استانا قالاسىنىڭ ءماسليحاتىندا تۇراقتى كوميسسيا توراعاسى عايدار قاسەنوۆتىڭ توراعالىعىمەن «قالا اۋماعىندا قوعامدىق ءتارتىپتى ساقتاۋ جانە قاۋىپسىزدىكتى قامتاماسىز ەتۋ جونىندەگى الماتى, سارىارقا, ەسىل اۋداندارى ۋچاسكەلىك ينسپەكتورلارىنىڭ جۇمىسى تۋرالى» كوپشىلىك تىڭداۋى ءوتتى.
كوپشىلىك تىڭداۋعا الماتى, سارىارقا, ەسىل اۋداندارى اكىمدەرىنىڭ ورىنباسارلارى, قالالىق باسقارمالاردىڭ باسشىلارى, استانا قالاسى ءىىد-ءنىڭ جەرگىلىكتى پوليتسيا قىزمەتى مەن باسقا دا قوعامدىق ۇيىمداردىڭ وكىلدەرى قاتىستى.
دەپۋتاتتار الدىندا الماتى اۋدانى ءىىب جەرگىلىكتى پوليتسيا قىزمەتىنىڭ باستىعى, پوليتسيا پودپولكوۆنيگى الماس جاپپاروۆ, ەسىل اۋدانى ءىىب جەرگىلىكتى پوليتسيا قىزمەتىنىڭ باستىعى, پوليتسيا پولكوۆنيگى سەرىك ءابۋتالىپوۆ, سارىارقا اۋدانى ءىىب جەرگىلىكتى پوليتسيا قىزمەتىنىڭ باستىعى, پوليتسيا مايورى ازامات سادىقوۆ بايانداما جاسادى.
بەينەباقىلاۋ كامەرالارى كوبەيدى
الماتى اۋدانى ءىىب جەرگىلىكتى پوليتسيا قىزمەتى 10 قىركۇيەك پەن 1 جەلتوقسان ارالىعىندا قوعامدىق ءتارتىپ پەن قاۋىپسىزدىكتى ساقتاۋ ماقساتىندا «ۋچاسكە» جەدەل
الدىن الۋ ءىس-شاراسىن ۇيىمداستىرۋدا.
اتالعان ءىس-شارا كەزىندە ۋچاسكەلىك ينسپەكتورلار 110 مىڭ پاتەر مەن 7 مىڭ جەكەمەنشىك ءۇيدى ارالاپ, 383 مىڭ قالا تۇرعىنىمەن كەزدەسكەن.
سونىڭ ناتيجەسىندە 1499 جالعا بەرىلگەن پاتەر انىقتالىپ, 516 زاڭدى تۇلعا جەكە كاسىپكەر رەتىندە تىركەلىپ, 219 ادام دەكلاراتسيا تۇرىندە كىرىسىن كورسەتكەن. ودان مەملەكەتكە 28 ملن 105 مىڭ تەڭگە قارجى ءتۇسىپ وتىر.
جۇرگىزىلگەن رەيدتەر كەزىندە 27080 اكىمشىلىك قۇقىق بۇزۋشىلىق تىركەلىپ, ولارعا 131 ملن 077862 تەڭگە ايىپپۇل سالىنسا, سونىڭ مەملەكەت ەسەبىنە 32 ملن تەڭگەسى
ءوندىرىلىپ الىنعان.
اۋداندا كوپ قاباتتى ءۇيلەردىڭ اۋلالارى مەن كىرەبەرىستەرىندە 3123 بەينەباقىلاۋ
كامەراسى ورناتىلعان. الداعى ۋاقىتتا بۇل جۇمىستاردى ودان ءارى ورىستەتە ءتۇسۋ كوزدەلىپ وتىر.
قازىر ۋچاسكەلىك ينسپەكتورلار ماسكۇنەمدەر, ناشاقورلار جانە بۇرىن سوتتالعاندارمەن جوسپارلانعان جۇيەلى جۇمىستاردى جانداندىرا تۇسكەن.
قۇقىق بۇزۋشىلىق قىسقاردى
ال ەسىل اۋدانى ءىىب جەرگىلىكتى پوليتسيا قىزمەتىنىڭ باستىعى سەرىك ءابۋتالىپوۆتىڭ بايانداماسىندا وتكەن ون ايدىڭ قورىتىندىسىندا قوعامدىق ءتارتىپتى قامتاماسىز ەتۋدە 402 ءتۇرلى ءىس-شارا وتكىزىلگەنى تىلگە تيەك ەتىلدى.
وسى كەزەڭدە اۋداندا 3812 قىلمىس تىركەلگەن. بۇل وتكەن جىلدىڭ وسى كەزەڭىندەگى كورسەتكىشپەن سالىستىرعاندا
31,1 پايىزعا از. 2016 جىلى بۇل كورسەتكىش 5613 بولعان.
سونداي-اق, اۋداندا قوعامدىق ورىنداردا جاسالاتىن زاڭ بۇزۋشىلىقتى 2058-دەن 1661-گە, 19,3 پايىزعا, كوشەلەردەگى قۇقىق بۇزۋشىلىقتى 826-دان 583-كە دەيىن, 29,4 پايىزعا كەمىتۋگە قول جەتكىزىلگەن. بۇعان قوسا, پارمەندى جۇرگىزىلگەن الدىن الۋ جۇمىستارىنىڭ ناتيجەسىندە بۇزاقىلىق 34,6 پايىزعا ازايىپ وتىر.
