وتكەن اپتانىڭ جۇماسىندا استانا قالاسىنداعى «سارىارقا» ۆەلوترەگىندە ەرلەر مەن ايەلدەر اراسىنداعى اۋىر اتلەتيكادان ازيا چەمپيوناتىنىڭ اشىلۋ سالتاناتى بولىپ وتكەندىگى وزدەرىڭىزگە بەلگىلى.
بايراقتى باسەكەنىڭ شىمىلدىعىن تۇرگەن شارانىڭ اۋەلەي سالعان اندەر مەن شاتتىققا تولى بيلەر شىرايىن اشىپ, شەتەلدىك قوناقتار ۇلتتىق ءان-كۇيىمىزگە قۇلاق قۇرىشىن قاندىرعان بولاتىن. ەڭ باستىسى, مەملەكەتتىك ءانۇرانىمىز شىرقالىپ, قوناقتار تىكەسىنەن-تىك تۇرىپ, قۇرمەت كورسەتكەن. سالدەن سوڭ جيىلعان جۇرت ەلىمىزدە اۋىر اتلەتيكانىڭ دامۋى 1930 جىلداردان باستاۋ الاتىنى تۋرالى, قازاقستان كەڭەس وداعىنىڭ قۇرامىندا بولعان كەزدەگى ايگىلى سپورتشىلار جانە تاۋەلسىز مەملەكەتتىڭ تۋىن كوككە كوتەرگەن تولاعايلارىمىز جايلى بەينەكورسەتىلىمدى تاماشالادى.
جينالعاندار الدىندا ءسوز ءسويلەگەن قر سپورت جانە دەنە شىنىقتىرۋ ىستەرى اگەنتتىگىنىڭ توراعاسى ەرلان قوجاعاپانوۆ: «الەمدە اۋىر اتلەتيكانىڭ قارقىندى دامىپ كەلە جاتقانى بارشاڭىزعا ءمالىم. ءبىزدىڭ ەلىمىزدە دە سپورتتىڭ وسى ءتۇرى جاقسى دامۋ ۇستىندە دەپ ماقتانىشپەن ايتا الامىز. وعان لوندوندا وتكەن وليمپياداداعى قىزدارىمىز بەن يليا ءيليننىڭ جەتىستىكتەرى دالەل. بولاشاقتا دا جەتىستىكتەرىمىز جوعارى بولادى دەپ ۇمىتتەنەمىز جانە سەنەمىز!» دەدى.
ودان ءارى ءسوزىن جالعاعان اگەنتتىك توراعاسى: «بۇل چەمپيونات ءبىزدىڭ ەلىمىزدىڭ جانە وزگە مەملەكەتتەردىڭ وكىلدەرى اراسىنان كوپتەگەن جاڭا جۇلدىزداردى شىعاراتىنى داۋسىز.
مەن وسى چەمپيوناتتى وتكىزۋگە قولداۋ جاساعانى ءۇشىن ازيا اۋىر اتلەتيكا فەدەراتسياسىنا ايرىقشا ريزاشىلىعىمدى ءبىلدىرەمىن. بۇل دوداعا قاتىسۋعا كەلگەن سپورتشىلارعا دا العىس ايتامىن» دەدى.
ازيا بىرىنشىلىگىندەگى العاشقى سىن
قۇرلىقتىق باسەكەنىڭ العاشقى جەڭىمپازدارى 48 كەلىگە دەيىنگى ايەلدەر اراسىندا انىقتالدى.
ەڭ جەڭىل سالماقتا ەلىمىزدىڭ اتىنان گالينا ماموتوۆا شىقتى. العاشقى جاتتىعۋدا سپورتشى 77 كەلىلىك زىلتەمىردى كوتەردى, ال جۇلقا كوتەرۋدە 90 كەلىنى باعىندىرا الدى. جالپى قورىتىندىدا ونىڭ باعىندىرعان سالماعى – 167 كەلى. وكىنىشكە قاراي, بۇل كورسەتكىش ونى جۇلدەلى ورىننان كورسەتە المادى.
بۇل سىندا سولتۇستىك كورەيانىڭ وكىلى ريان چۋن حۆا التىننان القا تاعىنسا, يندونەزيالىق سيرل شاگۋاني ەكىنشى ورىندى يەلەندى. قولا جۇلدە ۆەتنامدىق حۋان دو حۋايعا بۇيىردى.
جان جۇباتار جالعىز كۇمىس
21 ەلدەن 150 اۋىر اتلەتشى باق سىناپ جاتقان ازيا چەمپيوناتىنىڭ العاشقى كۇنى ونەر كورسەتكەن قازاق اۋىر اتلەتشىلەرىنىڭ ناتيجەلەرى كوڭىل كونشىتپەدى. 62 كەلىدە سىنعا تۇسكەن فارحات حاركي كۇمىسكە قول جەتكىزبەگەندە, العاشقى كۇن قورىتىندىسى بويىنشا قانجىعامىز بوس قالعانداي ەكەن. ابىروي بولعاندا فارحاد جۇلقا كوتەرۋدە 138 كەلىنى ەڭسەرىپ, سەرپە كوتەرۋدە 165 كەلىنى باعىندىردى. بۇل سالماقتا ءبىرىنشى ورىن قىتايلىق سپورتشى كيم ۋ گۋككە بۇيىردى.
