تۋبەركۋلەزگە قارسى تۇرماق
ەلىمىزدە دۇنيەجۇزىلىك تۋبەركۋلەزگە قارسى كۇرەس كۇنىنە ارنالعان ءىس-شارالار ۇيىمداستىرىلۋ جوسپارلانىپ وتىر. بۇل تۋرالى قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆ مالىمدەدى.
ونىڭ ايتۋىنشا, قر دەنساۋلىق ساقتاۋ مينيسترلىگى 24 ناۋرىزدا وبلىس اكىمدىكتەرىمەن ءبىرلەسىپ دۇنيەجۇزىلىك تۋبەركۋلەزگە قارسى كۇرەس كۇنىنە ارنالعان ءىس-شارالار وتكىزۋگە نيەتتى. سونداي-اق, وكپە اۋرۋىنا قارسى كۇرەس دۇنيەجۇزىلىك دەنساۋلىق ساقتاۋ ۇيىمىمەن ءبىرلەسە وتىرىپ, «ازىرگە ءتىرى تۇرعانىمدا, تۋبەركۋلەزدى توقتاتىڭدار!» اتتى باستامانى جۇزەگە اسىرماق.
– تۋبەركۋلەزگە قارسى كۇرەس دەنساۋلىق ساقتاۋ سالاسىنداعى مەملەكەتتىك ساياساتتىڭ اسا ماڭىزدى باعىتى بولىپ تابىلادى. بۇل سالادا پروبلەما جوق ەمەس. سوڭعى 5 جىلدا وكپە اۋرۋىنا شالدىققان ادامداردىڭ سانى 34,9 پايىزعا, وسى دەرتتىڭ سالدارىنان ءولىم دەڭگەيى 57,4 پايىزعا تومەندەپ وتىر, – دەدى ا.ابيبۋللاەۆ.
اينۇر شوشاەۆا