تەڭگە تۋرالى تەڭگەباەۆتىڭ تۇسىندىرمەسى

قارجى مەن جىلجىمايتىن مۇلىكتى زاڭداستىرۋ اكتسياسى باستالعان العاشقى ءۇش كۇننىڭ ىشىندە جەرگىلىكتى اكىمدىكتەردە قۇرىلعان كوميسسياعا 200-دەن اسا ادام حابارلاسىپتى. «بۇل – ناۋقانعا دەگەن جۇرتشىلىقتىڭ قىزىعۋشىلىعى جوعارى ەكەنىن كورسەتەدى» دەيدى قر پرەزيدەنتى جانىنداعى ورتالىق كوممۋنيكاتسيالار ورتالىعىندا وتكەن بريفينگتە قارجى ۆيتسە-ءمينيسترى ارداق تەڭگەباەۆ.

وسىناۋ ناۋقان كەزىندە اقشا مەن باعالى قاعازداردى, زاڭدى تۇلعانىڭ جارعىلىق كاپيتالىنداعى قاتىسۋ ۇلەسىن, باسقا ادامعا راسىمدەلگەن جانە قازاقستان اۋماعىنان تىس جەردەگى جىلجىمايتىن مۇلىكتەردى زاڭداستىرۋعا بولاتىنىن ايتقان ۆيتسە-مينيستر الىمدى جاريا ەتۋ ءۇشىن الىم سوماسىن اۋدارۋعا بيۋدجەتتىك سىنىپتاۋىشتىڭ ارناۋلى كودى اشىلعانىن حابارلادى. كود ءنومىرى – 206110.

مۇلىكتى زاڭداستىرۋ ءۇشىن قاجەت بولاتىن قۇجاتتاردىڭ تىزىمىنە توقتالعان ول مۇلكىن زاڭداستىرعىسى كەلگەندەر جەرگىلىكتى اكىمدىكتەردە قۇرىلعان ارناۋلى كوميسسياعا ءوتىنىش بەرۋ قاجەتتىگىن ەسكە سالدى. وعان قوسا, جەكە كۋالىكتىڭ كوشىرمەسىن ۇسىنۋى ءتيىس.

جىلجىمايتىن مۇلىكتى جاريا ەتكەن جاعدايدا, نىساننىڭ قۇرىلىس نورمالارى مەن قاعيداتتارىنا سايكەستىگى تۋرالى ساراپشىنىڭ اتتەستاتتالعان قورىتىندىسى بولۋى قاجەت.

قازاقستان اۋماعىنان تىس جەردە ورنالاسقان مۇلىكتى جاريا ەتۋ ءۇشىن ازاماتتار قارجى مينيسترلىگىنە قاراستى مەملەكەتتىك كىرىستەر كوميتەتىنىڭ (بۇرىنعى سالىق كوميتەتى) اۋماقتىق بولىمشەلەرىنە بارعاندارى ءجون.

ال, جارعىلىق كاپيتالدا قاتىسۋ ۇلەسى ءۇشىن – قۇقىق بەلگىلەۋشى قۇجاتتىڭ نوتاريۋس كۋالاندىرعان كوشىرمەسى, باعالى قاعازداردى جاريا ەتۋ ءۇشىن – مەنشىك قۇقىن راستايتىن قۇجاتى, مۇلىكتىڭ ساتىپ الىنعانىن نەمەسە باعالاۋ قۇنىن راستايتىن قۇجاتى, مۇلىكتى جاريا ەتكەنى ءۇشىن الىناتىن الىمنىڭ تولەنگەنىن راستايتىن قۇجاتى بولۋى كەرەك. اقشانى زاڭداستىرعىسى كەلگەندەر ەكىنشى دەڭگەيلى بانكتەر مەن «قازپوشتاعا» بارۋى قاجەت.

بريفينگتە ءسوز سويلەگەن ادىلەت ءمينيسترىنىڭ ورىنباسارى باقىتجان ءابدىرايىم اكتسيا اياسىندا ەلىمىزدىڭ ادىلەت ورگاندارى جۇرگىزىپ جاتقان جۇمىستارمەن تانىستىرا كەلە, زاڭعا قاتىستى ەڭ ءجيى قويىلاتىن سۇراقتارعا جاۋاپتار دايىنداپ, «ەلەكتروندىق ۇكىمەت» پورتالىنا جولداعاندارىن جەتكىزدى.

ەسكە سالا كەتەيىك, مۇلىكتى جاريا ەتۋگە ءوتىنىشتى قابىلداۋ – 2015 جىلدىڭ 15 قاراشاسىنا دەيىن, ال كاپيتالدى جاريا ەتۋ 2015 جىلدىڭ 31 جەلتوقسانىنا دەيىن جالعاساتىن بولادى.

قىمبات نۇرعالي