التىن الماسا دا جۇلدەگە ىلىنەدى دەگەن ارلي چونتەي ءۇمىتتى اقتامادى. ول سەرپە كوتەرۋدە 115 كەلىنى العانىمەن, جۇلقا كوتەرۋدە 135 كەلىنى باعىندىرا المادى.
قىزدار اراسىندا باق سىناعان تاعى ءبىر سپورتشىمىز مارگاريتا ەليسەەۆا 53 كەلى سالماقتا ءتورتىنشى ورىن الدى. ول جالپى ەسەپتە 183 كەلىلىك زىلتەمىردى كوتەردى.
ەكىنشى كۇنى جۇلدە بۇيىرمادى
ازيا چەمپيوناتىنىڭ ەكىنشى كۇنى پاۆلوۆ تا, بالحاەۆ تا جۇلدەگە ىلىنبەدى. ايەلدەر اراسىندا سىنعا تۇسكەن كارينا گوريچەۆا دا جاقسى ناتيجەگە قول جەتكىزبەدى.
ازيا چەمپيوناتىندا 77 كەلى سالماقتا سىنعا تۇسكەن كيريلل پاۆلوۆ ءتورتىنشى ورىن الدى. قوس سايىستىڭ قورىتىندىسى بويىنشا ول 346 كەلىنى كوتەردى. بۇل سالماقتا التىندى يراندىق اۋىر اتلەتشى راسۋل تاكحياني السا (366 كگ), كۇمىستى قىتايلىق سپورتشى جانگ گوۋشين (356كگ) ەنشىلەدى. قولا جۇلدەنى سولتۇستىك كورەيا ەلىنىڭ ازاماتى ەيم كۆانگ سونگ يەلەندى.
63 كەلىگە دەيىنگى ايەلدەر اراسىنداعى باسەكەدە كارينا گوريچەۆا ازيا چەمپيوناتىندا سوڭعى ورىنعا ورنىقتى. ءبىرىنشى ورىندى لين زۋ چي, ەكىنشى ورىندى سولتۇستىك كورەيالىق چو پوك حۋانگ السا, ۇزدىك ۇشتىكتى قىتايلىق سپورتشى ۆۋ ليانگ تۇيىندەدى.
ال, ەرلەر اراسىنداعى 63 كەلى سالماقتا الىبەك بالحاەۆ جەتىنشى ورىننان كورىندى. بۇل سالماقتا ون ءبىر اۋىر اتلەتشى سىنعا ءتۇسىپ, يراندىق اۋىر اتلەتشى جابەر بەرۋزي التىن القالادى. ال كۇمىستى يندونەزيالىق اريان كەتۋتۋ قانجىعالاپ, قولانى پانك چيەر حۋنگۋ يەلەندى.
قولاعا قول جەتكىزدى
دودانىڭ ءۇشىنشى كۇنى ايەلدەر اراسىنداعى 69 كەلى سالماقتا قازاقستان نامىسىن گۇلناز ناۋرىزوۆا قورعادى. قازاقستاننىڭ چەمپيونى جالپى ەسەپتە 218 كەلىلىك زىلتەمىردى كوتەرىپ, بەسىنشى ورىنعا ورنىقتى. ءبىرىنشى جانە ەكىنشى ورىندى سولتۇستىك كورەيالىقتار ريو ۋن حۋ مەن ريم ەن سيم الدى. ءۇشىنشى دارەجەدەن قىتايلىق يۋ يۋن كورىندى.
ەرلەر اراسىندا 85 كەلى سالماقتا سىنعا تۇسكەن ەۆگەني ەۆستافەۆ پەن ەربول مەيىرمانوۆتارعا دا ەل ءۇمىت ارتقان بولاتىن. ەۆگەني جالپى ەسەپتە 341 كەلىلىك زىلتەمىردى باعىندىرىپ, ازيا چەمپيوناتىنىڭ قولا جۇلدەسىن يەلەندى. ال ەربول, وكىنىشكە قاراي, بيىكتەن كورىنە المادى. بۇل سالماقتا ءبىرىنشى ورىندى يران اۋىر اتلەتشىسى سۋراب مورادي السا (358 كگ), ەكىنشى ورىننان يراك سپورتشىسى ءال-دجۋمايلي سافا (351 كگ) كورىندى.
ازيا بىرىنشىلىگى بۇگىن اياقتالادى.
ەربول جانات
