ەلوردادا وتىرىپ-اق ەلىمىزدىڭ الۋان ايماعىنا ساپار شەككىڭىز كەلە مە؟ ورنىڭىزدان جىلجىماي استاناداعى ايتۋلى عيماراتتاردىڭ ىشىنە توپ ەتە ءتۇسۋدى قالايسىز با؟ ەندى مۇنداي مۇمكىندىكتەر قالاداعى وقۋشىلار سارايىنا باراتىن ءار بالادا بار.
اتالعان عيمارات ىشىنەن ەلباسىنىڭ «ماڭگىلىك ەل» يدەياسى مەن «ۇلى دالانىڭ جەتى قىرى» باعدارلامالىق ماقالالارىن جۇزەگە اسىرۋ اياسىندا «مەنىڭ ەلىم» اتتى اقپاراتتىق-ۆيرتۋالدى ورتالىق اشىلدى. سالتاناتتى ءىس-شاراعا قالا اكىمىنىڭ ورىنباسارى ەرلان قاناليموۆ پەن ءبىلىم باسقارماسىنىڭ باسشىسى ءانۋار جانعوزين قاتىستى.
زالدىڭ ەرەكشەلىگى سول, مۇندا كىرگەن بالالار تەلەفونعا جۇكتەلگەن ءموبيلدى قوسىمشانىڭ نەمەسە ۆيرتۋالدى كوزىلدىرىكتىڭ كومەگىمەن «ماڭگىلىك ەل», «اباي الەمى», «قازاقستاننىڭ كيەلى جەرلەرى», «رۋحاني جاڭعىرۋ», «ۇلى دالانىڭ جەتى قىرى», «ەلباسى تۇلعاسى» سەكىلدى تاقىرىپتىق بۇرىشتاردا كورسەتىلگەن اقپاراتتى 3D كەڭىستىگىندە تاماشالايدى. ءبىز دە قىزىعىپ, «مەنىڭ ماماندىعىم» ءبولىمىن شولىپ شىققىمىز كەلگەن. كوزىلدىرىكتى كيگەنىمىز سول ەدى, نۇر-سۇلتان اۋەجايىنان ءبىر-اق شىقتىق. عاجايىپ اپپارات ارقىلى سونداعى كۇتۋ زالى, تەرمينالدان باستاپ, ۇشىپ-قونۋ جولاعىنا دەيىن «ارالاپ», اۋەجاي قىزمەتكەرلەرىنىڭ جۇمىسىن ىشىنەن زەرتتەدىك. بۇدان بولەك, تەلەكوممۋنيكاتسيا, ەلەكتر ەنەرگياسى, قۇرىلىس, مۋزەي, ءبىلىم بەرۋ سالالارى وكىلدەرىنىڭ دە ىسىمەن وسىلايشا تانىسىپ شىعۋعا بولادى ەكەن.
بۇگىنگى تاڭدا وقۋشىلار سارايىندا 120 شاقتى ۇيىرمە جۇمىس ىستەيدى. وعان 10 مىڭنان اسا بالا كەلەدى.