ەسەپتى كەزەڭدە ۋچاسكەلىك ينسپەكتورلار 5404 اكىمشىلىك قۇقىق بۇزۋشىلىقتى انىقتاپ, قوعامدىق ورىنداردا سپيرتتىك ىشىمدىكتەر ىشكەن – 968, بەلگىلەنبەگەن جەردە تەمەكى تارتقان – 538, ساۋدا جاساعان 356 ادامدى اكىمشىلىك جاۋاپكەرشىلىككە تارتىپ, 74201022 تەڭگە ايىپپۇل سالسا, مەملەكەت ەسەبىنە ونىڭ 25062200 تەڭگەسى ءوندىرىلدى.
«حوستەلدەردىڭ كوپتەپ اشىلۋىنا وراي كەلىپ تۇسكەن ارىز-شاعىمدارعا بايلانىستى تۇرعىندارمەن 3 رەت جيىن وتكىزىلدى. ناتيجەسىندە «تۇلپار» تۇرعىن ءۇي كەشەنىندە ورنالاسقان حوستەل جۇمىسىن توقتاتتى. بۇل جۇمىستار ءجۇيەلى تۇردە ودان ءارى جالعاسۋدا» دەدى سەرىك ءابۋتالىپوۆ.
ۇگىت-ناسيحات ۇنەمى جۇرگىزىلەدى
ستاتيستيكالىق مالىمەتتەرگە سايكەس سارىارقا اۋدانىنىڭ 383231 تۇرعىنى بار. ولارعا 12 ۋچاسكەلىك پوليتسيا پۋنكتى قىزمەت كورسەتەدى. جىل باسىنان بەرى ۋچاسكەلىك ينسپەكتورلار «ۆوكزال», «قۇقىق ءتارتىبى», «ىزدەۋ», «قارۋ», «قاڭعىباس», «ۋچاسكە», تاعى دا باسقا 27 شۇعىل الدىن الۋ ءىس-شاراسىن وتكىزىپتى.
سونىڭ ناتيجەسىندە 29601 اكىمشىلىك قۇقىق بۇزۋشىلىق انىقتالىپ, 156 ملن 160067 تەڭگە ايىپپۇل سالىنعان.
مەملەكەت ەسەبىنە سونىڭ
26 ملن 729523 تەڭگەسى ءوندىرىلىپ الىنعان.
جەكە مۇلىكتى ۇرلاۋدى بولدىرماۋ ماقساتىندا ۋچاسكەلىك پوليتسيا ينسپەكتورلارى مەملەكەتتىك ورگانداردىڭ, ءتۇرلى مەنشىكتەگى مەكەمەلەردىڭ باسشىلارىمەن بىرلەسە وتىرىپ, بەينەباقىلاۋ كامەرالارىن, بەلگى بەرۋ قوندىرعىلارىن, سونداي-اق, ءورت-كۇزەت دابىلدارىن ورناتۋ قاجەتتىگىنە تۇرعىنداردىڭ كوزىن جەتكىزۋ ءۇشىن ۇنەمى ۇگىت-تۇسىنىك, ناسيحات جۇمىستارىن جۇرگىزىپ كەلەدى. 2017 جىلدىڭ ون ايىندا وسىنداي 525 كەزدەسۋ ءوتىپ, 37 اۋلا مەن كوپ قاباتتى ۇيلەردىڭ كىرەبەرىستەرىنە 273 بەينەباقىلاۋ كامەراسى ورناتىلدى.
تۇراقتى كوميسسيا وتىرىسى بارىسىندا جىل باسىنان بەرى ىستەلگەن وسىنداي جۇمىستارعا كەڭىنەن توقتالعان بايانداماشىلارعا ءماسليحات دەپۋتاتتارى سارسەنبەك ءجۇنىسوۆ, رامزيا ۋمەرباەۆا, قاراقات ابدەن, ءۋاليحان دوساەۆ, قايىرلى تاۋكەن, تاعى باسقالار قالانىڭ قوعامدىق قاۋىپسىزدىگى مەن قۇقىق تارتىبىنە قاتىستى سۇراقتار قويىپ, وي-پىكىرلەرىمەن ءبولىستى.
دەپۋتاتتاردىڭ كەيبىر ساۋالدارىنا بايلانىستى بەرگەن ارىپتەستەرىنىڭ جاۋابىن استانا قالاسى ءىىد جەرگىلىكتى پوليتسيا قىزمەتىنىڭ باستىعى باقىتجان مالىباەۆ تولىقتىردى.
تۇراقتى كوميسسيانىڭ وتىرىسىنا استانا قالاسى ءماسليحاتىنىڭ حاتشىسى جانات نۇرپەيىسوۆ قاتىستى.
وتىرىستى قورىتىندىلاي وتىرىپ كوميسسيا مۇشەلەرى ءتيىستى قاۋلى قابىلدادى.
تاڭاتار تولەۋعاليەۆ
