تاۋەلسىزدىك مەرەكەسى قارساڭىندا كوپشىلىك تاعى ءبىر جاڭا ءفيلمنىڭ كۋاسى بولدى. كورەرمەن نازارىنا «تۇركى الەمىنىڭ تەگەۋرىندى تۇلعاسى» اتتى دەرەكتى فيلم ۇسىنىلدى.
ءفيلمنىڭ تۇساۋكەسەر راسىمىنە قر پرەزيدەنتى كەڭسەسىنىڭ باسشىسى, نازارباەۆ ورتالىعى ديرەكتورىنىڭ مىندەتىن ۋاقىتشا اتقارۋشى ماحمۇد قاسىمبەكوۆ, قر پرەزيدەنتىنىڭ كەڭەسشىسى – ءباسپاسوز حاتشىسى داۋرەن اباەۆ, «قر پرەزيدەنتى تەلەراديوكەشەنى» اق باس ديرەكتورى ەرلان بەكحوجين, تۇركيا رەسپۋبليكاسى ۇكىمەتى جانىنداعى تۇرىك ىنتىماقتاستىق جانە ۇيلەستىرۋ اگەنتتىگىنىڭ ۆيتسە-پرەزيدەنتى مەحمەت سيۋرەيا ەر قاتىستى.
قر پرەزيدەنتىنىڭ تەلەراديوكەشەنى مەن تۇركيا ۇكىمەتى جانىنداعى تۇرىك ىنتىماقتاستىق جانە ۇيلەستىرۋ اگەنتتىگى دۇنيەگە اكەلگەن دەرەكتى فيلمدە ەلباسى نۇرسۇلتان نازارباەۆتىڭ اتقارعان ەڭبەگى, ىلكىمدى ىستەرى جان-جاقتى كورسەتىلەدى. قازاقستاننان باستالىپ, قىرعىزستان, تاتارستان, تۇركيا جانە ازەربايجان مەملەكەتتەرىندە ءبىر جىلعا جۋىق ۋاقىت تۇسىرىلگەن دەرەكتى تۋىندىدا ححI عاسىردىڭ كورنەكتى تۇلعالارى نۇرسۇلتان نازارباەۆ تۋرالى پىكىرلەرىن ءبىلدىرىپ, قازاق باسشىسىنىڭ تۇركىتىلدەس حالىقتاردى تۇتاستىرۋ جولىنداعى ەرەن ەڭبەگى جونىندەگى ويلارىمەن بولىسەدى. باسقوسۋ بارىسىندا ماحمۇد قاسىمبەكوۆ: «نۇرسۇلتان نازارباەۆ قازاقستان تاۋەلسىزدىگىنىڭ العاشقى كۇندەرىنەن-اق تۇركى الەمىنىڭ ىنتىماقتاستىعىنا ەرەكشە ءمان بەردى. تۇركىتىلدەس مەملەكەتتەرمەن اراداعى بارىس-كەلىستى جەڭىلدەتۋگە, ساۋدا-ەكونوميكالىق جانە رۋحاني, الەۋمەتتىك بايلانىستاردى نىعايتۋعا كۇش سالدى. قازاقستان پرەزيدەنتى تۇركى تۇتاستىعىنان باستايتىن العاشقى ينستيتۋتسيونالدىق تەتىكتەردىڭ قالىپتاسۋىنا سەبەپكەر بولدى. اتاپ ايتساق, قازىرگى كەزدە تۇركىتىلدەس اعايىننىڭ يگىلىگى ءۇشىن جەمىستى جۇمىس ىستەپ جاتقان پارلامەنتتىك اسسامبلەيا, اقساقالدار كەڭەسى, تۇركى اكادەمياسى, تۇركى كەڭەسى سياقتى ورگانداردىڭ قۇرىلۋى قازاقستان پرەزيدەنتىنىڭ ەسىمىمەن تىعىز بايلانىستى. ەلباسىنىڭ تۇركى ىنتىماقتاستىعىن تەرەڭدەتۋدەگى ەڭبەگىن تۇركىتىلدەس ەلدەردىڭ بۇگىنگى جانە بۇرىنعى مەملەكەت باسشىلارى, قوعام قايراتكەرلەرى دە جوعارى باعالاپ وتىر», – دەدى.
ال, تۇركيا رەسپۋبليكاسى ۇكىمەتى جانىنداعى تۇرىك ىنتىماقتاستىق جانە ۇيلەستىرۋ اگەنتتىگىنىڭ ۆيتسە-پرەزيدەنتى مەحمەت سيۋرەيا ەر: «نۇرسۇلتان نازارباەۆ تەك تۋعان ەلىنە ەمەس, ايماقتاعى جانە دۇنيەجۇزىندەگى كەلەلى ماسەلەلەردىڭ شەشىمىن تابۋىنا زور ۇلەس قوسىپ كەلەدى. سونىمەن قاتار, تۇركى تىلدەس مەملەكەتتەر اراسىنداعى مادەنيەت, ءبىلىم, ەكونوميكا سالالارىنداعى ىنتىماقتاستىقتىڭ جۇيەلى, ينستيتۋتسيونالدى دامۋى ءۇشىن ماڭىزدى پىكىرلەرىن ۇسىنىپ ءجۇر. مارتەبەلى ن.نازارباەۆتىڭ بۇل ماڭىزدى ەڭبەكتەرىن تۇركيا جۇرتشىلىعى جاقسى بىلەدى جانە تەرەڭ قۇرمەتپەن قارايدى. تۇركيا رەسپۋبليكاسى پرەزيدەنتى ابدۋللاح گۇل جانە پرەمەر ءمينيسترى رەجەپ تايىپ ەردوعان ايتىپ وتكەندەي, مارتەبەلى ن.نازارباەۆتى تۇركى الەمىنىڭ اقساقالى رەتىندە كورەمىز» دەگەندى جەتكىزدى.
كينوتۋىندىنى تاماشالاعان كوپشىلىك ەلباسىنىڭ جەتەكشىلىك, كوشباسشىلىق قىرىن تانىدى. ءفيلمنىڭ ۇزاقتىعى – 35 مينۋت.
ەركەجان كوپتىلەۋقىزى
