدىڭ وركەندەۋىنە ايرىقشا سەرپىن بەردى. تاۋەلسىزدىكتىڭ 30 جىلدىعىن مەرەكەلەۋگە دايىندىق جونىندەگى كوميسسيانىڭ ءبىرىنشى وتىرىسىندا قازاقستان پرەزيدەنتى قاسىم-جومارت توقاەۆ «تاۋەلسىزدىكتىڭ 30 جىلدىعى – بۇل جاي كۇندەردىڭ ءبىرى ەمەس, ءبىز بۇل تاريحي وقيعاعا يدەولوگيالىق تۇرعىدان قاراۋىمىز كەرەك» دەپ اتاپ ءوتتى. ءبىر ايتا كەتەرلىگى, ەلدەگى ەپيدەميولوگيالىق جاعداي تاۋەلسىزدىگىمىزدىڭ 30 جىلدىعىن مەرەكەلەۋگە ايتارلىقتاي اسەر ەتكەن جوق. ءىس-شارالار وفلاين جانە ونلاين رەجيمدەرىندە وتكىزىلىپ جاتىر, – دەدى ا.رايىمقۇلوۆا.
وسىعان دەيىن استانا كۇنىنە وراي ۇيىمداستىرىلعان «ەلوردا – ونەر ولكەسى» اتتى ەلىمىزدىڭ جانە شەتەلدىك تەاترلاردىڭ شىعارماشىلىق كەزدەسۋى ەڭ ماڭىزدى شارالاردىڭ بىرىنە اينالعانىن اتاپ وتكەن مينيستر وسى «تەاترALL» اتتى حالىقارالىق تەاتر فەستيۆالى سونىڭ زاڭدى جالعاسى ەكەنىن ايتتى.
ءوز كەزەگىندە ءسوز العان نۇر-سۇلتان قالاسى اكىمىنىڭ ورىنباسارى اسحات ورالوۆ قالا باسشىسى التاي كولگىنوۆتىڭ اتىنان فەستيۆالدىڭ ءوز دەڭگەيىندە وتۋىنە اتسالىسقان تەاترلاردىڭ باسشىلارىنا, شىعارماشىلىق ۇجىمدارعا, ساراپشىلار كەڭەسىنە, كورەرمەندەرگە العىسىن جەتكىزدى.
– ءبىر اپتانىڭ كولەمىندە ەلوردا اكىمدىگىنە قارايتىن 6 تەاتر, رەسپۋبليكالىق 4 تەاتر, جەكەمەنشىك 2 تەاتر, رەسەيدەن كەلگەن 2 تەاتر بىرلەسىپ, وتىزعا جۋىق قويىلىمدى ۇسىندى. وعان ەلوردا تۇرعىندارى مەن قوناقتارى, 8 مىڭنان استام كورەرمەن كەلدى. بۇل فەستيۆالدى مادەنيەت جانە سپورت مينيسترلىگى, قالا اكىمدىگى بىرلەسە كەلەسى جىلى دا وتكىزەمىز بە دەگەن نيەتىمىز بار. ەلوردا اكىمدىگى تاراپىنان شىعارماشىلىق ۇجىمداردى ءاردايىم قولداۋعا دايىنبىز, – دەدى ا.ورالوۆ.
ەلىمىزگە بەلگىلى مادەنيەت پەن ونەر قايراتكەرلەرىنەن قۇرالعان, قازاقستاننىڭ ەڭبەك ەرى, كسرو جانە قازاقستاننىڭ حالىق ءارتىسى, كسرو جانە قازاقستاننىڭ مەملەكەتتىك سىيلىعىنىڭ لاۋرەاتى, قازاقستان تەاترلارى قاۋىمداستىعىنىڭ پرەزيدەنتى ءاسانالى ءاشىموۆ باستاعان فەستيۆالدىڭ ساراپتامالىق كەڭەسىنىڭ شەشىمىمەن 30 جىلدىققا 30 اتالىم بويىنشا جەڭىمپازدار انىقتالدى. سونىڭ ىشىندە «دۇنيە عاپىل» قويىلىمىن ساحنالاعان مۋزىكالىق جاس كورەرمەندەر تەاترىنىڭ ديرەكتورى اسحات ماەميروۆ «ۇزدىك رەجيسسەر» اتالىمىندا توپ جاردى. جاستار تەاترىنىڭ «اساۋعا تۇساۋ» سپەكتاكلى «ۇزدىك قويىلىم» اتالىمىن يەلەندى.
«جۇبايلار جۇمباعى» قويىلىمىنداعى ءرولى ءۇشىن ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىنىڭ ءارتىسى اينۇر بەرمۇحامەدوۆا ۇزدىك اكتريسا, «جارقىن ويلار» قويىلىمىندا ۆەنيا ءرولىن سومداعان م.گوركي اتىنداعى مەملەكەتتىك اكادەميالىق ورىس دراما تەاترىنىڭ اكتەرى يۆان انوپچەنكو ۇزدىك اكتەر اتاندى. «تەاتر ونەرىنىڭ دامۋىنا قوسقان ۇلەسى ءۇشىن» سىيلىعى نۇر-سۇلتان قالاسى قۋىرشاق تەاترىنىڭ كوركەمدىك جەتەكشىسى, قازاقستاننىڭ ەڭبەك سىڭىرگەن ءارتىسى, پروفەسسور قۇرالاي ەشمۇراتوۆاعا تاپسىرىلدى.
جابىلۋ سالتاناتىندا تەاترلار ۇزدىك قويىلىمدارىنان ۇزىندىلەردى ۇسىندى. ال جالپى فەستيۆال بارىسىندا «قازاقستاننىڭ زاماناۋي تەاتر پروتسەسى: ماسەلەلەرى مەن ولاردى شەشۋ جولدارى» اتتى عىلىمي-پراكتيكالىق كونفەرەنتسيا ۇيىمداستىرىلدى. مەملەكەتتىك اكادەميالىق نەمىس دراما تەاترىنىڭ كوركەمدىك جەتەكشىسى ناتاشا دۋبستىڭ اكتەر شەبەرلىگى بويىنشا شەبەرلىك ساباقتارى مەن لەيلا ماحاتتىڭ ونەر كورمەلەرى ءوتتى.
فەستيۆال اياسىندا س.وبرازتسوۆ اتىنداعى مەملەكەتتىك اكادەميالىق ورتالىق قۋىرشاق تەاترى گ.ح.اندەرسەننىڭ ەرتەگىسى جەلىسىمەن «اققالا» ەرتەگىسىن, ك.گوتستسيدىڭ «تۋراندوت» سپەكتاكلىن, «عاجايىپ كونتسەرت» باعدارلاماسىن ۇسىندى.
