استانالىق دارىگەردىڭ ارقاسىندا جازىلدى
…مەنىڭ ۇلىم قۋاندىق باعداۋلەتتىڭ ءۇش جاسىندا ەكى قولىنداعى باس بارماعىنىڭ تىرناقتارى قارايدى. قارايعان تىرناقتىڭ ءتۇبى قاتتى قىشىدى. «اۋرۋ كىردى, الەك كىردى» دەگەندەي وسى ماسەلەمەن ساندالعانىمىزعا توعىز جىلدىڭ ءجۇزى بولدى.
العاشىندا تۇركىستان, كەنتاۋ, شىمكەنت قالالارىنىڭ دارىگەرلەرىنە 7 جىل بويى كورسەتىپ ەش ناتيجە بولماعاسىن 2011 جىلى الماتى قالالىق تەرى اۋرۋلارى عىلىمي زەرتتەۋ ورتالىعىنا, «سۇڭقار» دياگنوستيكالىق ورتالىعىنا, الماتى قالالىق تەرى اۋرۋلارى ديسپانسەرىنە, پەدياتريا جانە بالالار حيرۋرگياسى عىلىمي ورتالىعىنا, 2012 جىلى تاشكەنت قالالىق بالالار دياگنوستيكالىق ورتالىعىنا, بىلتىر استانا قالاسىنداعى وڭالتۋ ورتالىعىنا اپاردىم. نەبىر اتاعى جەر جارعان دارىگەرلەر تەكسەردى, ەش ناتيجە بولمادى. بالام ءۇشىن جانىمدى شۇبەرەككە ءتۇيىپ, تاپقان-تايانعانىمدى, اعايىن-تۋىس كومەكتەسىپ بەرگەن اقشانى دا ايامادىم. وكىنىشكە قاراي, ەشقايسىسى دا دۇرىس دياگنوزىن قويا الماي, «ىشكى اعزاعا بايلانىستى» دەپ, توعىز جىل بويىنا باعاسى دا قىمبات, ىشكەندە دە ۋداي نەشە ءتۇرلى ءدارى بەرىپ, بوسقا بالامنىڭ ىشكى اعزاسىن بوسقا زاقىمدادى. بالامنىڭ قينالعان, شىرىلداعان جان داۋىسىن ەستىپ, ازاپتانعان جان دۇنيەسىن كورىپ, ءىش-باۋىرىم ەزىلىپ, كۇندىز كۇلكىدەن, تۇندە ۇيقىدان ايرىلدىق. تالاي تۇندەرىم مەن كۇندەرىم ءبىر قۇدايعا جالبارىنىپ, جىلاۋمەن ءوتتى. بالامنىڭ قولى قاتتى قىشىپ, شىداي الماي تىرناقتىڭ تۇبىنە ينە تىعاتىن حالگە جەتتىك. تىرناقتىڭ سىرتقى قالىبى وزگەرىپ, قيسايىپ مايىسىپ كەتتى. بالامنىڭ دا, مەنىڭ دە, ۇيدەگى باسقا جانداردىڭ دا ابدەن جۇيكەسى شارشادى. «سۋعا كەتكەن تال قارمايدى» دەمەكشى, دەنساۋلىق ساقتاۋ مينيسترلىگىنە جازعان حاتىمنان كەيىن بىزگە رەسپۋبليكالىق بالالاردى وڭالتۋ ورتالىعىنا جولداما بەردى. بىراق مۇنداعىلار بالامنىڭ قولىن ەمەس جۇيكەسىن ەمدەۋگە كىرىستى. وسى كەزدە قۇدايدىڭ قۇدىرەتى عوي, اۋعانستاندا قايتىس بولعان مارقۇم اعامنىڭ ەلوردادا تۇراتىن دوسى ەرجان زيابەكوۆكە جولىقتىم. وسى كىسى ارقىلى بالامدى استانا قالاسىنداعى دەرماتولوگيا جانە جقاااە ورتالىعى ديرەكتورىنىڭ ورىنباسارى (قازىر دەكرەتتىك دەمالىستا) سامال شاپەنوۆاعا اپاردىم. سامال قايىربەكقىزى ارىپتەسى ديسپانسەر ءبولىمىنىڭ مەڭگەرۋشىسى دانا شىنتاقوۆا ەكەۋى تىرناقتىڭ تۇبىنەن ساراپتاما الىپ, نەبارى 20 مينۋتتا توعىز جىلدان بەرى انىقتاتا الماي جۇرگەن دياگنوزىمىزدى ءدوپ باسىپ قويىپ بەردى دە: «بالاڭىزدىڭ ەمى – مىناۋ» دەپ, «ميفۋنگار» دەگەن مايدى 14 كۇن جاعۋىمىزعا كەڭەس بەردى. سونى جاققان كۇننەن باستاپ ۇلىمنىڭ جاعدايى جاقسارىپ, ءتورت ايدا جاڭادان تىرناق شىعىپ, جازىلدى. قۋانىشىمىزدى سوزبەن جەتكىزە المايمىز. باعداۋلەت – 4 قىزدىڭ ىشىندەگى جالعىز ۇلىم. قازىر دەنساۋلىعى, كوڭىل-كۇيى جاقسى. كەنتاۋ قالاسىنداعى «دارىن» مەكتەبىنىڭ 7-سىنىبىندا وقىپ ءجۇر. «جاقسىنىڭ جاقسىلىعىن ايت – نۇرى تاسىسىن» دەمەكشى, استانالىق دەرماتولوگيا ورتالىعى ۇجىمىنا, سونىڭ ىشىندە سامال شاپەنوۆاعا ايتار انالىق العىسىمىز شەكسىز. توعىز جىل باسىمىزدان كەتپەگەن ازاپتان قۇتقارىپ, تۇركىستانداعى ءبىر ۇلكەن وتباسىن قۋانىشقا بولەدى. كەيدە ءبىز كەرەمەت دەپ, رەسپۋبليكالىق كلينيكالارعا, مىقتى دەپ پروفەسسورلارعا جۇگىنىپ جاتامىز. قاراپايىم ەمدەۋ مەكەمەلەرىندە جۇمىس ىستەيتىن دارىگەرلەردى وزىمىزشە مەنسىنبەيمىز. ولاردىڭ بىلىمىنە, اسىرەسە, استانالىق دارىگەرلەردىڭ بىلىمىنە ءوزىمىز ءتانتى بولىپ وتىرمىز. سامال قايىربەكقىزىنا استانالىق گازەت ارقىلى ۇلكەن العىسىمدى بىلدىرەمىن. ومىردەگى بار جاقسىلىقتى شىن جۇرەكتەن سىزگە تىلەيمىز, سامال قايىربەكقىزى!
نۇرلىعىز مامىرايموۆا,
تۇركىستان قالاسى
