«استانا جاستارى» جاستار رەسۋرستىق ورتالىعىنىڭ ەرىكتىلەرى مەن بەلسەندىلەرى «شاپاعات» ساۋدا ءۇيىنىڭ ماڭىندا قالا تۇرعىندارىنا تەگىن شاي تاراتتى. يگىلىكتى ءىس-شاراعا ارنايى بارىپ, قالا تۇرعىندارىنىڭ ىقىلاس-نيەتىن بىلدىك.
– استانانىڭ ايازدى قىسى باستالدى. وسىنداي كەزدە ادامنىڭ ءتانىن عانا ەمەس, رۋحىن جىلىتاتىن اكتسيالار قاجەت. ءبىز مەيىرىمدىلىكتى, ىزگىلىكتى, قايىرىمدىلىقتى ناسيحاتتايمىز. ارينە, مۇنداي ىستەردى اتقارۋدا جىلى سالەمدەسۋ, جىلى شاي بەرۋ جانە ت. ب. اكتسيالاردىڭ ورنى بار. «شاپاعات» ساۋدا ءۇيىنىڭ ماڭىندا ادام قوزعالىسى قالىڭ. ادامدار ءارتۇرلى جۇمىسپەن ءجۇر. سولاردىڭ بويىن جىلىتاتىن شاي تاراتىپ جاتىرمىز. تۇسكە دەيىن «تۇلپار» ساۋدا ورنىنىڭ ماڭىندا جانە ەسىل اۋدانى «جاعالاۋ» جاقتا دا اكتسيانى جالعاستىرامىز. يگىلىكتى ىسكە بارشا جاستار ۇيىمىن اتسالىسۋعا شاقىرامىز, – دەدى ورتالىق جەتەكشىسى شىڭعىس تىلەۋلين.
ايازدى كۇنى تۇرعىنداردى ىستىق شايمەن جىلىتۋدى مۇرات ەتكەن اكتسيانىڭ ناتيجەسىن دە كوردىك. ءارى-بەرى وتكەن تۇرعىندار تالعامىنا قاراي شاي ءىشىپ, بويىن جىلىتىپ, ەرىكتى جاستارعا العىس ءبىلدىرىپ جاتتى.
شاي ءىشىپ تۇرعاندار اراسىندا ءوزىن زابيرا بوكەنباەۆا دەپ تانىستىردى. ول بالاسىن ەمحاناعا كورسەتىپ, ۇيىنە قايتىپ بارادى ەكەن.
– كوپبالالى انامىن. بالامدى دارىگەرگە كورسەتىپ, ۇيگە قايتىپ بارامىن. داۋىس كۇشەيتكىشپەن «تەگىن شاي ىشىڭىزدەر» دەگەننەن كەيىن كەلدىم. شاي ءىشىپ, بويىم جىلىدى. راقمەت جاستارعا! – دەدى ول.
جاستار ليدەرى تەگىن شاي تاراتۋمەن قاتار, قارتتاردىڭ اۋلاسىن قاردان تازالاۋ اكتسياسى جۇرەتىنىن ايتتى.
