وتكەن اپتا سوڭىندا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە بەلگىلى رەجيسسەر ەركىن راقىشەۆتىڭ « تۇرار رىسقۇلوۆ» دەرەكتى ءفيلمى كورسەتىلدى.
كورسەتىلىم سوڭىندا فيلم جايلى پىكىر الماسۋ سۇراق-جاۋاپ تۇرىندە ءوتىپ, ونى وسى شارانى ۇيىمداستىرۋعا ۇيتقى بولعان ۋنيۆەرسيتەت پرورەكتورى ديحان قامزابەكۇلى جۇرگىزىپ وتىردى. كينو اۆتورى فيلم مادەنيەت جانە اقپارات مينيسترلىگىنىڭ تاپسىرىسى بويىنشا تۇسىرىلگەنىن ايتا كەلىپ, بۇرىننان بەلگىلى دەرەكتەرمەن شەكتەلىپ قالماي, تىڭ دەرەكتەردى تابۋدى الدىنا ماقسات ەتىپ قويعانىن ايتتى. ول سونداي-اق, وسى جولدا ماسكەۋ, تاشكەنت, بىشكەك تاعى باسقا قالالارعا بارىپ بۇرىن جارىق كورمەگەن قۇجاتتار مەن بەينەتاسپالاردى جانە رىسقۇلوۆتىڭ وسى ۋاقىتقا دەيىن بەلگىسىز بولىپ كەلگەن جەرلەنگەن جەرىن قالاي تاپقانىن اڭگىمەلەپ بەردى. ۋنيۆەرسيتەت ستۋدەنتتەرى دە فيلم جايلى وزدەرىنىڭ جىلى لەبىزدەرىن, فيلمنەن قاتتى اسەر العاندارىن ايتىپ, رىسقۇلوۆتاي قايراتكەردىڭ ءومىرى جاستاردى پاتريوتتىق رۋحتا تاربيەلەۋدە زور ەكەنىنە توقتالدى. پروفەسسور ديحان قامزابەكۇلى قايراتكەر رىسقۇلوۆتىڭ ەلى ءۇشىن ەڭبەك ەتىپ, تاۋەلسىزدىك جولىندا ايانباي تەر توككەنىن ەسكە الدى. اتالعان تۋىندى وتاندىق دەرەكتى فيلمدەر جانرىنا جاڭا لەپ اكەلگەنىن تىلگە تيەك ەتتى. بۇعان دەيىنگى تۇسىرىلگەن دەرەكتى فيلمدەردەن ەرەكشەلىگى – كەيىپكەرلەردى ارتىستەردىڭ سومداۋى. باستى كەيىپكەر تۇرار رىسقۇلوۆتان باسقا, احمەت بايتۇرسىنوۆتى, سۇلتانبەك قوجانوۆتى, ت.ب. تۇلعالاردى ارتىستەردىڭ شەبەر سومداعانىن ايتا كەلىپ, ءسوزىنىڭ سوڭىندا ءفيلمدى تۇسىرۋشىلەرگە شىعارماشىلىق تابىس تىلەدى. پىكىر الماسۋ بارىسىندا ءسوز العان مەملەكەت تاريحى ينستيتۋتىنىڭ ديرەكتورى بۇركىتباي اياعان تۇرار رىسقۇلوۆتىڭ ءومىرى وسكەلەڭ جاستارعا ۇلگى بولاتىنىن ايتا كەلىپ, ولاردىڭ بويىندا وتانىنا دەگەن سۇيىسپەنشىلىك جانە پاتريوتتىق سەزىمدەردى وياتاتىن وسىنداي فيلمدەردى ءتۇسىرۋ, تەك قانا دەرەكتى فيلمدەرمەن شەكتەلىپ قالماي, كوركەم فيلمدەر دە ءتۇسىرۋ ماسەلەسىن كوتەردى. سونداي-اق, وسى تەكتەس تۋىندىلار باسقا دا الاش قايراتكەرلەرى جايلى تۇسىرىلسە, نۇر ۇستىنە نۇر بولار ەدى دەگەن پىكىرىن ءبىلدىردى.
حاميت تاشەنوۆ
